MARK 9 - Hakcipta - Biatah Bidayuh

¹ Ka Ayŭh nang dinge, “Aku kidaan di angān, digiti agi ngara adi dŭh re kabŭs sibayuh ngara kiris Tapa mritah ngga sipuno kuasa-I.”

Jesus Pinandŭng Bragah-I

² Nŭm andu ripas anŭ Jesus taban Peter, James, ka John, ka maad ndi darŭd adi bigatung sadi adŭp ngara. Ka darŭm ngara tingga Jesus, gayŭn-I birubah.

³ Piraka-I jadi bringam buda, buda ngasad so adi tungang manusia ngu da buda.

⁴ Nganŭ gŭh ngara taruh naan murid kiris Elijah ka Moses minyu ngga Jesus.

⁵ Peter minyu, nang-i di Jesus, “Gurū, mbŭh raru kana inŭh kieh agi digiti! Kieh re ndai taruh bari, ndi yŭn Mai, ndi yŭn Moses, ka ndi yŭn Elijah.”

⁶ Ayŭh mbŭh dŭh puan ani re-i nang amai ayŭh ka ngara duwŭh adi samah ngga ayŭh mbŭh raru taru.

⁷ Komŭnŭ abun mandŭg ka nyayung ngara, ka sirŭŭn agi dog dingah so abun, nang, “Ati inŭh Anak nyirot Ku; dingah pinganang-I!”

⁸ Ngara kimat bait tauh ka kiris mating daya bŭkŭn; kaŭs-i Jesus adŭ adi agi diginŭ ngga ngara.

⁹ Buang ngara mūn darŭd, Jesus pesan ngara, “Dŭhnyah kidaan di tadŭ tadŭ daya kayuh adi angān ko kiris, ndŭg ka Anak Manusia mbŭh makat so kabŭs.”

¹⁰ Ngara tunda pinganang-I, pak dupan adŭp ngara ngara mbŭh piguru kirakar pasar kayuh anŭ, “Ani meh rati ‘makat so kabŭs’ ati?”

¹¹ Ka ngara siken Jesus, “Mani bara gurū Ukum-adat Jahudi nang Elijah re diŭ mandŭg?”

¹² Jesus nam, “Elijah taŭn-i sawŭ diŭ mandŭg siŭn-i sidia sopŭrŭg kayuh yŭn-I. Pak, mani meh Surat-kudus nang Anak Manusia re kinyam bagŭ pinyusah ka dog tirawan?

¹³ Aku kidaan di angān, Elijah mbŭh mandŭg pak daya ndai di tunduh-i nanyam suka asŭng ngara, nimun Surat-kudus ko nang pasar ayŭh.”

Jesus Pibu Roh Arap so Anak Dari

¹⁴ Kan ngara mbŭh ndŭg bara murid adi bŭkŭn, ngara kiris bara daya maning ngara ka kada gurū Ukum-adat Jahudi bikarit ngga ngara.

¹⁵ Kan bara daya kiris Jesus, ngara gŭgŭh, ka bikaduh tudu Ayŭh ka tabi Ayŭh.

¹⁶ Jesus siken bara murid-I, “Pasar ani anŭ, karit ngan ngga ngara?”

¹⁷ Ndi naan daya di ruang daya bagŭ nam, “Gurū, aku agi taban anak ku ka bara murid Mai, sabab ayŭh dog mŭrŭt roh arap ka dŭh pandai minyu.

¹⁸ Niap kari roh arap anŭ muak ayŭh, ayŭh tumbang ka tana, baba-i bibude, jipŭh-i kimatet, ka pŭrŭng ganan-i bagŭg. Aku mite bara murid Mai pibu roh anŭ, pak ngara dŭh tungang.”

¹⁹ Jesus nang di ngara, “Angān adi kurang pinyabah! Ndŭg sinde meh Aku dŭh siŭn dŭh rŭŭ ngga angān? Ndŭg sinde Aku patut bijijŭ ngga angān? Taban anak anŭ kamati!”

²⁰ Ngara taban anak anŭ ka Jesus. Kan roh arap anŭ kiris Jesus, ayŭh nyisŭt anak anŭ ndŭg ka-i tumbang di tana ka gurai-marik adŭp-i, buang baba-i bibude.

²¹ “Mbŭh tian-ki ayŭh mun ati?” Jesus siken sama-i. “So-i gi-sŭ,” ayŭh nam.

²² “Mbŭh siraru roh arap anŭ suba an siŭ ayŭh, bada ayŭh tumbang di apui puan kah di piin. Masi di kieh ka turung kieh, kambŭi Kaam tungang!”

²³ “Ani sakanŭ? Kambŭi Kaam tungang?” Jesus nang. “Sopŭrŭg kayuh bisa jadi yŭn daya adi sabah di Tapa.”

²⁴ Sama anak anŭ rasu nang, “Aku sabah, pak pinyabah ku kurang. Turung bada aku rabis sabah!”

²⁵ Kiris bara daya mbŭh nyikidŭn ngara, Jesus nang di roh arap anŭ, “Roh adi bangam ka adi dŭh pandai minyu, Aku mritah kuu, ruah so anak anŭ ka dŭhnyah tia mŭrŭt ayŭh!”

²⁶ Roh arap anŭ nyirais, nyisŭt ayŭh, ka rasu ruah so ayŭh. Anak anŭ mbŭh mun tadang, ka sopŭrŭg daya nang, “Ayŭh mbŭh kabŭs!”

²⁷ Pak Jesus tambit tangan anak anŭ ka turung ayŭh makat, ka anak anŭ rasu mijog.

²⁸ Ripas Jesus mbŭh mŭrŭt ka darŭm ramin, bara murid-I siken Ayŭh kan ngara mbŭh sadi, “Mani kieh dŭh tungang pibu roh arap anŭ?”

²⁹ “Kaŭs-i simayang adŭ adi tungang pibu kayuh adi mun anŭ,” nam Jesus; “mating kayuh bŭkŭn tungang.”

Jesus Minyu Dinge pasar Pinyikabŭs-I

³⁰ Jesus ngga bara murid-I bu so nŭ ka pijuu pimanu ngara so Galilee. Jesus dŭh raan tadŭ tadŭ daya puan yŭn adŭp-I,

³¹ sabab Ayŭh mbŭh ngajar bara murid-I, nang “Anak Manusia re dog nyerah ka darŭm tangan daya adi re siŭ Ayŭh, pak taruh andu ripas anŭ, Ayŭh re makat udip bauh.”

³² Ngara dŭh mirati ajar anŭ, pak ngara dŭh birani re siken Ayŭh.

Asi adi Bās Dŭ?

³³ Ngara ndŭg Capernaum, ka ripas ngara mbŭh mŭrŭt ka darŭm ramin, Jesus siken bara murid-I, “Ani anŭ karit ngan di aran tejah?”

³⁴ Pak ngara dŭh nam Ayŭh, sabab di aran tejah ngara bikarit dupan adŭp ngara pasar asi adi bās dŭ.

³⁵ Jesus guru, bagan ngara adi simŭng-duwŭh naan murid-I, ka nang di ngara, “Asi asi adi raan jadi diŭ dŭh siŭn dŭh bada adŭp-i jadi sikasŭn ka jadi urun sopŭrŭg daya.”

³⁶ Komŭnŭ Ayŭh mbit ndi naan anak-sŭ ka bada-i mijog di sirung jawin ngara. Jesus dakŭp anak anŭ buang nang di ngara,

³⁷ “Asi asi adi kambat anak-sŭ mun siati ngga adŭn Ku, kambat Aku; ka asi asi adi kambat Aku, kambat dŭh-i Aku adŭ pak Ayŭh adi bada Aku mandŭg.”

Asi asi adi Dŭh Rawan Ata Agi ngga Ata

³⁸ John nang di Ayŭh, “Gurū, kieh agi kiris ndi naan daya pibu umot ngga adŭn Mai, ka kieh nagah ayŭh, sabab ayŭh dŭh so tibaran ta.”

³⁹ “Dŭhnyah nagah ayŭh,” Jesus nang di ngara, “sabab mating daya adi ndai pingandai-nginga ngga adŭn Ku re tungang nang kayuh arap pasar Aku ripas anŭ.

⁴⁰ Amai asi asi adi dŭh rawan ata agi ngga ata.

⁴¹ Ingat nŭh! Daya adi nggen di angān piin nok sabab angān mbŭh tibaran Ku re manŭn kambat upah-i.

Kayuh adi Bada Daya Bidosa

⁴² “Kambŭi agi daya bada ndi so bara pinunda Ku adi sŭ ati dŭh tia sabah di Aku, mbŭh kana dŭ inŭh daya anŭ dog mŭŭng tibande batuh kisar di tungo-i ka dog taran ka darŭm rawŭt.

⁴³ Ka kambŭi tangan ngan bada angān bidosa, kapŭg-i! Mbŭh kana dŭ inŭh angān udip ngga Tapa kipang so angān biyŭn soduwŭh-i ka dog taran ka neraka, ka yŭn apui adi dŭh bisa pura. [

⁴⁴ Diginŭ ‘dudu ŭrŭd adi man-i dŭh bisa kabŭs, ka apui adi badang-i dŭh bisa pura.’]

⁴⁵ Ka kambŭi kaja ngan bada angān bidosa, kapŭg-i! Mbŭh kana dŭ inŭh angān udip ngga Tapa kipang so angān biyŭn soduwŭh-i ka dog taran ka darŭm neraka. [

⁴⁶ Diginŭ ‘dudu ŭrŭd adi man-i dŭh bisa kabŭs, ka apui adi badang-i dŭh bisa pura.’]

⁴⁷ Ka kambŭi batŭh ngan bada angān bidosa, tuket-i! Mbŭh kana dŭ inŭh angān kinyam Ong Bauh Tapa kambet so angān biyŭn soduwŭh-i ka dog taran ka darŭm neraka.

⁴⁸ Diginŭ ‘dudu ŭrŭd adi man-i dŭh bisa kabŭs, ka apui adi badang-i dŭh bisa pura.’

⁴⁹ “Barang naan daya re dog pibisig ngga apui nimun sadis dog pibisig ngga garo.

⁵⁰ “Garo inŭh kana; pak kambŭi pide-i mating tia, simuki meh nŭŭh re bada-i pide dinge? “Patut inŭh angān jadi keya ka garo ka udip darŭm damai dupan adŭp ngan.”