LUKE 19 - Hakcipta - Biatah Bidayuh

Jesus ngga Zacchaeus

¹ Jesus pijuu panu tambus Jericho buang radus so nŭ.

² Diginŭ agi pingubak pinsuke adi kaya, dŭn Zacchaeus.

³ Ayŭh raru raan kiris Jesus, pak sabab ajog-i rapat ka sabab bara daya bagŭ matŭn ayŭh, ayŭh dŭh tungang kiris Jesus.

⁴ Jadi ayŭh bikaduh ka jawin bara daya bagŭ ka jakŭh tŭngŭn kayuh sycomore an kiris Jesus, adi aŭn re murah so nŭ.

⁵ Kan Jesus mbŭh ndŭg tarun anŭ, Ayŭh nyigura ka nang di Zacchaeus, “Rikas mūn, Zacchaeus, sabab Aku dŭh siŭn dŭh nyandong ramin mu andu ati.”

⁶ Zacchaeus bigaut mūn ka ngga asŭng raru gaŭn ayŭh kambat Jesus.

⁷ Sopŭrŭg daya adi kiris piguru mingungut, “Daya ati mbŭh jadi pingabang di ramin daya bidosa!”

⁸ Zacchaeus mijog ka nang di Jesus, “Dingah tuan! Aku re nggen sitangah so buat-rata ku di daya sirata, ka kambŭi aku agi nipu tadŭ daya, aku re bayar ayŭh pari pat rupet.”

⁹ Jesus nang di ayŭh, “Andu ati Tapa mbŭh nyiramat kuu ngga rawang mu, sabab kuu ati gŭh mbŭh sesang Abraham.

¹⁰ Anak Manusia mbŭh mandŭg an jiroh ka nyiramat daya adi manyap.”

Upama Kiping Duit Mas

¹¹ Darŭm daya babŭ nyiringa Ayŭh, Jesus pijuu ka nyidundan ndi upama di ngara. Ayŭh madin mbŭh dŭh jo so Jerusalem, ka ngara pikir Tapa mbŭh re rikas mritah.

¹² Jadi Ayŭh nang, “Agi ndi naan daya adi bās pangkat-i matak ka rais adi jo yŭn dog garar jadi raja; ripas dog ndai simŭnŭ ayŭh taŭn re pari.

¹³ Diŭ so-i matak ayŭh bagan simŭng naan daya gaji-i ka nggen di barang naan ndi kiping duit mas ka nang, ‘Pakai ati ka jiroh tambah-i sitadŭn aku mating.’

¹⁴ Bara daya di rais-i tiru di ayŭh; ka kan ayŭh mbŭh panu ngara pait pinyisung da nang, ‘Kieh dŭh raan daya ati jadi raja ami.’

¹⁵ “Daya anŭ dog garar jadi raja ka rasu pari. Ayŭh rasu mritah bara daya gaji-i da bidapŭd ngga adŭp-i, an puan kiang-ki tambah duit mbŭh ngara pijadi.

¹⁶ Adi diŭ mandŭg ka nang, ‘Tuan, aku mbŭh pijadi simŭng kiping tambah duit mas so anŭ adi kaam ko nggen di aku.’

¹⁷ ‘Pandai kuu,’ ayŭh nang; ‘kuu inŭh daya-gaji adi kana! Amai kuu tŭtŭd ngga kayuh adi siit, aku re bada kuu jaga simŭng kupo.’

¹⁸ Adi duwŭh mandŭg ka nang, ‘Tuan, aku mbŭh pijadi rimŭh kiping tambah duit mas so anŭ adi ko mai nggen di aku.’

¹⁹ Di siati ayŭh nang, ‘Kuu re digŭng rimŭh kupo.’

²⁰ Sianŭ ndi mandŭg ka nang, ‘Tuan, ta ati duit mas mai; aku sukan-i darŭm pingutos tangan.

²¹ Aku taru di kaam, sabab kaam daya karas. Kaam tambit kayuh adi kaam dŭh dapu ka ngatŭm kayuh adi kaam dŭh purun.’

²² Raja nang di ayŭh, ‘Kuu daya-gaji adi arap! Aku re pakai pinganang adŭp mu ngga nunggu kuu! Kuu puan aku ati daya karas, tambit kayuh adi aku dŭh dapu ka ngatŭm kayuh adi aku dŭh purun.

²³ Mani meh garang, kuu dŭh na duit ku di yŭn daya bidagang duit? Ka aku bisa trima-i pari samŭn anak-i kan aku pari.’

²⁴ Komŭnŭ ayŭh nang di ngara adi agi mijog diginŭ, ‘Tambit duit mas anŭ so ayŭh ka nggen-i di daya-gaji adi biyŭn simŭng kiping.’

²⁵ Pak ngara nang di ayŭh, ‘Tuan, ayŭh mbŭh biyŭn simŭng kiping!’

²⁶ ‘Aku kidaan di angān,’ ayŭh nam, ‘di barang naan daya adi biyŭn, rabis bagŭ re dog nggen; pak ayŭh adi dŭh biyŭn ani ani, rapuh kayuh adi-i biyŭn re dog tambit gŭh so ayŭh.

²⁷ Mun pinganyu ku adi abah bada aku jadi raja ngara, taban ngara kamati ka siŭ ngara di sirung jawin ku!’ ”

Jesus Mŭrŭt Jerusalem

²⁸ Ripas Jesus ko minyu sakanŭ, Ayŭh pijuu panu di jawin ngara nuju Jerusalem.

²⁹ Kan Jesus mbŭh dŭ dŭ sindŭk Bethphage ngga Bethany di Sandah Kanā, Ayŭh bada duwŭh naan murid-I panu diŭ.

³⁰ Ayŭh nang di ngara, “Di ka anak kupo ajeh adi di jawin ngan; darŭm angān mŭrŭt, angān re dapŭd ndi anak kaldi dog nyirunggo adi bŭn daya nunggang. Kuka sirunggo-i ka taban-i kamati.

³¹ Kambŭi agi daya siken mani angān kuka sirunggo-i, kidaan di ayŭh nang Tuhan biguna dieh.”

³² Ngara panu ka dapŭd sopŭrŭg-i nimun adi Jesus ko kidaan di ngara.

³³ Darŭm ngara kuka sirunggo anak kaldi anŭ, ngara adi dapu-i nang di ngara, “Mani angān kuka sirunggo-i?”

³⁴ “Tuhan biguna dieh,” ngara nam,

³⁵ ka ngara taban anak kaldi anŭ ka Jesus. Komŭnŭ ngara na jipo ngara di tunduh dāng anŭ ka turung Jesus maad ka tunduh-i.

³⁶ Darŭm Ayŭh nunggang-i, daya mamad jipo ngara di aran.

³⁷ Kan Ayŭh mbŭh sindŭk Jerusalem, di aran adi mūn Sandah Kanā, bara bara murid-I piguru nggen trima kaseh di Tapa buang muji Ayŭh ngga sirŭŭn bana amai sopŭrŭg kayuh bās adi ngara ko kiris:

³⁸ “Tapa nyiberkat raja adi mandŭg ngga adŭn Tuhan! Damai di shorga ngga bragah ka Tapa!”

³⁹ Ka kada daya Pharisee di ruang bara daya bagŭ anŭ nang di Jesus. “Gurū, bada bara murid Mai pajam!”

⁴⁰ Jesus nam, “Aku kidaan di angān, kambŭi ngara pajam, batuh batuh ati re piguru nyirais.”

Jesus Muās Jerusalem

⁴¹ Ayŭh mbŭh sindŭk Jerusalem, ka kan Ayŭh kiris-i, Ayŭh muās-i

⁴² buang nang, “Kasi kah kambŭi kuu puan kayuh adi taban damai! Pak madin kuu dŭh tungang kiris-i!

⁴³ Tipuh-i re mandŭg kan pinganyu mu re kirurung ka nyikapung kuu di barang parad.

⁴⁴ Ngara re pirarap kuu samŭn bara daya mu adi darŭm kuu; ndi batuh dŭh gŭh ngara re tandah di yŭn-i, sabab kuu dŭh natŭng tika adi ngga Tapa mandŭg di nyiramat kuu!”

Jesus Mŭrŭt Ramin Tuhan

⁴⁵ Jesus mŭrŭt Ramin Tuhan ka piguru pibu ngara adi bidagang,

⁴⁶ nang-I di ngara, “Agi dog nuris darŭm Surat-kudus Tapa nang, ‘Ramin-Ku re dog kadŭn ramin simayang.’ Pak angān mbŭh bada-i jadi tarun yŭn pirupak bisukan!”

⁴⁷ Barang andu Jesus ngajar di Ramin Tuhan. Bara pingubak imam, gurū Ukum-adat Jahudi, samŭn pingibās bangsa Jahudi raan siŭ Ayŭh;

⁴⁸ pak ngara dŭh tungang ndai simŭnŭ, sabab sopŭrŭg daya taŭn dŭh adŭ masah dingah Ayŭh, dŭh an kabang ndi bang piminyu ani.