LUKE 8 - Hakcipta - Biatah Bidayuh

Bara Dayung adi Turung Jesus

¹ Dŭh tui ripas anŭ, Jesus panu tambus kupo kupo ka anak anak kupo, piagah Agah Kana pasar Tapa piguru mritah. Ngara adi simŭng duwŭh naan murid-I agi sua ngga Ayŭh,

² simŭnŭ gŭh kada dayung adi ko dog pibua so roh arap ka so barang masam andam: Mary adi dog kadŭn Magdalene adi so ju umot ko dog pibu;

³ Joanna, sawŭn Chuza adi pingingat buat-rata Herod; ka Susanna, samŭn bagŭ dayung bŭkŭn, adi mbŭh pakai buat-rata adŭp-i ngga turung Jesus ka bara murid-I.

Upama Daya Nabur bine

⁴ Daya dŭh ko ko mandŭg tudu Jesus so barang kupo; ka kan bara daya bagŭ mbŭh tikuruk, Jesus nyidundan upama ati:

⁵ “Agi ndi sidah, ndi naan daya matak di nabur bine. Darŭm-i nabur bine, kada bine rabu di aran, dog digang, ka dog man manuk.

⁶ Kada rabu di tarun pibatuh. Kan-i timbu ayŭh rasu rayu sabab tana-i badŭh.

⁷ Kada bine rabu di ruang reja adi samah timbu ka piaka ayŭh.

⁸ Ka kada bine rabu di tana mandis; ayŭh timbu ka pijadi siratus rupet bagŭ buwa-i.” Ka Jesus nang, “Dingah, garang, kambŭi angān biyŭn kajit!”

Pinŭtŭn Jesus Pakai Upama

⁹ Murid murid Jesus siken rati upama anŭ.

¹⁰ Ayŭh nam, “Angān mbŭh dog nggen kuasa ngga mirati munki Tapa mritah, pak di ngara adi bŭkŭn pinyipuan anŭ mandŭg so ka upama, isa ngara bisa tingga pak dŭh kiris, dingah pak dŭh mirati.”

Jesus Kidaan Rati Upama Nabur Bine

¹¹ “Ati inŭh rati upama anŭ: bine inŭh pinganang Tapa.

¹² Bine adi rabu di aran, rati-i ngara adi dingah; pak Siarap mandŭg ka tambit agah anŭ so atin ngara ngga bada ngara dŭh sabah ka dŭh dog nyiramat.

¹³ Bine adi rabu di tarun pibatuh, rati-i ngara adi dingah agah anŭ ka kambat-i ngga gaŭn. Pak dŭh-i mŭrŭt tŭrŭp darŭm atin ngara; ngara sabah nyitiro adŭ ka kan pinyisuba mandŭg, ngara dŭh tia sabah agah anŭ.

¹⁴ Bine adi rabu di ruang reja, rati-i ngara adi dingah; pak susah pasar pimudip buang gruwŭn pinyikaya samŭn udip sanang di ong mbŭh bada ngara aka. Tung ngara buwa bŭn masak.

¹⁵ Bine adi rabu di tana adi mandis, rati-i ngara adi dingah agah anŭ ka nyikŭn-i darŭm atin adi kana ka nundok; ngara bijijŭ ndŭg ka ngara buān buwa.”

Prita adi Dog Na di ribo Sambong

¹⁶ “Mating daya tung prita ka nyakŭb-i ngga sambong puan kah na-i di ribo pangō. Na-i di tunduh rika prita, kidŭ-i, isa daya tungang kiris jawa-i kan ngara mŭrŭt.

¹⁷ “Mating kayuh adi dog sukan re dŭh dog kiren, ka mating rusia re dŭh dog dapŭd ka dog puan.

¹⁸ “Ngapŭi meh, nakit ngatin kayuh adi angān dingah; sabab asi asi adi biyŭn kayuh re dog nggen rabis bagŭ, pak asi asi adi dŭh biyŭn, rapuh kayuh adi-i biyŭn re dog tambit gŭh.”

Sindŭ Jesus ngga bara Jurud-I

¹⁹ Sindŭ Jesus ngga bara jurud-I mandŭg tudu Ayŭh, pak dŭh tungang nyindŭk Ayŭh sabab bara daya bagŭ.

²⁰ Ka agi daya nang di Jesus, “Sindŭ Mai ngga bara jurud Mai agi mijog di sapa, an bidapŭd ngga Kaam.”

²¹ Jesus nang di sopŭrŭg ngara, “Sindŭ Ku ka jurud Ku inŭh ngara adi dingah pinganang Tapa ka tunda-I.”

Jesus Pirŭŭ Sabak Ribut

²² Jadi ndi andu, Jesus mŭrŭt arud ngga bara murid-I ka nang di ngara, “Ja ata mutas ka pah mandi rawŭt ati.” Jadi ngara matak.

²³ Darŭm ngara birayar, Jesus bŭŭs. Ka gŭgŭh agi sabak ribut di rawŭt anŭ, ka ngara mbŭh raru taru buang susah kan piin piguru ngisi arud ngara.

²⁴ Murid murid Jesus di tudu Ayŭh ka kies Ayŭh, nang, “Gurū, Gurū! Ata mbŭh re rŭnggŭd!” Jesus makat ka mritah sabak ribut ngga girumbang da rŭŭ, ka-i rŭŭ; ka sopŭrŭg-i mbŭh tanang.

²⁵ Ka-I nang di murid murid-I, “Mani angān dŭh sabah di Aku?” Pak ngara mbŭh inga inga buang taru, ka nang sanuh di sanuh, “Asi daya ati? Ayŭh mritah sabak ribut ngga girumbang, ka-i tunda pinganang-I!”

Jesus Pibua ndi Naan Daya adi dog Mŭrŭt bara Umot

²⁶ Jesus ngga bara murid-I pijuu birayar ka tarun tana Gerasa, adi tura kamajeh Danu Galilee.

²⁷ Darŭm Jesus ruah so arud di ka deyŭh, Ayŭh bidapŭd ngga ndi naan daya so kupo, adi dog mŭrŭt bara umot. Mbŭh tui daya anŭ bŭn nēn piraka ka abah-i rŭŭ di ramin, adŭ-i di arong kubur.

²⁸ Kan ayŭh kiris Jesus, ayŭh nyirais buang sidikang di kaja Jesus, ka nang ngga sirŭŭn bana, “Jesus, Anak Tapa adi Sambu Sopŭrŭg! Re Mai simuki ngga aku? Aku mite Kaam dŭhnyah pijera aku!”

²⁹ Ayŭh nang sakanŭ sabab Jesus mbŭh mritah roh arap anŭ da ruah so ayŭh. Mbŭh siraru roh arap anŭ muak ayŭh. Ka sunggu ayŭh agi nakit dog jaga, ka kaja tangan-i dog mŭŭng ngga parik basi, ayŭh matŭd parik basi anŭ ka dog taban umot anŭ ruah ka tarun pajam.

³⁰ Jesus siken ayŭh, “Asi dŭn mu?” “Dŭn ku inŭh ‘Sibara,’ ” ayŭh nam, sabab mbŭh raru bagŭ umot mŭrŭt ayŭh.

³¹ Bara umot anŭ mite Jesus dŭh taran ngara ka rasan ong.

³² Dŭh jo so nŭ agi kaban ayo, man di bŭngŭn sandah. Jadi bara umot anŭ mite Jesus bada ngara mŭrŭt ka darŭm bara ayo anŭ. Jesus nyibandar ngara.

³³ Ngara ruah so daya anŭ ka mŭrŭt ka darŭm bara ayo anŭ. Ndi kaban ayo anŭ bikaduh mūn jenjang ka darŭm rawŭt ka rŭnggŭd.

³⁴ Kan ngara adi kudip ayo kiris ani adi mbŭh jadi, ngara bikaduh bu ka pigarau-i di kupo ka di arong teya.

³⁵ Bara daya matak an kiris ani adi mbŭh jadi. Ka kan mbŭh ndŭg Jesus, ngara kiris sianŭ adi so bara umot mbŭh ruah, guru sindŭk kaja Jesus, nēn piraka buang mbŭh bua ka tirase; ka ngara mbŭh taru.

³⁶ Ngara adi agi kiris kidaan di bara daya munki ayŭh dog pibua.

³⁷ Ka ngara adi so tarun tana anŭ mite Jesus bu, sabab ngara mbŭh raru taru. Jadi Jesus mŭrŭt ka darŭm arud ka bu.

³⁸ Daya anŭ adi so bara umot mbŭh ruah, mite adŭp-i tunda Jesus. Pak Jesus bada ayŭh bu, nang-I,

³⁹ “Maad ka arŭn adŭp mu ka kidaan ani adi Tapa mbŭh ndai di kuu.” Jadi daya anŭ bijaruh di kupo, piagah anŭ adi Jesus ko ndai di adŭp-i.

Anak Jairus ka Ndi Naan Dayung adi tama Jipo Jesus

⁴⁰ Kan Jesus pari ka pah mandi rawŭt anŭ, bara daya bagŭ kambat Ayŭh, sabab ngara sopŭrŭg taŭn mbŭh kajŭn Ayŭh.

⁴¹ Ndi naan daya dŭn Jairus mandŭg; ayŭh anŭ pingubak ramin simayang-Jahudi. Ayŭh sidikang di kaja Jesus, ka bandar mite Ayŭh di ka ramin-i,

⁴² sabab anak tambŭ dayung-i, adi simŭng-duwŭh sawa umbur-i, mbŭh bana birandam sindŭk re kabŭs. Darŭm Jesus panu, daya nyikidŭn Ayŭh bait tauh-I.

⁴³ Di dupan ngara agi ndi naan dayung adi naman andam bideya sitŭkŭd simŭng-duwŭh sawa. Ayŭh mbŭh kubo buat rata-i ngga biruri ngga doktor, pak mating adŭ adi tungang pibua ayŭh.

⁴⁴ Di uruk bara daya bagŭ, ayŭh mandŭg so tura ka punok tudu Jesus ka tama tŭbŭn jipo-I, ka jam anŭ gŭh deya-i badŭh.

⁴⁵ Jesus siken, “Asi tama Aku?” Sopŭrŭg daya mating ngaku, ka Peter nang, “Gurū, bara daya bagŭ maning buang nyikidŭn Kaam.”

⁴⁶ Pak Jesus nang, “Agi daya tama Aku; Aku puan amai Aku kinyam kuasa agi ruah so Aku.”

⁴⁷ Dayung anŭ kinyam adŭp-i dŭh bisa bisukan, mandŭg buang kimŭtŭr ka sidikang di kaja Jesus. Di sirung jawin daya bagŭ, ayŭh kidaan di Ayŭh ani sabab-i tama Ayŭh ka munki ayŭh mbŭh dapŭd bua jam anŭ.

⁴⁸ Jesus nang di ayŭh, “Nak, sabab kuu sabah di Aku, kuu mbŭh bua. Panu kuu darŭm damai.”

⁴⁹ Darŭm Jesus minyu sakanŭ, ndi naan pinyisung mandŭg so ramin Jairus. “Anak mai mbŭh mating,” ayŭh nang di Jairus; “dŭhsah tia mito Gurū.”

⁵⁰ Pak Jesus dingah ka nang di Jairus, “Dŭhnyah taru; sabah adŭ, ka anak mu re bua.”

⁵¹ Kan Ayŭh mbŭh ndŭg ramin anŭ, Ayŭh dŭh bada daya mŭrŭt ngga adŭp-I adŭ-i Peter, John, ka James, samŭn adŭp sindŭ sama anak anŭ.

⁵² Bara daya diginŭ sadi sien, muās anak anŭ. Jesus nang, “Dŭhnyah sien; anak anŭ dŭh kabŭs; ayŭh bŭŭs adŭ!”

⁵³ Sopŭrŭg ngara tawŭh Ayŭh, sabab ngara puan nang anak anŭ taŭn mbŭh kabŭs.

⁵⁴ Pak Jesus digŭng tangan anak anŭ ka nang, “Makat, nak!”

⁵⁵ Asŭng-i pari, ka-i rasu makat, ka Jesus bada ngara nggen di ayŭh kayuh man.

⁵⁶ Pimas-i mbŭh inga inga, pak Jesus pesan ngara da dŭh kidaan di tadŭ tadŭ daya kayuh adi mbŭh jadi.