LUKE 18 - Hakcipta - Biatah Bidayuh

Upama Pasar ndi naan Dayung Uban ngga ndi naan Daya Akim

¹ Komŭnŭ Jesus nyidundan ndi upama di bara murid-I isa ngara siraru simayang ka dŭh jimŭ.

² “Di ndi kupo agi ndi naan akim adi dŭh taru Tapa ka dŭh gŭh piduri tadŭ daya.

³ Ka di kupo anŭ ndi naan dayung uban adi dŭh ko ko mandŭg tudu ayŭh, mite ayŭh turung adŭp-i di har-i. ‘Turung aku rawan pinganyu ku!’ ayŭh nang.

⁴ Mbŭh tui akim anŭ dŭh an ndai ani ani, pak sikasŭn-i ayŭh nang darŭm asŭng-i, ‘Sunggu aku dŭh taru Tapa bait kah piduri daya,

⁵ pak sabab dayung ati dŭh ko ko mito aku, aku re turung adŭ ayŭh di har-i. Kambŭi dŭh ayŭh re adu adu mandŭg, nyusah aku!’ ”

⁶ Ka Tuhan nang, “Dingah nŭh kayuh adi akim anŭ adi arap nang.

⁷ Dŭh kah meh Tapa re an turung daya-I adi dŭh ko ko mite turung so Ayŭh sandu singarŭm? Re sais kah Ayŭh turung ngara?

⁸ Aku kidaan di angān, Ayŭh re bigaut turung ngara. Pak re Anak Manusia dapŭd kah dŭh daya adi sabah di adŭp-I kan Ayŭh mandŭg?”

Upama pasar Daya Pharisee ngga Daya Pinsuke

⁹ Jesus nyidundan upama ati gŭh di ngara adi pikir adŭp-i kana ka ngamun daya bŭkŭn.

¹⁰ “Agi ndi sidah, duwŭh naan daya mandŭg ka Ramin Tuhan an simayang: ndi naan daya Pharisee, ka ndi naan daya pinsuke.

¹¹ Daya Pharisee anŭ mijog sadi-i ka bidua, ‘Aku nggen trima kaseh di Kaam, Tapa, sabab aku dŭh tama, dŭh pinipu, puan kah pinanggah, mun daya bŭkŭn. Aku nggen trima kaseh di Kaam amai aku dŭh mun daya pinsuke ajeh.

¹² Aku bipusa piduwŭh kari darŭm ndi minggu, ka aku jugan ka Kaam ndi utung darŭm simŭng so pinyidapŭd ku.’

¹³ Pak daya pinsuke anŭ mijog jo, dŭh-i an nyigura ka rangit, pak nupap sudo-i ka nang, ‘Tapa, masi di aku daya bidosa!’

¹⁴ Aku kidaan di angān,” Jesus nang, “daya pinsuke anŭ, dŭh-i daya Pharisee anŭ, adi dog trima Tapa kan-i maad ka ramin-i. Amai daya adi katuh adŭp-i re dog pirapat, ka daya adi pirapat adŭp-i re dog katuh.”

Jesus Nyiberkat bara Anak-Sŭ

¹⁵ Kada daya taban bara anak-sŭ ngara ka yŭn Jesus, isa Ayŭh nyiberkat ngara. Bara murid Jesus kiris ka tuas di ngara ndai simŭnŭ,

¹⁶ pak Jesus bagan bara anak-sŭ anŭ ka yŭn adŭp-I buang nang, “Bada bara anak-sŭ anŭ mandŭg ka Aku ka dŭhnyah kijaman ngara, sabab daya adi keya ka ngara inŭh adi kinyam Pinyipritah Tapa.

¹⁷ Ingat ati! Asi asi adi dŭh trima Pinyipritah Tapa mun anak-sŭ dŭh-i bisa kinyam-i.”

Daya Kaya

¹⁸ Ndi naan pinguru daya Jahudi siken Jesus, “Gurū adi kana, ani patut aku ndai ngga dapŭd udip adi sawŭ adi tan adu adu?”

¹⁹ “Mani kuu nang Aku kana?” Jesus siken ayŭh. “Mating daya kana, adŭ-i Tapa sadi adŭ.

²⁰ Kuu puan Pinyipesan Tapa: ‘Dŭhnyah tanggah; dŭhnyah siŭ daya; dŭhnyah naku; dŭhnyah nggen taksi kadong pasar tadŭ daya; stabi di sindŭ sama mu.’ ”

²¹ Daya anŭ nam, “So aku gi-sŭ, aku tunda sopŭrŭg Pinyipesan anŭ.”

²² Kan Jesus dingah sakanŭ, Ayŭh nang di ayŭh, “Dŭm ndi kayuh adi patut kuu ndai. Jua sopŭrŭg kayuh adi kuu biyŭn ka nggen duit anŭ di daya sirata, ka kuu re dapŭd buat-rata di shorga; ko ndai simŭnŭ, kuu bisa tunda Aku.”

²³ Pak kan daya anŭ dingah sakanŭ, ayŭh mbŭh raru susah, sabab ayŭh raru kaya.

²⁴ Jesus kiris ayŭh susah ka-I nang, “Mbŭh raru mbar inŭh daya kaya kinyam Pinyipritah Tapa!

²⁵ Mbŭh udah dŭ inŭh ndi onta mŭrŭt tambus rubang utos, so daya kaya kinyam Pinyipritah Tapa.”

²⁶ Ngara adi dingah Ayŭh, siken, “Asi meh garang, bisa dog nyiramat?”

²⁷ Jesus nam, “Kayuh adi dŭh bisa jadi so ka manusia bisa jadi so ka Tapa.”

²⁸ Ka Peter nang, “Tingga! Kieh mbŭh tingge ramin arŭn ami, ramŭn an tunda Kaam.”

²⁹ “Sawŭ,” Jesus nang di ngara, “Ka sabah meh, daya adi tingge ramin arŭn-i puan kah sawŭn-i, puan kah jurud-i, puan kah pimas-i, puan kah anak-i sitagar Pinyipritah Tapa,

³⁰ re kambat rabis bagŭ-i di jaman ati ngga udip adi sawŭ adi tan adu adu di jaman adi re mandŭg.”

Adi Pitaruh Saba Jesus Kidaan pasar Pinyikabŭs-I

³¹ Jesus taban ka adŭp-I simŭng-duwŭh naan murid-I ka nang di ngara, “Dingah ati! Ata re di ka Jerusalem di yŭn sopŭrŭg kayuh adi nabi nabi ko nuris pasar Anak Manusia re jadi bitŭtŭk.

³² Ayŭh re dog nyerah ka darŭm tangan daya adi dŭh bangsa Jahudi, adi re napat Ayŭh, pimangŭh Ayŭh, ka nyiruja Ayŭh.

³³ Ngara re madŭs Ayŭh ka siŭ Ayŭh, pak taruh andu ripas anŭ Ayŭh re makat udip bauh.”

³⁴ Pak bara murid-I mbŭh dŭh adŭ mirati sopŭrŭg kayuh adi nang-I; rati pinganang-I anŭ mbŭh dog sukan so ngara, ka ngara dŭh puan pasar ani Jesus minyu.

Jesus Pibua ndi naan Pigambis adi Karak

³⁵ Darŭm Jesus mbŭh re ndŭg Jericho, agi ndi naan daya karak guru di bŭngŭn aran, mite sidakah.

³⁶ Kan ayŭh dingah bara daya bagŭ murah, ayŭh siken, “Ani anŭ?”

³⁷ “Jesus so Nazareth agi murah,” ngara kidaan di ayŭh.

³⁸ Ayŭh bana bagan, “Jesus! Anak David! Masi di aku!”

³⁹ Ngara di jawin nang ayŭh ka bada ayŭh pirŭŭ adŭp-i. Pak ayŭh nyirais rabis bana-i, “Anak David! Masi di aku!”

⁴⁰ Jesus rŭŭ ka mite daya karak anŭ dog taban ka yŭn adŭp-I. Kan ayŭh mbŭh mandŭg sindŭk, Jesus siken ayŭh,

⁴¹ “Ani raan mu Aku ndai yŭn mu?” “Tuan,” ayŭh nam, “Aku raan kiris tarun dinge.”

⁴² Jesus nang di ayŭh, “Kiris meh garang! Amai kuu sabah di Aku, kuu mbŭh bua.”

⁴³ Jam anŭ gŭh ayŭh dapŭd kiris, ka-i tunda Jesus, buang-i nggen trima kaseh di Tapa. Kan bara daya bagŭ kiris kayuh adi mbŭh jadi, ngara sopŭrŭg muji Tapa.