MALACHI 2 - Hakcipta - Biatah Bidayuh

¹ TUHAN adi Bisa-pŭrŭg nang di bara imam, “Pesan ati inŭh yŭn ngan:

² Angān dŭh siŭn dŭh stabi di Aku ngga pingandai ngan. Kambŭi angān dŭh tunda pinganang Ku, Aku re mangu angān. Aku re mangu kayuh adi angān dapŭd adi ngga angān kudip adŭp ngan. Sawŭ, Aku muko mangu kayuh kayuh anŭ, sabab angān dŭh mbit bat di pesan Ku.

³ Aku re ngukum anak anak ngan ka gasak jawin ngan di taki dāng adi angān nyadis. Komŭnŭ angān re dog batak ka yŭn tugung taki.

⁴ Ka angān re puan Aku mbŭh nggen di angān pesan ati, isa simanya Ku ngga bara imam, adi so sesang Levi, dŭh dog pirusak.

⁵ “Darŭm Simanya Ku Aku bijanji nggen udip bamai ngga udip sanang di ngara, ka anŭ inŭh kayuh adi Aku nggen di ngara, isa ngara stabi ka taru di Aku. Di jaman anŭ ngara sawŭ stabi ka taru di Aku.

⁶ Ngara ngajar kayuh adi batur, ka dŭh kayuh adi sarah. Ngara udip tirase ngga Aku; ngara ndai dŭh-i kayuh adi batur adŭ, pak ngara turung gŭh daya daya bŭkŭn pasan pingandai adi arap.

⁷ Anŭ mbŭh kraja bara imam, ngajar pinyipuan adi sawŭ pasar Tapa. Daya patut tudu ngara yŭn birajar pasar pinyiraan Ku, sabab ngara inŭh pinyisung TUHAN Bisa-pŭrŭg.

⁸ “Pak madin angān bara imam mbŭh miriseu so aran adi batur. Sitagar ajar ngan bagŭ daya mbŭh ndai sarah. Angān mbŭh miranggar simanya adi Aku mbŭh ndai ngga angān.

⁹ Jadi Aku meh, re bada angān dog ngamun daya Israel sabab angān dŭh tunda pinyiraan Ku, ka sabab gaya ngan ngga barang naan daya Ku dŭh brinyam kan angān ngajar ngara.”

Daya dŭh Tŭtŭd di Tapa

¹⁰ Dŭh kah sopŭrŭg ta biyŭn ndi sama? Dŭh kah Tapa anŭ gŭh adi napa sopŭrŭg ta? Jadi mani ata miranggar janji adi ata ndai ngga dingan ta; ka mani ata ngamun simanya adi Tapa mbŭh ndai ngga tayung-babuk ta?

¹¹ Daya Judah mbŭh miranggar janji ngara di Tapa ka mbŭh ndai kayuh adi raru sipŭ di Jerusalem ka di ndi tarun tana rais. Ngara mbŭh nyembar Ramin TUHAN adi TUHAN rindu. Bara dari mbŭh sawŭn dayung adi nyambah tapa saruh.

¹² Isa-i TUHAN kadi so dupan bara daya Israel ngara adi ndai kayuh adi mun anŭ, ka dŭh re tia bada ngara sua jugan sadis adi bangsa ta taban ka yŭn TUHAN Bisa-pŭrŭg.

¹³ Ati ndi dinge kayuh adi angān ndai. Angān pirŭnggŭd mija-sambah TUHAN ngga randang batŭh, muās buang sien bana sabab Ayŭh mbŭh dŭh tia trima sadis adi angān taban ka Ayŭh.

¹⁴ Angān siken mani Ayŭh dŭh tia trima-i. Anŭ mbŭh sabab Ayŭh puan angān mbŭh dŭh tia tŭtŭd di dayung adi angān tambit ndu sawŭn di tipuh angān gibabŭ mara. Ayŭh anŭ apid ngan, ka angān mbŭh miranggar janji adi angān mbŭh ndai ngga ayŭh, pŭn ka angān bijanji di sirung jawin Tapa nang adŭp ngan an tŭtŭd di ayŭh.

¹⁵ Dŭh kah Tapa adi bada angān ndi pŭrŭng ndi simangi ngga ayŭh? Ani pinŭtŭn-I di kayuh anŭ? Anŭ inŭh isa angān bisa biyŭn anak anak adi sawŭ daya Tapa. Jadi ingat meh dŭhnyah, tadŭ tadŭ so angān, miranggar janji adi angān mbŭh ndai ngga sawŭn ngan.

¹⁶ “Aku tiru di kayuh adi dŭn bisare,” nang TUHAN adi Tapa Israel. “Aku raru dŭh suka kan ndi naan so angān ndai kayuh adi sipŭ mun anŭ di tunduh sawŭn ngan. Ingat meh, dŭhnyah angān miranggar janji ngan adi nang adŭp ngan an tŭtŭd di sawŭn ngan.”

Andu Bisara mbŭh sindŭk

¹⁷ Angān mbŭh bada TUHAN reju di pinganang ngan. Pak angān siken, “Munki kieh bada Ayŭh reju?” Ngga pinganang ngan, “TUHAN Bisa-pŭrŭg nyirundeng sopŭrŭg daya adi ndai arap kana; sibatur-i Ayŭh suka ngara.” Bait kah angān nang, “Diki meh Tapa adi sipatut-i tŭnggŭn?”