MARK 5 - Hakcipta - Biatah Bidayuh

Jesus Pibua Daya adi dog Mŭrŭt Roh Arap

¹ Jesus ngga bara murid-I mbŭh ndŭg pah mandi Danu Galilee, di tarun tana Gerasa.

² Kan Jesus mbŭh ruah so arud, Ayŭh dog tudu ndi naan daya adi ruah so tarun tana kubur. Daya anŭ mbŭh dog mŭrŭt roh arap,

³ ka rŭŭ di arong kubur. Mating daya tungang muak ayŭh tia, ngga parik basi dŭh gŭh.

⁴ Tiap kari kaja tangan-i dog mŭŭng, ayŭh matŭd parik basi anŭ ka mata papang adi di kaja-i. Ayŭh mbŭh raru bake ndŭg ka mating daya tia tungang muak ayŭh.

⁵ Sandu singarŭm ayŭh bigandon di arong kubur ka sandah, ka nyirais buang bada adŭp-i biragan dog batuh.

⁶ Ayŭh agi mua juan-i kan ayŭh kiris Jesus; Jadi ayŭh bikaduh tudu Jesus ka sidikang nura Ayŭh,

⁷ buang nyirais ngga sirŭŭn bana nang, “Jesus, Anak Tapa adi Sambu Sopŭrŭg! Ani re Mai ndai di aku? Ngga adŭn Tapa, aku mite Kaam, dŭhnyah ngukum aku!” (

⁸ Ayŭh nang sakanŭ sabab Jesus nang, “Roh arap, ruah so daya ati!”)

⁹ Jadi Jesus siken ayŭh, “Asi dŭn mu?” Daya anŭ nam, “Dŭn ku inŭh ‘Sibara,’ amai bagŭ bara ami!”

¹⁰ Ayŭh darah mite Jesus dŭh pibu bara roh arap anŭ so tarun tana anŭ.

¹¹ Dŭh jo so nŭ agi kaban ayo, man di bŭngŭn sandah.

¹² Jadi bara roh arap anŭ mite so Jesus, “Bada kieh di mŭrŭt kaban ayo ajeh.”

¹³ Jesus bada, ka bara roh arap anŭ ruah so daya anŭ ka mŭrŭt kaban ayo anŭ. Ndi kaban ayo anŭ, kurang rabis duwŭh ribu sopŭrŭg-i, rasu bikaduh mūn jenjang ka darŭm rawŭt ka rŭnggŭd.

¹⁴ Bara adi jaga ayo bikaduh bu, ka kidaan kayuh adi mbŭh jadi, di kupo samŭn di arong teya. Bara daya ruah an tingga kayuh adi mbŭh jadi,

¹⁵ ka kan ngara mbŭh ndŭg Jesus, ngara kiris daya anŭ adi ko dog mŭrŭt bara umot agi guru diginŭ nēn piraka buang mbŭh bua ka tirase. Sopŭrŭg ngara mbŭh taru.

¹⁶ Ngara adi agi kiris kidaan di bara daya pasar kayuh adi mbŭh jadi di sianŭ adi dog mŭrŭt bara umot, samŭn kayuh adi mbŭh jadi di bara ayo anŭ.

¹⁷ Jadi ngara mite Jesus bu tingge tarun tana anŭ.

¹⁸ Darŭm Jesus aŭn mŭrŭt arud, daya anŭ adi ko dog mŭrŭt bara umot mite di Ayŭh, “Bada aku sua ngga Kaam!”

¹⁹ Pak Jesus abah bada ka nang di ayŭh, “Panu mari ka rawang mu ka kidaan di ngara kayuh adi Tuhan mbŭh ndai di kuu ka munki Ayŭh mbŭh raru mandis ngga kuu.”

²⁰ Jadi daya anŭ bu ka panu di barang yŭn di Kupo-Simŭng, kidaan kayuh adi Jesus ko ndai di adŭp-i. Ka sopŭrŭg adi dingah-i mbŭh inga inga.

Anak dayung Jairus ka Dayung adi Tama Jipo Jesus

²¹ Jesus mutas pari ka pah mandi rawŭt anŭ. Diginŭ di bŭngŭn rawŭt bara daya bagŭ tikuruk maning Ayŭh.

²² Jairus, pingubak ramin simayang-Jahudi di tarun anŭ, mandŭg, ka kan-i kiris Jesus, ayŭh sidikang di kaja Jesus,

²³ buang bandar mite Ayŭh, “Anak dayung ku agi bana birandam. Ja di na tangan Mai di tunduh-i, isa ayŭh bua ka dŭh kabŭs!”

²⁴ Jesus rasu panu tunda ayŭh. Daya raru bagŭ tunda Ayŭh ndŭg ka mbŭh nyikidŭn Ayŭh so barang parad.

²⁵ Agi ndi naan dayung adi mandam naman andam bideya sitian simŭng-duwŭh sawa,

²⁶ sunggu-i mbŭh siraru biruri ngga bagŭ doktor. Mbŭh bagŭ duit-i dog pakai, pak dŭh adŭ tungang bua, buang andam-i anŭ tanŭ ka mbŭh jadi rabis arap.

²⁷ Ayŭh agi dingah pasar Jesus, jadi ayŭh mandŭg tudu Jesus so punok.

²⁸ Ayŭh nang darŭm asŭng-i, “Kambŭi aku tama adŭ jipo-I, aku bisa bua.”

²⁹ Ayŭh tama jipo-I, ka nganŭ gŭh deya-i badŭh; ka ayŭh mbŭh kinyam adŭp-i bua so andam-i.

³⁰ Di jam anŭ gŭh Jesus puan kuasa agi ruah so adŭp-I, jadi Ayŭh bigiring bait tauh-I di ruang daya bagŭ ka siken, “Asi tama jipo Ku?”

³¹ Bara murid-I nam, “Kaam kiris bara daya nyikidŭn Kaam, simuki Kaam bisa siken asi tama Kaam?”

³² Pak Jesus babŭ tingga bait tauh-I an puan asi daya anŭ adi ko tama Ayŭh.

³³ Dayung anŭ rada kayuh adi mbŭh jadi di adŭp-i, rasu mandŭg buang kimŭtŭr ka taru; ayŭh sidikang di kaja-I, kidaan di Ayŭh sopŭrŭg kayuh adi mbŭh jadi di adŭp-i.

³⁴ Jesus nang di ayŭh, “Nak, sabab kuu sabah di Aku kuu mbŭh bua. Mari meh darŭm damai. Kuu mbŭh bua madin”

³⁵ Darŭm Jesus minyu sakanŭ, agi pinyisung mandŭg so ramin Jairus ka kidaan di ayŭh, “Anak mai mbŭh kabŭs. Dŭhsah nyusah Gurū?”

³⁶ Jesus dŭh piduri kayuh adi ngara nang, pak-I nang di Jairus, “Dŭhnyah taru, sabah adŭ di Aku.”

³⁷ Komŭnŭ Jesus dŭh bada daya tunda adŭp-I, adŭ-i Peter samŭn ngara adi bijurud James ngga John.

³⁸ Kan ngara mbŭh ndŭg ramin Jairus, Jesus kiris daya bipito, buang agi adi nyirais sien ka muās.

³⁹ Ayŭh mŭrŭt ka nang di ngara, “Mani angān bipito ka sien? Anak anŭ dŭh kabŭs; bŭŭs adŭ ayŭh!”

⁴⁰ Ngara tawŭh Jesus, jadi Ayŭh bada ngara di ka sapa, ka adŭp-I taban sindŭ sama anak anŭ samŭn taruh naan murid-I di ka birit adi yŭn anak anŭ dog piguring.

⁴¹ Jesus tambit tangan anak anŭ ka nang, “Talitha, koum,” rati-i, “Anak dayung, Aku nang di kuu, makat meh!”

⁴² Jam anŭ gŭh ayŭh makat ka rasu panu. (Umbur-i agi simŭng-duwŭh sawa.) Ngara mbŭh inga inga kiris kayuh adi mbŭh jadi.

⁴³ Pak Jesus kijaman ngara kidaan di tadŭ tadŭ daya kayuh adi mbŭh jadi. Ka-I nang, “Nggen di ayŭh kayuh man.”