LUKE 2 - Hakcipta - Biatah Bidayuh

Pinyibranak Jesus Kristus

¹ Di tipuh anŭ, Caesar Augustus nggen ukum bada pimirang dog ndai di ndi tarun tana Empaya Rome.

² Kan pimirang ati adi sibungas-i dog ndai, Quirinius jadi gabenor di Syria.

³ Barang naan daya mandŭg ka kupo adŭp-i di nggen dŭn-i.

⁴ Joseph mandŭg so kupo Nazareth di Galilee ka kupo Bethlehem di Judea, tarun yŭn pinyibranak Raja David. Joseph di kamanŭ sabab ayŭh sesang David.

⁵ Ayŭh mandŭg di nggen dŭn-i samŭn dŭn Mary adi tunang-i. Mary mbŭh bite,

⁶ ka sitadŭn ngara di Bethlehem, tipuh adi ngga-i biranak mbŭh mandŭg.

⁷ Ayŭh biranak anak pinuai dari, madung-I ngga banang, ka piguring-I darŭm durang dāng, amai mating tia birit yŭn ngara di ramin nupang.

Bara Pingingat-Biri ngga bara Malaikat

⁸ Agi kada pingingat-biri di sapa tarun tura kamanŭ, nyirŭmŭn di sapa tarun di tana kingat kaban biri.

⁹ Malaikat Tuhan nandŭng di ngara, ka bragah Tuhan nyekar ngara. Ngara mbŭh raru taru,

¹⁰ pak malaikat anŭ nang di ngara, “Dŭhnyah taru! Aku mandŭg taban agah kana ka angān, agah gaŭn ginanyŭn yŭn sopŭrŭg daya.

¹¹ Di andu ati darŭm Kupo David, Pinyikudip ngan mbŭh dog biranak, Kristus adi Tuhan!

¹² Ati inŭh tandā-i: angān re dapŭd sipira dog madung guring darŭm durang dāng.”

¹³ Ka gŭgŭh agi tatŭng ngga malaikat anŭ bara malaikat adi bŭkŭn so shorga, nyanyi muji Tapa:

¹⁴ “Bragah ka Tapa di rangit siabo bigatung ka damai di ong yŭn ngara adi pimunos asŭng-I!”

¹⁵ Kan bara malaikat anŭ bu so yŭn ngara pari ka shorga, bara pingingat-biri nang dupan adŭp-i, “Ja ata di ka Bethlehem ka tingga kayuh anŭ adi mbŭh jadi, adi Tuhan mbŭh kidaan di ata.”

¹⁶ Jadi ngara bigaut panu ka dapŭd Mary ngga Joseph ka kiris sipira anŭ guring darŭm durang dāng.

¹⁷ Kan bara pingingat-biri kiris Ayŭh, ngara kidaan di ngara adi agi diginŭ kayuh adi malaikat ko kidaan di ngara pasar sipira anŭ.

¹⁸ Sopŭrŭg adi dingah mbŭh inga inga di kayuh adi bara pingingat-biri nang.

¹⁹ Mary ingat sopŭrŭg kayuh anŭ ka bandar bipikir pasar-i darŭm asŭng-i.

²⁰ Bara pingingat-biri pari ka yŭn adŭp ngara, biragu muji Tapa amai sopŭrŭg kayuh adi ngara mbŭh dingah ka kiris. Kayuh anŭ mbŭh jadi nimun adi malaikat ko kidaan di ngara.

Jesus Dog Nggen Dŭn

²¹ Ndi Minggu ripas anŭ, di andu Ayŭh dog nyunat, Ayŭh dog kadŭn Jesus, dŭn adi malaikat ko nggen di Ayŭh sibayuh sindŭ-I bite Ayŭh.

Jesus Dog Taban ka Ramin Tuhan

²² Tipuh mbŭh mandŭg adi ngga Joseph ngga Mary sita adat pibisig, nanyam adi ko Ukum-adat Moses pesan. Jadi ngara taban anak anŭ ka Jerusalem an nyerah Ayŭh ka Tuhan,

²³ nimun adi mbŭh dog nuris darŭm ukum-adat Tuhan: “Barang naan anak pinuai dari an dog nyerah ka Tuhan.”

²⁴ Ngara jugan gŭh sadis nanyam adi dog miratak ukum-adat Tuhan, ndi pasang manuk tikukur puan kah ndi pasang anak manuk asang.

²⁵ Di tika anŭ agi ndi naan daya dŭn Simeon rŭŭ di Jerusalem. Ayŭh daya adi kana, tŭnggŭn buang kajŭn Israel dog nyiramat. Roh Kudus agi ngga ayŭh

²⁶ ka mbŭh kidaan di ayŭh nang ayŭh dŭh re kabŭs sibayuh ayŭh kiris Kristus adi Tuhan ko janji.

²⁷ Ngga kuasa Roh Kudus, Simeon di ka Ramin Tuhan. Kan pimas Jesus taban Ayŭh ka darŭm Ramin Tuhan an ndai yŭn-I nanyam adi dog miratak Ukum-adat,

²⁸ Simeon tambit puko anak anŭ ka nggen trima kaseh di Tapa:

²⁹ “Tuhan, Kaam mbŭh ingat janji Mai, ka pirupas meh madin urun Mai darŭm damai.

³⁰ Ngga batŭh adŭp ku aku mbŭh kiris Ayŭh adi nyiramat mandŭg so Kaam,

³¹ adi Kaam mbŭh sidia di sirung jawin sopŭrŭg bangsa:

³² Jawa adi kiren pinyiraan Mai di daya bangsa bŭkŭn ka taban bragah ka daya Mai Israel.”

³³ Sindŭ Sama Anak anŭ mbŭh inga inga di kayuh adi Simeon nang pasar Ayŭh.

³⁴ Simeon nyiberkat ngara ka nang di Mary, sindŭ-I, “Anak ati mbŭh Tapa mien da pirabur ka nyiramat bagŭ daya di Israel. Ayŭh re jadi tandā so Tapa adi bagŭ daya re nyakar,

³⁵ pak re pinandŭng pikir-kira ngara, adi bisukan. Ka pinyusah, keya ka pedang adi reja, re tabŭk atin mu.”

^36-37 Agi ndi naan nyamba dayung nabi, adi mbŭh uban, dŭn Anna, anak Phanuel so tibaran-asar Asher. Ayŭh banan ka rŭŭ ngga banŭh-i batur ju sawa adŭ; madin ayŭh mbŭh mai puru-pat sawa umbur-i. Ayŭh bŭn bu so Ramin Tuhan; sandu singarŭm ayŭh nyambah Tapa, bipusa buang simayang.

³⁸ Di jam anŭ ayŭh mandŭg ka nggen trima kaseh di Tapa, ka minyu pasar Anak anŭ di sopŭrŭg ngara adi kajŭn Tapa pirupas Jerusalem.

Pari ka Nazareth

³⁹ Kan Joseph ngga Mary muko ndai sopŭrŭg kayuh nunda ka ukum-adat Tuhan, ngara pari ka kupo adŭp ngara Nazareth di Galilee.

⁴⁰ Anak anŭ makin baga buang bitambah bake; Ayŭh puno ngga pinyibijak, buang berkat Tapa agi ngga Ayŭh.

Jesus di Ramin Tuhan

⁴¹ Barang sawa pimas Jesus di ka Jerusalem, sua sita Gawai Paska.

⁴² Kan Jesus mbŭh simŭng-duwŭh sawa umbur-I, nimun kanyet-i ngara di ka gawai anŭ.

⁴³ Kan gawai mbŭh abo, ngara mari, pak Anak anŭ, Jesus, babŭ di Jerusalem. Pimas-I dŭh rada.

⁴⁴ Ngara pikir Ayŭh agi di uruk daya, jadi ngara panu dang ndi andu; pak komŭnŭ piguru jiroh Ayŭh di dupan bara madis ka bara jerā-I.

⁴⁵ Dŭh tungang dapŭd Ayŭh, ngara pari ka Jerusalem di jiroh Ayŭh.

⁴⁶ Andu adi taruh ngara dapŭd Ayŭh darŭm Ramin Tuhan, guru ngga bara gurū adat Jahudi, nyiringa buang nggen pinyiken di ngara.

⁴⁷ Sopŭrŭg adi dingah Ayŭh mbŭh inga inga di pinyipitar darŭm pinyinam-I.

⁴⁸ Pimas-I mbŭh inga inga kan ngara kiris Ayŭh, ka sindŭ-I nang di Ayŭh, “Nak, mani Kuu simuti ngga kieh? Kieh duwŭh sama Mu mbŭh bipito jiroh Kuu!”

⁴⁹ Ayŭh nam ngara, “Mani angān sah jiroh Aku? Dŭh kah angān puan Aku dŭh siŭn dŭh agi di Ramin Sama Ku?”

⁵⁰ Pak ngara dŭh mirati pinyinam-I.

⁵¹ Jadi Jesus pari ngga ngara ka Nazareth, di yŭn-I nundok di ngara. Sindŭ-I nyikŭn sopŭrŭg kayuh ati darŭm atin-i.

⁵² Jesus makin baga buang masang darŭm pinyibijak, dog rindu Tapa ngga manusia.