LUKE 21 - Hakcipta - Biatah Bidayuh

Pinganggen Dayung Uban

¹ Jesus tingga bait tauh-I ka kiris daya kaya na duit ngara darŭm pati duit Ramin Tuhan.

² Ka-I kiris gŭh ndi naan dayung uban adi sirata na jangi duwŭh kiping duit timaga.

³ Ayŭh nang, “Aku kidaan di angān, dayung uban adi sirata ati agi na bagŭ dŭ so ngara adi bŭkŭn.

⁴ Amai ngara adi bŭkŭn mbŭh jugan pinganggen ngara so ka rabis pinyikaya ngara; pak ayŭh, adi taŭn sirata, mbŭh nggen kaŭs anŭ adi-i biyŭn.”

Jesus Minyu Pasar Pinyirubuh Ramin Tuhan

⁵ Kada so bara murid minyu pasar Ramin Tuhan, munki masam ramus-i dog ngabuh ngga batuh batuh adi grua, ka ngga sopŭrŭg pinganggen adi daya jugan ka Tapa. Jesus nang,

⁶ “Sopŭrŭg-i angān kiris, pak andu-i re mandŭg kan ndi batuh-i dŭh gŭh re dŭm di yŭn-i bisandug. Sopŭrŭg-i re rubuh.”

Pinyusah ngga Pinyikisiis

⁷ “Gurū,” ngara nang, “sinde kayuh ati re jadi? Ka ani re jadi tandā-i kan kayuh ati mbŭh re an tambus.”

⁸ Jesus nang, “Jaga meh adŭp ngan; dŭhnyah udah tiyur. Bagŭ daya, pakai adŭn Ku, re mandŭg ka nang, ‘Aku ati Ayŭh!’ ka, ‘Tipuh mbŭh mandŭg!’ Pak dŭhnyah tunda ngara.

⁹ Dŭhnyah taru kan angān dingah agah pasar perang ka pito; kayuh adi mun anŭ dŭh siŭn dŭh an diŭ tambus, pak dŭh sirati-i andu sikasŭn mbŭh sindŭk.”

¹⁰ Ayŭh pijuu nang, “Bangsa re makat rawan bangsa bŭkŭn, ka pritah re nyerang pritah bŭkŭn.

¹¹ Ka re agi tana bana bigugoh, apag ka susah-bās di barang yŭn. Kayuh saruh buang adi pitaru re agi mandŭg so rangit.

¹² Pak diŭ so sigara kayuh ati tambus, angān re dog nakap ka dog kisiis; angān re dog dawa di ramin simayang-Jahudi ka dog na darŭm jer; angān re dog taban ka sirung jawin raja ngga pinguasa sitagar adŭn Ku.

¹³ Ati inŭh pluang ngan piagah Agah Kana.

¹⁴ Dŭhnyah gapang pasar sakaki angān re minyu nyibandar adŭp ngan,

¹⁵ sabab Aku re nggen di angān bang bang piminyu samŭn pinyibijak adi pinganyu ngan dŭh tungang rawan bait matah.

¹⁶ Angān re dog jua pimas ngan, jurud ngan, madis ngan, ka dingan ngan; ka kada so angān re dog ukum kabŭs.

¹⁷ Sopŭrŭg daya re tiru di angān sabab Aku.

¹⁸ Pak ndi sirah ubok di ubak ngan dŭh re manyap.

¹⁹ Bada atin ngan tagap, ka angān re siramat.

Jesus Minyu pasar Pinyirubuh Jerusalem

²⁰ “Kan angān kiris Jerusalem dog kirurung pinganyu, nganŭ angān re puan nang dŭm dŭh tui ayŭh re rubuh.

²¹ Nganŭ ngara adi di Judea dŭh siŭn dŭh babak ka tarun tana darŭd; ngara adi darŭm kupo dŭh siŭn dŭh bu, ka ngara adi di sapa kupo dŭh siŭn mŭrŭt kupo.

²² Amai anŭ inŭh ‘Tipuh Ukum,’ ngga bada sopŭrŭg pinganang Surat-kudus jadi bitŭtŭk.

²³ Raru payah-i di tipuh anŭ yŭn bara dayung adi bite ka bara sindŭ adi mira sŭ! Pinyusah bās re mandŭg ka rais ati, ka ukum Tapa re nyatŭk bangsa ati.

²⁴ Kada re dog siŭ ngga pedang, ka adi bŭkŭn re dog taban bu jadi daya-takap ka rais daya bŭkŭn. Ka daya adi dŭh bangsa Jahudi re digang Jerusalem ndŭg ka tipuh ngara mbŭh ripuan.

Pimandŭg Anak Manusia

²⁵ “Re agi kayuh saruh jadi di batŭh andu, di buran, ka di bitang. Sopŭrŭg bangsa di ndi ong ong re taru da jawŭn girumbang ka passang bās, ka ngara dŭh puan ani re ngara ndai.

²⁶ Daya re mijŭp sabab taru darŭm ngara kajŭn kayuh adi re nyatŭk ong, amai kuasa di rangit re dog ngugoh.

²⁷ Nganŭ Anak Manusia re nandŭng, mandŭg darŭm abun ngga kuasa bās ka bragah.

²⁸ Kan sopŭrŭg kayuh anŭ piguru, angān mijog ka nyigura ka rangit, sabab dŭm dŭh tui angān re dog nyiramat.”

Ajar so tŭngŭn Ara

²⁹ Ka Jesus nyidundan upama ati di ngara: “Suba kira tŭngŭn ara ka sopŭrŭg tŭngŭn kayuh adi bŭkŭn.

³⁰ Kan angān kiris-i prisok, angān puan nang tipuh paras mbŭh sindŭk.

³¹ Simŭnŭ gŭh, kan angān kiris kayuh ati jadi, angān re puan nang Tapa re rikas mritah.

³² “Ingat nŭh, sopŭrŭg kayuh ati re jadi diŭ so manusia adi udip madin mbŭh abo kabŭs.

³³ Rangit ngga ong re mungan, pak pinganang Ku dŭh re manyap.”

Dŭh Siŭn Dŭh an Bijaga

³⁴ “Jaga adŭp ngan! Dŭhnyah bada adŭp ngan sayŭp da gawai, da birunok, ka da atin ngingen di pimudip ong, te andu anŭ gŭgŭh mandŭg ka angān

³⁵ mun pirakap rai-i. Amai andu anŭ re mandŭg ka sopŭrŭg daya di barang yŭn di ong ati.

³⁶ Bijaga meh ka ari simayang isa angān bake buang siramat darŭm nura sopŭrŭg kayuh anŭ adi re tambus; ka angān meh re dapŭd mijog di sirung jawin Anak Manusia.”

³⁷ Jesus ngajar di Ramin Tuhan barang andu, ka ngga singumi andu, Ayŭh matak di nyirŭmŭn di Sandah Kanā.

³⁸ Barang isan sopŭrŭg daya di ka Ramin Tuhan an dingah Ayŭh ngajar.