MARK 8 - Hakcipta - Biatah Bidayuh

Jesus Paan Pat Ribu naan Daya

¹ Dŭh tui ripas anŭ agi dinge bara daya mandŭg tikuruk. Kan bara daya mbŭh dŭh biyŭn kayuh man, Jesus bagan bara murid-I ka nang,

² “Masi Aku di bara daya ati; mbŭh taruh andu ngara agi digiti ngga Aku, ka madin ngara mbŭh dŭh biyŭn kayuh man.

³ Kambŭi Aku bada ngara mari dŭh man, ngara manŭn re mijŭp di aran, sabab agi kada ngara mbŭh mandŭg so tarun adi jo.”

⁴ Murid-I siken Ayŭh, “So ki di tarun tana-pajam ati daya tungang dapŭd pinguman ngga paan bara daya ati?”

⁵ “Kudu baru ruti angān biyŭn?” Jesus siken. “Ju baru,” ngara nam.

⁶ Ayŭh bada bara daya guru di tana. Komŭnŭ Ayŭh tambit ju baru ruti anŭ, nggen trima kaseh di Tapa, mire-i, ka nggen-i di bara murid-I yŭn kutung di bara daya; ka bara murid sawŭ kutung.

⁷ Ngara gŭh biyŭn nisŭ iken adi anŭk. Jesus nggen trima kaseh di Tapa yŭn iken anŭ ka bada bara murid-I kutung-i gŭh.

^8-9 Sopŭrŭg daya man ka mbŭh bisoh. Diginŭ agi kurang rabis pat ribu naan daya. Ka bara murid nguruk ju bakur puno ngga tadŭh pinguman anŭ. Jesus bada bara daya mari

¹⁰ buang adŭp-I rasu mŭrŭt arud ngga bara murid-I ka matak ka utung rais Dalmanutha.

Daya Pharisee Mite Jesus Ndai Pingandai-Nginga

¹¹ Kada daya Pharisee mandŭg tudu Jesus ka piguru bikarit ngga Ayŭh. Raan kudog Ayŭh, ngara mite Ayŭh ndai pingandai-nginga ngga kiren sawŭ kah dŭh Ayŭh mandŭg so Tapa.

¹² Pak Jesus ngasŭng ka nang, “Mani daya jaman ati mite pingandai-nginga? Dŭh bisa, Aku kidaan di angān! Mating kayuh adi mun anŭ re dog nggen di ngara!”

¹³ Ayŭh bu tingge ngara, pari mŭrŭt arud, ka mutas ka pah mandi rawŭt anŭ.

Ragi Daya Pharisee ngga Herod

¹⁴ Bara murid mbŭh kambŭt taban bagŭ ruti; kaŭs-i ndi baru adŭ ngara biyŭn di arud.

¹⁵ “Ingat angān,” Jesus bakan ngara, “jaga adŭp ngan so ragi daya Pharisee ka ragi Herod.”

¹⁶ Ngara piguru kirakar dupan adŭp-i: “Ayŭh nang sakanŭ sabab ata dŭh biyŭn ruti.”

¹⁷ Jesus puan kayuh adi nang ngara, jadi Ayŭh siken ngara, “Mani angān kirakar pasar dŭh biyŭn ruti? Gibayuh kah angān mirati? Madŭd kah atŭk ngan?

¹⁸ Angān biyŭn batŭh, mani dŭh kiris? Angān biyŭn kajit, mani dŭh dingah? Dŭh kah angān ingat

¹⁹ di andu Aku mire rimŭh baru ruti yŭn rimŭh ribu naan daya? Kudu bakur puno ngga tadŭh pinguman adi angān sun?” “Simŭng-duwŭh” ngara nam.

²⁰ “Ka di andu Aku mire ju baru ruti yŭn pat ribu naan daya,” Jesus siken, “kudu bakur puno ngga tadŭh pinguman adi angān sun?” “Ju,” ngara nam.

²¹ “Ka gibabŭ kah angān dŭh mirati?” Ayŭh siken ngara.

Jesus Pibua Daya Karak di Bethsaida

²² Ngara ndŭg Bethsaida, di yŭn agi kada daya taban ndi naan daya karak ka yŭn Jesus ka mite Ayŭh tama ayŭh.

²³ Jesus tambit tangan daya karak anŭ ka taban ayŭh ruah so kupo. Ripas-I nyiruja di batŭh daya anŭ, Jesus na tangan-I di tunduh ayŭh ka siken, “Tungang kuu kiris tarun?”

²⁴ Daya anŭ tingga ka nang, “Tungang aku kiris; aku tungang kiris daya, pak mun tŭngŭn kayuh bijaruh.”

²⁵ Jesus na dinge tangan-I di tunduh batŭh daya anŭ. Kari ati daya anŭ nakit tingga, ka-i mbŭh kiris tarun; sopŭrŭg kayuh mbŭh tatŭng kiris-i.

²⁶ Jesus rasu bada ayŭh maad ngga pinganang sakati, “Dŭhnyah pari ka kupo.”

Pinganang Peter Pasar Jesus

²⁷ Komŭnŭ Jesus ngga bara murid-I bu ka anak anak kupo sindŭk Caesarea Philippi. Di aran Ayŭh siken ngara, “Kidaan di Aku, asi Aku sŭn daya nang?”

²⁸ “Agi daya nang Kaam John Pembaptisa,” ngara nam; “adi bŭkŭn nang Kaam Elijah, pak adi bŭkŭn nang Kaam ndi so bara nabi.”

²⁹ “Angān boh?” Ayŭh siken ngara. “Angān nang Aku asi?” Peter nam, “Kaam inŭh Kristus.”

³⁰ Ka Jesus pesan ngara, “Dŭhnyah kidaan di tadŭ tadŭ daya pasar Aku.”

Jesus Minyu pasar Jera-birasa ngga Pinyikabŭs-I

³¹ Komŭnŭ Jesus piguru ngajar bara murid-I: “Anak Manusia dŭh siŭn dŭh kinyam pinyusah bās ka dog tirawan bara nyamba bangsa Jahudi, pingubak imam, ka gurū Ukum-adat Jahudi. Ayŭh re dog ukum kabŭs, pak taruh andu ripas anŭ Ayŭh re makat udip bauh.”

³² Ayŭh nang kayuh ati ngga rabis tarang di ngara. Jadi Peter tarik Ayŭh ka bŭngŭn ka piguru nyara Ayŭh.

³³ Pak Jesus bigiring, kimat bara murid-I, ka nyara Peter. “Bu so Aku, Shetan,” Ayŭh nang. “Pikir-kira mu dŭh mandŭg so Tapa pak so manusia!”

³⁴ Komŭnŭ Jesus bagan bara daya samŭn bara murid-I ka adŭp-I. “Kambŭi agi so angān raan tunda Aku,” Ayŭh nang di ngara, “ayŭh dŭh siŭn dŭh an ngarah adŭp-i, gŭrŭng rigang-i, ka tunda Aku.

³⁵ Amai asi asi adi raan nyiramat asŭng adŭp-i re kinanyap udip adi sawŭ adi tan adu adu; pak asi asi adi kinanyap asŭng-i sitagar Aku ka sitagar Agah Kana re nyiramat-i.

³⁶ Ani utung-i kambŭi daya dapŭd ndi ong ong, pak kinanyap udip adi sawŭ adi tan adu adu?

³⁷ Bisa kah udip anŭ dog nyambi ngga tadŭ kayuh? Manŭn dŭh bisa.

³⁸ Kambŭi daya di turap ati adi ginaka ngga adi dŭh stabi di Tapa mangŭh ngarun Aku ngga ajar Ku, Anak Manusia re mangŭh gŭh ngarun ayŭh kan Ayŭh mandŭg darŭm bragah Sama-I ngga bara malaikat kudus.”