LUKE 14 - Hakcipta - Biatah Bidayuh

Jesus Pibua ndi naan Daya adi Birandam

¹ Di ndi andu Sabbath Jesus di man di ramin ndi naan daya Pharisee adi traŭn darŭm pangkat; ka bara daya nakit nyibatŭh Ayŭh.

² Ndi naan daya adi bakak kaja tangan-i mandŭg tudu Jesus.

³ Jesus siken bara gurū Ukum-adat Jahudi samŭn bara daya Pharisee, “Agi kah mating Ukum-adat ta bada ata pibua daya di andu Sabbath?”

⁴ Ngara dŭh nang ani ani. Jesus bagan daya anŭ, pibua ayŭh ka bada ayŭh bu.

⁵ Komŭnŭ Ayŭh nang di ngara, “Kambŭi ndi so angān biyŭn anak, puan kah sapi adi rabu ka darŭm rubang prigi di andu Sabbath, dŭh kah angān jam anŭ gŭh di andu Sabbath tambit-i so rubang prigi anŭ?”

⁶ Ngara dŭh tungang nam Ayŭh di kayuh anŭ.

Atin Tŭkŭn ngga Atin adi An Turung Daya

⁷ Jesus kiris kada pingabang mien tarun yŭn guru adi kana dŭ, ka-I nyidundan upama ati di sopŭrŭg ngara:

⁸ “Kan daya bagan angān ka gawai sawan, dŭhnyah guru di yŭn adi kana dŭ. Kadŭ te agi daya adi rabis bās so angān mbŭh dog bagan,

⁹ ka ayŭh adi mbŭh bagan so-duwŭh ngan re mandŭg ka nang di angān, ‘Bada ayŭh guru digiti.’ Ka angān darŭm mangŭh re di guru di yŭn adi rapat dŭ.

¹⁰ Ngapŭi kan angān dog bagan, di guru di yŭn adi rapat dŭ, isa kan ayŭh adi bagan angān mandŭg, ka nang di angān, ‘Maad kamati, guru di sambu.’ Nganŭ angān dapŭd puji di sirung jawin sopŭrŭg bara pingabang.

¹¹ Amai barang naan daya adi kibās adŭp-i re dog pirapat, ka barang naan daya adi pirapat adŭp-i re dog kibās.”

¹² Komŭnŭ Jesus nang di sianŭ adi bagan adŭp-I, “Kan kuu ndai biruman kumbeng puan kah biruman singumi andu, dŭhnyah bagan dingan mu, puan kah jurud mu, puan kah madis mu, puan kah rasū mu adi kaya, amai ngara re bagan kuu dinge, ka kuu meh dog rapas ngara.

¹³ Pak kan kuu ndai gawai, bagan daya adi sirata, adi kipang, adi bajang, ka adi karak;

¹⁴ ka kuu re dog nyiberkat, sabab ngara dŭh tungang rapas kuu. Tapa re rapas kuu di andu bara daya adi kana makat so kabŭs.”

Upama Gawai bās

¹⁵ Kan ndi naan so ngara adi sua guru man dingah kayuh anŭ, ayŭh nang di Jesus, “Munki masam sanang inŭh ngara adi re guru man di gawai darŭm Ong Bauh Tapa!”

¹⁶ Jesus nang di ayŭh, “Agi ndi naan daya ndai gawai bās, ka-i bagan bagŭ daya.

¹⁷ Kan gawai mbŭh sidia, ayŭh pait daya gaji-i da kidaan di bara pingabang, ‘Mandŭg meh, sopŭrŭg-i mbŭh sidia!’

¹⁸ Pak sopŭrŭg ngara piguru, ndi ngga ndi, kidaan sitika-i. Adi diŭ nang di daya-gaji anŭ, ‘Aku mbŭh miris ndi engan tana ka aku dŭh siŭn dŭh matak di tingga-i; mite apun adŭ.’

¹⁹ Sianŭ ndi nang, ‘Aku mbŭh miris rimŭh pasang dari sapi ka madin aku mbŭh re matak an suba-i; mite apun adŭ.’

²⁰ Sianŭ ndi nang, ‘Aku bauh sawan; anŭ sabab aku dŭh bisa di.’

²¹ Daya-gaji anŭ pari ka kidaan sopŭrŭg kayuh anŭ di tuan-i. Tuan ramin buang-i baji nang di daya gaji-i, ‘Rikas matak ka barang aran ka sakap sakap aran di kupo, ka taban kamati daya adi sirata, adi kipang, adi karak, ka adi bajang.’

²² Komŭnŭ daya-gaji nang, ‘Anŭ adi kaam ko mritah da ndai, mbŭh dog ndai, tuan, pak arŭn babŭ dŭh puno.’

²³ Jadi tuan ramin nang di daya-gaji anŭ, ‘Di ka aran rais ka sakap sakap aran di sapa kupo, ka bada daya mandŭg, isa ramin ku puno.

²⁴ Aku kidaan di sopŭrŭg ngan, mating so ngara adi ko dog bagan re bisa kija pinguman ku!’ ”

Munki Nŭŭh Jadi Murid

²⁵ Agi ndi sidah darŭm bara daya bagŭ samah panu ngga Jesus, Ayŭh bigiring ka nang di ngara,

²⁶ “Asi asi adi mandŭg ka Aku dŭh bisa jadi murid Ku kambŭi-i dŭh rindu Aku rabis so sindŭ sama adŭp-i, rabis so anak sawŭn-i, rabis so jurud madis-i, ka rabis so adŭp-i ani.

²⁷ Asi asi adi dŭh gŭrŭng rigang-i ka tunda Aku, dŭh bisa jadi murid Ku.

²⁸ Kambŭi ndi so angān an ndai tawā, diŭ ayŭh guru ka kira kiang-ki biranja-i, sadang kah dŭh duit-i re ngga ngamas kraja-i.

²⁹ Kambŭi dŭh, ayŭh dŭh re tungang ngamas tawā anŭ ripas puun pinagap rasan-i ko dog na; ka sopŭrŭg daya adi kiris ani adi mbŭh jadi re tawŭh ayŭh.

³⁰ ‘Daya ati piguru pijog pak dŭh tungang ngamas kraja-i!’ ngara re nang.

³¹ Kambŭi ndi naan raja matak ngga simŭng ribu naan soldadu an rawan raja adi bŭkŭn adi matak ngga duwŭh puru ribu naan soldadu, ayŭh an diŭ guru bipikir ka natu sukup bake kah dŭh ayŭh nura raja anŭ ndi.

³² Kambŭi dŭh, ayŭh an pait pinyisung pinyisung-i da di bidapŭd ngga raja anŭ ndi, ka siken munki ngara bisa bidamai san ayŭh gibabŭ jo.

³³ Simŭnŭ gŭh,” ngga Jesus kubo pinganang-I, “angān dŭh bisa jadi murid Ku kambŭi dŭh tingge sopŭrŭg kayuh adi angān biyŭn.

Garo adi Dŭh Biguna

³⁴ “Garo taŭn-i kana, pak kambŭi pide-i mating tia, mating aran re bada-i pide dinge.

³⁵ Ayŭh dŭh biguna yŭn tana puan kah ndu tamŭh; ayŭh dog taran. Dingah meh garang, kambŭi angān biyŭn kajit!”