LUKE 6 - Hakcipta - Biatah Bidayuh

Pinyiken Pasar Andu Sabbath

¹ Di andu Sabbath, darŭm Jesus panu mutas teya gandom, murid murid-I kutas tundun gandom, gisik-i di tangan ka man.

² Kada daya Pharisee siken, “Mani angān ndai kayuh adi Ukum-adat ta nagah ata ndai di andu Sabbath?”

³ Jesus nam ngara, “Bŭn kah angān basa pasar kayuh adi David ndai kan ayŭh ngga bara dingan-i sibŭrŭk?

⁴ Ayŭh mŭrŭt ka darŭm ramin Tapa, mbit ruti adi mbŭh dog jugan ka Tapa, man-i, ka nggen-i gŭh di bara dingan-i. Pŭn-i rawan Ukum-adat ta kambŭi daya bŭkŭn man-i, adŭ-i adŭp bara imam.”

⁵ Ka Jesus nang, “Anak Manusia biyŭn kuasa di tunduh andu Sabbath.”

Daya adi Mabŭs Tangan-i

⁶ Di andu Sabbath anŭ ndi, Jesus di ka ramin simayang-Jahudi ka ngajar. Diginŭ agi ndi naan daya adi mabŭs tangan tauh-i.

⁷ Kada gurū Ukum-adat Jahudi samŭn kada daya Pharisee, jiroh aran an nyarah Jesus, agi nakit nyibatŭh Ayŭh an puan re-I pibua kah dŭh daya di andu Sabbath.

⁸ Pak Jesus puan pikir-kira ngara ka nang di daya anŭ, “Makat, mandŭg kamati ka jawin.” Daya anŭ makat ka mijog diginŭ.

⁹ Ka Jesus nang di ngara, “Aku siken angān: Kayuh ani adi Ukum-adat ta bada ata ndai di andu Sabbath? Turung daya kah kandam daya? Nyiramat asŭng daya kah kinanyap asŭng daya?”

¹⁰ Ayŭh tingga sopŭrŭg ngara bait tauh; ka Ayŭh nang di daya anŭ, “Ton tangan mu.” Ayŭh ton tangan-i, ka tangan-i rasu pari bua.

¹¹ Ngara mbŭh raru baji ka rasu kirakar dupan adŭp-i pasar simuki ngara re ngga Jesus.

Jesus Mien Simŭng-Duwŭh naan Pinyuruh

¹² Di tika anŭ Jesus maad ndi sandah an simayang, ka diginŭ Ayŭh bidua ka Tapa ndi ngarŭm ngarŭm.

¹³ Kan andu mbŭh jawa, Ayŭh bagan bara murid-I ka mien simŭng-duwŭh naan ngara adi-I kadŭn pinyuruh:

¹⁴ Simon (adi-I kadŭn Peter) ngga jurud-i Andrew; James ngga John, Philip ngga Bartholomew,

¹⁵ Matthew ngga Thomas, James anak Alphaeus, ka Simon (adi dog kadŭn Patriotik),

¹⁶ Judas anak James, ka Judas Iscariot, adi jua Jesus.

Jesus Ngajar ka Pibua daya

¹⁷ Kan Jesus mbŭh mūn so sandah anŭ ngga bara pinyuruh, Ayŭh mijog di tarun adi rata ngga bara bara murid-I. Bara daya bagŭ mbŭh agi diginŭ so ndi tarun tana Judea ka so Jerusalem ka so Tyre ngga Sidon kupo adi di tabing rawŭt.

¹⁸ Ngara mandŭg an dingah Ayŭh buang an dapŭd bua so andam. Ngara adi dog mito roh arap agi gŭh mandŭg ka dog pibua.

¹⁹ Sopŭrŭg daya suba an tama Ayŭh, amai kuasa agi ruah so Ayŭh ka pibua sopŭrŭg ngara.

Sanang ngga Susah

²⁰ Jesus tingga bara murid-I ka nang, “Sanang inŭh angān adi sirata, amai angān kinyam Pinyipritah Tapa!

²¹ Sanang inŭh angān adi sikirau madin, amai angān re bisoh! Sanang inŭh angān adi muās madin, amai angān re tawŭh!

²² “Sanang inŭh angān kan daya tiru di angān, tirawan angān, pimangŭh angān, ka kinarap angān, sitagar Anak Manusia!

²³ Gaŭn meh kan kayuh anŭ jadi, buang bitanda ka pawŭn, sabab upah bās agi dog sidia yŭn ngan di shorga. Amai tayung-babuk ngara ko ndai simŭnŭ gŭh di bara nabi.

²⁴ “Pak payah inŭh angān adi kaya madin, amai angān mbŭh udip gaŭn madin!

²⁵ Payah inŭh angān adi bisoh madin, amai angān re sibŭrŭk! Payah inŭh angān adi tawŭh madin, amai angān re ngurid ka muās!

²⁶ “Payah inŭh angān kambŭi sopŭrŭg daya nganju angān, amai tayung-babuk ngara mbŭh nang sakanŭ gŭh pasar bara nabi kadong.

Rindu Pinganyu

²⁷ “Pak Aku nang di angān adi dingah Aku: Rindu pinganyu ngan, ndai kana di ngara adi tiru di angān.

²⁸ Nyiberkat daya adi mangu angān, ka simayang yŭn ngara adi kandam angān.

²⁹ Kambŭi daya napar angān di panding, ton anŭ ndi; kambŭi agi daya tambit jipo-tabar ngan, dŭhnyah gŭh bitan jipo ngan.

³⁰ Nggen di daya adi mite, ka kan daya tambit kayuh ngan, dŭhnyah mite pari kayuh anŭ.

³¹ Ndai di daya kayuh anŭ adi angān raan daya ndai di angān.

³² “Kambŭi angān rindu daya adi rindu angān adŭ, ani utung ngan? Amai daya bidosa rindu gŭh daya adi rindu ngara!

³³ Ka kambŭi angān ndai kana di ngara adi ndai kana di angān adŭ, ani utung ngan? Amai daya bidosa ndai gŭh simŭnŭ!

³⁴ Ka kambŭi angān nginjam adŭ-i di ngara adi so angān harap adŭp ngan re dapŭd-i pari, ani utung ngan. Amai daya bidosa nginjam gŭh di daya bidosa, an dapŭd sikiang-i pari!

³⁵ Dŭh-i simŭnŭ! Rindu pinganyu ngan ka ndai kana di ngara; nginjam buang dŭhsah kira gati. Simŭnŭ, angān re biyŭn upah bās, buang re jadi anak Tapa adi Sambu Sopŭrŭg. Amai Ayŭh kana ngga daya adi dŭh rada budi, samŭn ngara adi ginaka.

³⁶ Kiren masi nimun Sama ngan Kiren masi.

Nyarah Daya

³⁷ “Dŭhnyah nyarah daya, ka Tapa dŭh re nyarah angān; dŭhnyah nunggu daya, ka Tapa dŭh re nunggu angān; apun daya, ka Tapa re apun angān.

³⁸ Nggen di daya, ka Tapa re nggen di angān. Sawŭ, angān re kambat takar adi sukup kana, dog nyinjŭn, dog ngugoh, ndŭg ka babas di kŭkŭn ngan. Takar adi angān pakai di daya inŭh takar adi Tapa re pakai di angān.”

³⁹ Ka Jesus nyidundan upama ati di ngara: “Bisa kah daya karak kayak daya karak? Dŭh kah so-duwŭh ngara re rabu ka darŭm parit?

⁴⁰ Mating murid re rabis bās so gurū-i; pak sopŭrŭg murid, kan mbŭh abo birajar re mun gurū-i.

⁴¹ “Mani angān truti taŭn di batŭh dingan ngan, pak dŭh rada apŭg kayuh di batŭh adŭp ngan?

⁴² Simuki meh angān re bisa nang di dingan ngan, ‘Bah, bada aku kadi taŭn so batŭh mu,’ pak dŭh rada apŭg kayuh di batŭh adŭp ngan? Angān pingadong! Diŭ kadi apŭg kayuh so batŭh adŭp ngan, komŭnŭ angān bisa granan kiris ka kadi taŭn adi di batŭh dingan ngan.

Tŭngŭn Kayuh ngga Buwa-I

⁴³ “Tŭngŭn kayuh adi kana dŭh re buān buwa adi arap; dŭh gŭh tŭngŭn kayuh adi arap re buān buwa adi kana.

⁴⁴ Sopŭrŭg tŭngŭn kayuh dog puan so buwa-i. Angān dŭh sun buwa ara so tŭngŭn reja, puan kah sun buwa anggor so tŭngŭn bikaram.

⁴⁵ Daya adi kana pijadi kayuh kana so atin-i adi puno ngga kayuh kana; daya adi arap pijadi kayuh arap so atin-i adi puno ngga kayuh arap. Amai so isi atin-i baba minyu.

Duwŭh Naan Tukang Ramin

⁴⁶ “Mani meh angān bagan Aku, ‘Tuhan, Tuhan,’ pak dŭh ndai kayuh adi Aku bada angān ndai?

⁴⁷ Daya adi mandŭg ka Aku ka dingah pinganang Ku ka tunda-i, Aku bisa awing ayŭh simuti:

⁴⁸ Ayŭh agi keya ka daya adi, darŭm-i piramin, kareh tŭrŭp ka na pinagap-rasan di tunduh batuh. Ka kan uba mandŭg ka nyasar ramin anŭ ayŭh dŭh bigugoh, sabab-i mbŭh nakit dog pijog.

⁴⁹ Pak ayŭh adi dingah pinganang Ku ka dŭh tunda-i agi keya ka daya adi piramin dŭh juman pinagap-rasan; kan uba mandŭg ka nyasar ramin anŭ ayŭh rasu tumbang, ka birasa inŭh pinyitumbang-i!”