MALACHI 3 - Hakcipta - Biatah Bidayuh

¹ TUHAN Bisa-pŭrŭg nam, “Aku re pait pinyisung Ku bada sidia aran yŭn Ku. Komŭnŭ TUHAN adi angān jiroh re gŭgŭh mandŭg ka Ramin-I. Pinyisung adi angān kajŭn re mandŭg ka piagah simanya Ku.”

² Pak asi re tan kinyam andu adi ngga-I mandŭg? Asi re tan kan Ayŭh pinandŭng adŭp-I? Ayŭh re keya ka sabun adi bake, keya ka apui adi pibisig basi.

³ Ayŭh re mandŭg di bisara daya, mun daya pibisig ka pijarŭh pirak. Nimun tukang basi pibisig pirak ngga mas, simŭnŭ inŭh pinyisung TUHAN re pibisig bara imam, isa ngara taban ka TUHAN sadis adi batur.

⁴ Komŭnŭ sadis adi daya Judah ngga daya Jerusalem taban ka TUHAN re pimunos asŭng-I, nimun adi dawŭ-i adi pimunos asŭng-I.

⁵ TUHAN Bisa-pŭrŭg nang, “Aku re nandŭng di ruang ngan an nggen bisara, ka Aku re rasu nggen taksi rawan ngara adi ndai biruri karŭm, rawan ngara adi tanggah, rawan ngara adi nggen taksi kadong, rawan ngara adi dŭh tŭnggŭn di har gaji daya adi nyiraja di ribo adŭp ngara, rawan daya adi nyibudo dayung uban, anak tumang, ka daya tami; rawan sopŭrŭg daya adi dŭh stabi di Aku.”

Pinganggen Ndi Utung-So-Simŭng

⁶ “Aku ati TUHAN, ka Aku dŭh birubah. Ka simŭnŭ gŭh angān, adi sesang Jacob, ka adi gibayuh rarap.

⁷ Angān, mun tayung-babuk ngan adi diŭ so angān, mbŭh nyipunok ukum ukum-adat Ku ka mbŭh dŭh sita-i. Pari ka Aku, ka Aku gŭh re pari ka angān. Pak angān siken, ‘Ani dŭh siŭn dŭh ami ndai ngga ami pari ka Kaam?’

⁸ Aku siken angān, kayuh adi batur kah nŭŭh nipu Tapa? Taŭn-i dŭh, pak angān nipu Aku. ‘Munki?’ angān siken. Di har pinganggen ndi utung-so-simŭng ngan ngga sadis ngan.

⁹ Pangu mbŭh nyatŭk sopŭrŭg ngan sabab sopŭrŭg ngan mbŭh nipu Aku.

¹⁰ Taban sopŭrŭg pinganggen ndi utung-so-simŭng ngan ka Ramin TUHAN, isa pinguman jadi bagŭ diginŭ. Suba Aku, ka angān re kiris Aku kuka pinjan shorga ka ren di tunduh ngan barang masam kayuh kana.

¹¹ Aku dŭh re bada kadis pirusak pimuruh ngan, ka tŭngŭn anggor ngan re sarad ngga buwa anggor.

¹² Komŭnŭ daya so sopŭrŭg bangsa re kadŭn angān bituah, sabab tarun tana ngan re kana yŭn rŭŭ.

Tapa Bijanji an Apun

¹³ “Angān mbŭh nang kayuh adi raru arap pasar Aku,” TUHAN nang. “Pak angān siken, ‘Ani anŭ adi mbŭh ami nang pasar Kaam?’

¹⁴ Angān mbŭh nang, ‘Dŭh-i biguna nŭŭh bituan di Tapa. Ani utung-i nŭŭh ndai kayuh adi-I bada nŭŭh ndai, bait suba kiren di TUHAN Bisa-pŭrŭg nŭŭh nyesar amai kayuh adi nŭŭh mbŭh ndai?

¹⁵ Nimun adi mbŭh ta kiris, daya adi sambuh inŭh daya adi sanang. Daya adi arap dŭh-i udip mujur adŭ, pak ngara suba pinyitŭtŭd Tapa ngga pingandai arap ngara ka dŭh dog ukum.’ ”

¹⁶ Komŭnŭ daya adi taru di TUHAN minyu dupan adŭp ngara, ka TUHAN nyiringa ka dingah kayuh adi ngara nang. Di sirung jawin-I, agi dog nuris darŭm surat dŭn ngara adi taru di TUHAN ka adi stabi di Ayŭh.

¹⁷ “Ngara re jadi daya Ku,” nang TUHAN Bisa-pŭrŭg. “Di andu Aku makat ndai kayuh, ngara re jadi tung jaku. Aku re masi di ngara, nimun sama masi di anak adi bituan di adŭp-i.

¹⁸ Daya Ku re kiris dinge ka puan ani anŭ adi jadi di daya tŭnggŭn ka ani anŭ adi jadi di daya ginaka, ani anŭ adi jadi di daya adi bituan di Aku ka ani anŭ adi jadi di sianŭ adi dŭh bituan di Aku.”