LUKE 7 - Hakcipta - Biatah Bidayuh

Jesus Pibua Daya-gaji Pingubak Soldadu daya Rome

¹ Kan Jesus muko nang sopŭrŭg kayuh anŭ di bara daya, Ayŭh di ka Capernaum.

² Diginŭ agi ndi naan pingubak soldadu daya Rome adi biyŭn ndi naan daya-gaji adi-i raru siŭt. Daya gaji-i birandam ka mbŭh sindŭk re kabŭs.

³ Kan ayŭh dingah pasar Jesus, ayŭh pait kada nyamba bangsa Jahudi da mite Ayŭh mandŭg di pibua daya gaji-i.

⁴ Ngara mandŭg ka yŭn Jesus ka bandar mite Ayŭh, nang-i “Daya ati patut dog turung.

⁵ Ayŭh rindu bangsa ta buang mbŭh pijog ramin simayang-Jahudi yŭn ta.”

⁶ Jadi Jesus tunda ngara. Kan Ayŭh mbŭh sindŭk ramin-i, pingubak soldadu anŭ pait bara dingan-i da kidaan di Ayŭh, “Tuan, dŭhnyah nyusah adŭp Mai. Aku ati dŭh sadang kana re bada Kaam mŭrŭt ramin ku,

⁷ dŭh gŭh aku kira adŭp ku sadang kana re tudu Kaam. Pak Kaam minyu adŭ, ka daya-gaji ku bisa bua.

⁸ Aku ati gŭh daya adi di ribo kuasa bara pingubak adi rabis bigatung, ka aku biyŭn gŭh soldadu di ribo ku. Aku mritah siati, ‘Panu!’ ka ayŭh panu; aku mritah siajeh, ‘Mandŭg!’ ka ayŭh mandŭg; ka aku mritah urun ku, ‘Ndai ati!’ ka ayŭh ndai-i.”

⁹ Jesus mbŭh inga inga kan-I dingah ayŭh sakanŭ; Ayŭh bigiring ka nang di bara daya adi tunda Ayŭh, “Aku kidaan di angān, gi-bŭn Aku dapŭd pinyabah adi mun ati; di dupan daya Israel bŭn gŭh!”

¹⁰ Pinyisung pinyisung anŭ pari ka ramin pingubak soldadu anŭ ka dapŭd daya gaji-i mbŭh bua.

Jesus Pakat Anak Dari Dayung-Uban so Kabŭs

¹¹ Dŭh tui ripas anŭ, Jesus di ka kupo dŭn Nain, ayō bara murid-I samŭn bara daya bagŭ.

¹² Kan Ayŭh mbŭh ndŭg tiban kupo, bara daya bagŭ aŭn panu ruah re di ngubur daya kabŭs. Daya adi kabŭs anŭ inŭh anak tambŭ ndi naan dayung uban; bara daya so kupo samah panu ngga dayung uban anŭ.

¹³ Kan Tuhan kiris ayŭh, Ayŭh mbŭh raru masi di ayŭh, ka nang di ayŭh, “Dŭhnyah sien.”

¹⁴ Komŭnŭ Ayŭh di tama pinawid, ka ngara adi tukang tawek rasu rŭŭ. Jesus nang, “Dari bujang! Aku nang di kuu, makat!”

¹⁵ Daya kabŭs anŭ makat ka guru, ka rasu minyu, ka Jesus nggen ayŭh di sindŭ-i.

¹⁶ Sopŭrŭg ngara mbŭh taru buang muji Tapa. “Nabi bās mbŭh mandŭg di ruang ta!” ngara nang; “Tapa mbŭh mandŭg di nyiramat daya-I!”

¹⁷ Agah pasar Jesus mbŭh kambang di rais anŭ samŭn di ndi tarun tana maning anŭ.

Pinyisung so John Pembaptisa

¹⁸ Kan murid murid John kidaan di ayŭh pasar sopŭrŭg kayuh ati, ayŭh bagan duwŭh naan so ngara

¹⁹ ka pait ngara ka yŭn Tuhan da siken, “Kaam kah sianŭ adi dog kidaan nang re mandŭg nanyam ka janji Tapa, puan kah kieh babŭ kajŭn adi bŭkŭn?”

²⁰ Kan ngara mbŭh ndŭg Jesus, ngara nang, “John Pembaptisa pait kieh da siken, yŭh kah dŭh Kaam ati sianŭ adi-i nang re mandŭg, puan kah kieh babŭ kajŭn adi bŭkŭn.”

²¹ Di jam anŭ Jesus mbŭh pibua bagŭ daya so barang masam andam udar ka so roh roh arap, samŭn ngara adi karak Ayŭh mbŭh bada dapŭd kiris.

²² Ayŭh nam pinyisung pinyisung John, “Pari angān ka kidaan di John ani adi angān mbŭh kiris ka dingah: daya karak dapŭd kiris, daya bajang dapŭd panu, ngara adi naman andam kurit adi bisā dog pibisig, adi bangam dapŭd dingah, adi kabŭs dog pakat udip bauh, ka Agah Kana mbŭh dog nyuse di daya sirata.

²³ Sanang inŭh ngara adi dŭh kurang sabah di Aku!”

²⁴ Ripas pinyisung pinyisung John mbŭh bu, Jesus piguru minyu pasar ayŭh di bara daya: “Di andu angān matak ka yŭn John di tarun tana-pajam, ani anŭ adi angān an tingga? Dawŭn kupai miringe dog poh sabak?

²⁵ Ani anŭ raan ngan tingga? Daya nēn piraka grua? Daya adi nēn piraka grua ka adi udip darŭm sangŭn inŭh daya adi rŭŭ darŭm istana!

²⁶ Kidaan di Aku, angān matak an tingga ani? Ndi naan daya nabi? Sawŭ, pak angān mbŭh kiris adi rabis so nabi.

²⁷ Amai pasar John inŭh Surat-kudus nang: ‘Tapa nang, Aku re pait pinyisung Ku diŭ so Kuu da sidia aran yŭn Mu.’

²⁸ Aku kidaan di angān, di ong ati mating daya adi rabis bās so John Pembaptisa. Pak ayŭh adi siabo sŭ di dupan ngara adi kinyam Pinyipritah Tapa agi bās dŭ so John.”

²⁹ Sopŭrŭg daya samŭn bara pinsuke dingah Jesus nang kayuh anŭ. Ngara inŭh adi mbŭh tunda pinyiraan Tapa buang mbŭh kambat Baptisa John.

³⁰ Pak bara daya Pharisee ka bara gurū Ukum-adat Jahudi tirawan pinyiraan Tapa buang abah dog baptisa John.

³¹ Jesus nang, “Ani meh re Ku bisa ngga awing daya jaman ati? Keya ka ani ngara?

³² Ngara mbŭh keya ka anak-anya adi guru di passar. Ndi tibaran nyirais nang di tibaran anŭ ndi, ‘Kieh main ragu sawan yŭn ngan, pak angān dŭh an bitanda! Kieh nang ragu puās, pak angān abah muās!’

³³ John Pembaptisa mandŭg, bipusa ka dŭh nok wain, ka angān nang, ‘Ayŭh dog mŭrŭt umot!’

³⁴ Anak Manusia mandŭg, Ayŭh man nok, ka angān nang, ‘Tingga daya ati! Ayŭh pirusong buang pimabuk, bidingan ngga daya pinsuke ka daya adi dog tirawan!’

³⁵ Sunggu mŭnŭ, pinyibijak Tapa agi tatŭng sawŭ di pingandai ngara adi trima pinyibijak anŭ.”

Jesus di Ramin Simon daya Pharisee

³⁶ Ndi naan daya Pharisee mite Jesus biruman ngga adŭp-i. Jesus di ka ramin-i ka guru man.

³⁷ Di kupo anŭ agi ndi naan dayung adi udip darŭm dosa. Ayŭh dingah Jesus agi man di ramin daya Pharisee anŭ, ka-i mandŭg taban gabuk alabasta puno ngga inyo wangi

³⁸ ka mijog di punok Jesus, tura ka kaja-I, sien buang misa kaja-I ngga randang batŭh-i. Komŭnŭ ayŭh nyibadŭh kaja-I ngga ubok-i, sium-i, ka susen wangi anŭ dieh.

³⁹ Kan daya Pharisee anŭ kiris, ayŭh nang darŭm asŭng-i, “Kambŭi daya ati sawŭ nabi, Ayŭh tatu puan asi dayung anŭ adi tama Ayŭh; Ayŭh tatu puan nang dayung anŭ dayung adi bidosa!”

⁴⁰ Jesus nang di ayŭh, “Simon, agi kayuh an Ku nang di kuu.” “Ani, Gurū,” ayŭh nang, “kidaan di aku.”

⁴¹ “Agi duwŭh naan daya birutang duit di ndi naan daya adi yŭn daya nginjam duit. Ndi naan nginjam rimŭh ratus kiping duit pirak, ka sianŭ ndi nginjam rimŭh puru.

⁴² So-duwŭh ngara dŭh tungang bayar pari, jadi ayŭh kambŭt adŭ utang ngara. Aki ndi so ngara duwŭh meh, adi rabis dŭ rindu ayŭh?”

⁴³ “Jaka ku,” Simon nam, “ayŭh adi baga dŭ utang.” “Batur pinyinam mu,” Jesus nang.

⁴⁴ Komŭnŭ Ayŭh bigiring nura dayung anŭ ka nang di Simon, “Kiris mu kah dayung ati? Aku mŭrŭt ramin mu, ka kuu mating nggen piin ngga ngu kaja Ku, pak ayŭh mbŭh ngu kaja Ku ngga randang batŭh-i ka nyibadŭh-i ngga ubok-i.

⁴⁵ Kuu mating kambat Aku ngga sium, pak ayŭh, so Aku mŭrŭt, dŭh ko ko sium kaja Ku.

⁴⁶ Kuu mating nginyo ubak ku ngga inyo kanā, pak ayŭh mbŭh nginyo kaja Ku ngga wangi.

⁴⁷ Aku nang di kuu, pinyirindu bās adi-i kiren mbŭh kiren dosa-i adi bagŭ mbŭh dog apun. Pak asi asi adi dog apun nisŭ taŭn-i kiren nisŭ pinyirindu.”

⁴⁸ Ka Jesus nang di dayung anŭ, “Dosa mu mbŭh dog apun.”

⁴⁹ Ngara adi sua guru man ngga Jesus piguru nang dupan adŭp-i, “Asi daya ati, dosa apun-I gŭh?”

⁵⁰ Pak Jesus nang di dayung anŭ, “Amai kuu sabah di Aku, kuu mbŭh dog nyiramat. Panu meh darŭm damai.”