MARK 10 - Hakcipta - Biatah Bidayuh

Jesus Ngajar Pasar Bisare

¹ Komŭnŭ Jesus bu so nŭ, matak ka utung rais Judea, ka mutas Yang Jordan. Bara daya bagŭ mandŭg ka tikuruk maning Ayŭh dinge, ka Ayŭh ngajar ngara, nimun adi mbŭh.

² Kada daya Pharisee mandŭg tudu Ayŭh ka suba an kudog Ayŭh. “Kidaan di kieh,” ngara siken, “nanyam ka Ukum-adat, bisa kah daya taran sawŭn-i?”

³ Jesus nam ngara ngga pinyiken, “Ani ukum-adat adi Moses mbŭh nggen di angān?”

⁴ Pinyinam ngara inŭh, “Moses nyibandar daya nuris surat sare ngga bada sawŭn-i bu.”

⁵ Jesus nang di ngara, “Moses nuris ukum-adat anŭ yŭn ngan sabab angān mbar dog ngajar.

⁶ Pak di sibungas-i, di tika Tapa napa sopŭrŭg kayuh, ‘Tapa napa ngara dari dayung,’ sak adi nang Surat-kudus.

⁷ ‘Ngga sabab anŭ inŭh dari tingge sindŭ sama-i ka udip ngga sawŭn-i,

⁸ ka ngara duwŭh jadi ndi.’ Simŭnŭ inŭh ngara mbŭh dŭh tia duwŭh, pak ndi.

⁹ Daya dŭh siŭn nyibarai, meh, daya adi Tapa mbŭh tubu.”

¹⁰ Kan ngara mbŭh pari ka darŭm arŭn, bara murid siken Jesus pasar kayuh anŭ.

¹¹ Ayŭh nang di ngara, “Daya adi taran sawŭn-i ka sawan ngga dayung bŭkŭn mbŭh tanggah rawan sawŭn-i.

¹² Simŭnŭ gŭh, dayung adi taran banŭh-i ka sawan ngga dari bŭkŭn mbŭh tanggah.”

Jesus Nyiberkat bara Anak-Sŭ

¹³ Kada daya taban bara anak-sŭ ka Jesus siŭn Ayŭh nyiberkat ngara, pak bara murid nang ngara.

¹⁴ Kan Jesus kiris, Ayŭh tuas ka nang di bara murid-I, “Bada bara anak-sŭ anŭ mandŭg ka Aku, ka dŭhnyah kijaman ngara, sabab daya adi keya ka ngara inŭh adi kinyam Pinyipritah Tapa.

¹⁵ Ingat nŭh! Asi asi adi dŭh kambat Pinyipritah Tapa mun anak-sŭ, dŭh-i re dapŭd kinyam-i.”

¹⁶ Komŭnŭ Ayŭh dakŭp bara anak-sŭ anŭ, na tangan-I di tunduh barang naan ngara, ka nyiberkat ngara.

Daya Kaya

¹⁷ Darŭm Jesus mbŭh pijuu pimanu-I dinge, ndi naan daya bikaduh nyandat Ayŭh, sidikang di sirung jawin-I, ka nang, “Gurū adi kana, ani dŭh siŭn dŭh aku ndai ngga dapŭd udip adi sawŭ adi tan adu adu?”

¹⁸ “Mani kuu nang Aku kana?” Jesus siken. “Mating daya kana adŭ-i Tapa.

¹⁹ Kuu puan Pinyipesan Tapa: ‘Dŭhnyah siŭ daya; dŭhnyah tanggah; dŭhnyah naku; dŭhnyah nggen taksi kadong pasar tadŭ daya; dŭhnyah nipu daya; stabi di sindŭ sama mu.’ ”

²⁰ “Gurū,” daya anŭ nang, “so ku gi-sŭ, aku tunda sopŭrŭg Pinyipesan anŭ.”

²¹ Jesus tirek ayŭh ngga atin rindu ka nang, “Dŭm ndi kayuh adi kuu patut ndai. Di jua sopŭrŭg kayuh adi kuu biyŭn ka nggen duit anŭ di daya sirata, ka kuu re biyŭn rata di shorga; komŭnŭ ja tunda Aku.”

²² Kan daya anŭ dingah sakanŭ, raŭn-i marui; ayŭh bu buang susah, sabab ayŭh raru kaya.

²³ Jesus tingga bara murid-I ka nang di ngara, “Mbŭh raru mbar inŭh daya kaya kinyam Pinyipritah Tapa!”

²⁴ Bara murid gŭgŭh dingah pinganang anŭ, pak Jesus pijuu nang, “Angān adi bara anak Ku, taŭn-i mbar inŭh daya kinyam Pinyipritah Tapa!

²⁵ Mbar dŭ inŭh daya kaya kinyam Pinyipritah Tapa so ndi onta mŭrŭt tambus rubang utos.”

²⁶ Bara murid Jesus mbŭh inga inga ka samah siken dupan adŭp-i, “Asi meh, re bisa dog nyiramat?”

²⁷ Jesus tirek ngara ka nam, “So ka manusia kayuh ati dŭh bisa jadi, pak dŭh-i simŭnŭ so ka Tapa, amai Tapa bisa ndai sopŭrŭg kayuh.”

²⁸ Jadi Peter minyu, “Tingga, kieh mbŭh tingge sopŭrŭg kayuh ka tunda Kaam.”

²⁹ “Sawŭ,” Jesus nang di ngara, “pak Aku nang di angān, ngara adi tingge ramin arŭn-i, bait-i jurud-i puan kah sindŭ-i, puan kah sama-i, puan kah anak-i, puan kah teya-i sitagar Aku ka sitagar Agah Kana,

³⁰ re kambat rabis bagŭ-i di jaman ati. Ngara re kambat siratus rupet bagŭ-i ramin, jurud dari, jurud dayung, sindŭ, anak, ka teya; samŭn pinyikisiis ani. Ka di jaman adi re mandŭg ngara re kambat udip adi sawŭ adi tan adu adu.

³¹ Pak bagŭ adi diŭ madin re jadi sikasŭn, ka bagŭ adi sikasŭn madin re jadi diŭ.”

Adi Pitaruh saba Jesus Minyu pasar Pinyikabŭs-I

³² Jesus ngga bara murid-I madin di aran panu nuju Jerusalem. Jesus panu diŭ di jawin bara murid-I, adi mbŭh bana bipito; bara daya adi tunda mbŭh taru. Jesus taban dinge ngara adi simŭng-duwŭh naan murid-I ka bŭngŭn ka minyu pasar kayuh adi re jadi di adŭp-I.

³³ “Dingah,” Ayŭh nang di ngara, “ata aŭn panu ka Jerusalem di yŭn Anak Manusia re dog nyerah ka darŭm tangan bara pingubak imam ka gurū Ukum-adat Jahudi. Ngara re nggen ukum kabŭs di Ayŭh ka komŭnŭ nyerah Ayŭh ka tangan daya adi dŭh bangsa Jahudi,

³⁴ adi re napat Ayŭh, nyiruja Ayŭh, madŭs Ayŭh, ka siŭ Ayŭh; pak taruh andu ripas anŭ Ayŭh re makat udip bauh.”

Pimite James ngga John

³⁵ Komŭnŭ James ngga John, anak Zebedee, mandŭg tudu Jesus. “Gurū,” ngara nang, “agi kayuh raan ami Kaam ndai yŭn ami.”

³⁶ “Ani anŭ?” Jesus siken ngara.

³⁷ Ngara nam, “Kan Kaam guru di takta Mai darŭm bragah, kieh mite Kaam bada kieh guru ngga Kaam, ndi tura ka tauh ndi tura ka bait Mai.”

³⁸ Jesus nang di ngara, “Angān dŭh mirati kayuh adi angān mite. Bisa kah angān nok so makuk jera-birasa adi Aku dŭh siŭn dŭh nok? Bisa kah angān dog baptisa mun gaya Aku re dog baptisa?”

³⁹ “Kieh bisa,” ngara nam. Jesus nang di ngara, “Angān manŭn re nok so makuk adi Aku dŭh siŭn dŭh nok ka dog baptisa mun gaya Ku re dog baptisa.

⁴⁰ Pak Aku dŭh biyŭn hak re mien asi guru tura ka tauh Ku ngga tura ka bait Ku. Adŭp Tapa inŭh adi re nggen-i di ngara adi yŭn-I mbŭh sidia-i.”

⁴¹ Kan ngara adi simŭng naan dingah kayuh anŭ, ngara mbŭh tuas di James ngga John.

⁴² Jadi Jesus bagan sopŭrŭg ngara ka adŭp-I ka nang, “Angān puan nang bara pinguasa bangsa adi dŭh puan Tapa piurun daya-i, ka bara pinguru-i siraru takan daya-i.

⁴³ Pak dŭh-i patut simŭnŭ di dupan angān. Kambŭi agi so angān raan jadi bās, ayŭh dŭh siŭn dŭh an jadi urun daya;

⁴⁴ ka kambŭi agi so angān raan jadi diŭ, ayŭh dŭh siŭn dŭh an jadi urun sopŭrŭg ngan.

⁴⁵ Amai adŭp Anak Manusia dŭh-I mandŭg sabab-I an jadi tuan; Ayŭh mandŭg amai an bituan ka nggen asŭng-I ngga nubos bagŭ daya.”

Jesus Bada Bartimaeus adi Karak Dapŭd Kiris

⁴⁶ Ngara mandŭg ka Jericho, ka darŭm Jesus bu ngga bara murid-I samŭn bara daya, agi ndi naan pigambis adi karak dŭn Bartimaeus anak Timaeus guru di bŭngŭn aran.

⁴⁷ Kan ayŭh dingah Jesus so Nazareth agi panu murah, ayŭh piguru nyirais nang, “Jesus! Anak David! Masi di aku!”

⁴⁸ Bagŭ daya nang ayŭh ka bada ayŭh pirŭŭ adŭp-i. Pak ayŭh nyirais tanŭ ka rabis bana-i, “Anak David, masi di aku!”

⁴⁹ Jesus rŭŭ ka nang, “Bagan ayŭh da kamati.” Ka ngara bagan daya karak anŭ. “Dŭhnyah susah!” ngara nang. “Makat meh, Ayŭh bagan kuu.”

⁵⁰ Jadi ayŭh pasan jipo-i, mirupat, ka mandŭg tudu Jesus.

⁵¹ “Ani raan mu Aku ndai yŭn mu?” Jesus siken ayŭh. “Gurū,” daya karak anŭ nam, “aku raan kiris tarun dinge.”

⁵² “Panu,” Jesus nang di ayŭh, “kuu mbŭh bua amai kuu sabah di Aku.” Jam anŭ gŭh ayŭh dapŭd kiris dinge ka tunda Jesus di aran.