MARK 1 - Hakcipta - Biatah Bidayuh

Ajar John Pembaptisa

¹ Ati inŭh Agah Kana pasar Jesus Kristus, Anak Tapa.

² Agah ati piguru nimun adi nabi Isaiah ko nuris: “Tapa nang, ‘Aku re pait pinyisung Ku diŭ so Kuu, da sidia aran yŭn Mu.’

³ Agi daya nyirais di tarun tana-pajam, nang, ‘Sidia aran yŭn Tuhan; Bada tŭnggŭn aran yŭn-I panu!’ ”

⁴ Jadi John agi dog kiris di tarun tana-pajam, baptisa buang piagah Agah Kana so Tapa. “Marik pimudip ngan pari ka Tapa, ka kambat baptisa meh angān,” ayŭh nang di bara daya, “siŭn Tapa apun dosa ngan.”

⁵ Bagŭ daya so tarun tana Judea ngga so kupo Jerusalem mandŭg an dingah John. Ngara ngaku dosa, ka John baptisa ngara di Yang Jordan.

⁶ John nēn piraka dog ndai so buruh onta, ngga abŭt kupong dog ndai so anyit, ka pinguman-i kadis ngga ju banyis tarun.

⁷ Ayŭh kidaan di bara daya, “Ayŭh adi mandŭg sundis so aku agi bās dŭ so aku. Aku dŭh sadang kana re mutu ka kuka taris kasut-I.

⁸ Aku baptisa angān ngga piin, pak Ayŭh re baptisa angān ngga Roh Kudus.”

Baptisa Jesus ka Pinyisuba adi dog Ayŭh

⁹ Dŭh tui ripas anŭ, Jesus mandŭg so Nazareth di tarun tana Galilee, ka dog baptisa John di Yang Jordan.

¹⁰ Kan Jesus makat so piin, Ayŭh rasu kiris rangit tikuka ka Roh Kudus mūn di tunduh-I mun manuk asang.

¹¹ Ka agi dog dingah sirŭŭn so rangit, “Kuu Anak nyirot Ku. Asŭng Ku munos di Kuu.”

Jesus dog Suba Siarap

¹² Jam anŭ gŭh Roh Kudus taban Ayŭh ka tarun tana-pajam,

¹³ di yŭn-I rŭŭ sitadŭn pat puru andu, dog suba Shetan. Dāng tarun agi gŭh diginŭ, pak malaikat agi mandŭg di turung Ayŭh.

Jesus Bagan Pat naan Pinakap Iken

¹⁴ Kan John mbŭh dog jer, Jesus di ka Galilee ka nyuse Agah Kana so Tapa.

¹⁵ “Tipuh-i mbŭh mandŭg,” Ayŭh nang, “Dŭm dŭh tui Tapa re mritah. Marik pimudip ngan pari ka Tapa meh angān, ka sabah di Agah Kana ati!”

¹⁶ Darŭm Jesus panu kadŭg tabing Danu Galilee, Ayŭh kiris duwŭh naan pinakap iken, Simon ngga jurud-i Andrew, aŭn nakap iken ngga jara.

¹⁷ Jesus nang di ngara, “Tunda Aku, ka Aku re ngajar angān nakap manusia.”

¹⁸ Ngara rasu tingge jara ngara ka tunda Ayŭh.

¹⁹ Ayŭh panu mua juan-i dinge ka kiris duwŭh naan adi bijurud, James ngga John, anak Zebedee. Ngara mbŭh di darŭm arud sidia jara.

²⁰ Kan Jesus kiris ngara, Ayŭh rasu bagan ngara; ngara tingge sama-i Zebedee darŭm arud ngga bara daya-gaji ka tunda Jesus.

Daya adi dog Mŭrŭt Roh Arap

²¹ Jesus ngga bara murid-I mandŭg ka kupo Capernaum, ka di andu Sabbath anŭ ndi Jesus di ka ramin simayang-Jahudi ka piguru ngajar.

²² Bara daya adi dingah Ayŭh mbŭh inga inga di gaya-I ngajar, amai Ayŭh dŭh mun bara gurū Ukum-adat Jahudi; Ayŭh ngajar ngga kuasa.

²³ Nganŭ gŭh ndi naan daya adi dog mŭrŭt roh arap mŭrŭt ramin simayang-Jahudi ka nyirais nang,

²⁴ “Re Mai simuki ngga kieh, Jesus so Nazareth? Kaam agi digiti an pirabur kieh kah? Aku puan asi Kaam; Kaam inŭh pinyisung Tapa adi kudus!”

²⁵ Jesus mritah roh anŭ “Pirŭŭ adŭp mu; ruah so ayŭh!”

²⁶ Roh arap anŭ bana ngagar daya anŭ buang nyirais, ka ruah so ayŭh.

²⁷ Bara daya mbŭh inga inga ndŭg ka nang dupan adŭp-i, “Ani ati, ajar bauh kah? Daya ati, ngga kuasa Ayŭh mritah roh arap anŭ, ka-i tunda pinganang-I!”

²⁸ Ka agah pasar Jesus raju kambang di ndi tarun tana darŭm utung rais Galilee.

Jesus Pibua bagŭ Daya

²⁹ Jesus ngga bara murid-I, samŭn James ngga John, ruah so ramin simayang-Jahudi ka panu di ka ramin Simon ngga Andrew.

³⁰ Dinŭh Simon guring sungoh, ka kan Jesus mbŭh ndŭg nŭ, Ayŭh rasu dog kidaan pasar ayŭh.

³¹ Jesus tudu ayŭh, tambit tangan-i, ka turung ayŭh makat. Sungoh anŭ bu so ayŭh, ka ayŭh rasu ngidang ngara.

³² Ngga arong singumi andu, kan batŭh andu mbŭh mūn, bara daya taban ka yŭn Jesus sopŭrŭg daya adi birandam ka adi dog mŭrŭt umot.

³³ Sopŭrŭg daya di kupo anŭ tikuruk di rawa ramin anŭ.

³⁴ Jesus pibua bagŭ daya adi naman bagŭ masam andam ka pibu bagŭ umot. Dŭh Ayŭh an bada umot nang ani ani, sabab ngara taŭn puan asi Ayŭh.

Jesus Ngajar di Galilee

³⁵ Awar isan isan andu jawa ndi, sibayuh siri jawa, Jesus makat ka bu so ramin anŭ. Ayŭh ruah so kupo anŭ di ka tarun yŭn adi pajam ka simayang.

³⁶ Pak Simon ngga bara dingan-i ruah di jiroh Ayŭh,

³⁷ ka kan ngara mbŭh dapŭd Ayŭh, ngara nang, “Sopŭrŭg daya jiroh Kaam.”

³⁸ Pak Jesus nam, “Ata dŭh siŭn dŭh an pijuu panu ka barang kupo adi bŭkŭn adi maning arong ati. Aku dŭh siŭn dŭh an ngajar diginŭ gŭh, amai sabab anŭ inŭh Aku mbŭh mandŭg.”

³⁹ Jadi Ayŭh panu di ndi tarun tana Galilee, ngajar di ramin ramin simayang-Jahudi ka pibu umot.

Jesus Pibua ndi naan Daya Naman Andam Kurit adi Bisā

⁴⁰ Ndi naan daya adi naman andam kurit adi bisā mandŭg tudu Jesus, sidikang ka mite turung so Ayŭh. “Kambŭi Kaam raan,” ayŭh nang, “Kaam bisa bada aku bisig.”

⁴¹ Raru masi, Jesus ton tangan-I ka tama ayŭh. “Aku raan,” Ayŭh nam. “Bisig meh!”

⁴² Jam anŭ gŭh andam anŭ bu so ayŭh, ka ayŭh mbŭh bua.

⁴³ Ka Jesus nakit pesan ayŭh ka bada ayŭh rikas bu,

⁴⁴ ripas-I nang, “Dingah ati, dŭhnyah kidaan di tadŭ tadŭ daya pasar kayuh ati. Pak di ka imam ka bada ayŭh natu kuu sawŭ mbŭh bua. Ka ngga kiren adŭp mu mbŭh bua di daya bagŭ, di jugan sadis anŭ nimun adi ko Moses pesan.”

⁴⁵ Pak daya anŭ bu ka pigarau kayuh anŭ di barang yŭn-i. Ayŭh pigarau ndŭg ka Jesus mbŭh dŭh adŭ tungang mŭrŭt kupo di sirung jawin daya bagŭ. Jadi Jesus rŭŭ di sapa kupo di tarun tarun pajam, ka daya so barang yŭn-i mandŭg tudu Ayŭh.