LUKE 13 - Hakcipta - Biatah Bidayuh

Dŭh tia Bidosa isa Angān dŭh Kabŭs

¹ Di tika anŭ agi kada daya diginŭ adi kidaan di Jesus pasar bara daya Galilee adi Pilate ko siŭ darŭm ngara jugan sadis ka Tapa.

² Jesus nam ngara, “Sabab bara daya Galilee anŭ dog siŭ mun anŭ, angān pikir rati-i ngara mbŭh bidosa dŭ so bara daya Galilee adi bŭkŭn kah?

³ Manŭn dŭh! Aku kidaan di angān, kambŭi angān dŭh marik pimudip ngan pari ka Tapa, sopŭrŭg ngan re kabŭs mun ngara.

⁴ Ka ngara adi simŭng-mai naan di Siloam boh, adi kabŭs dog nyatŭk tawā? Angān pikir rati-i ngara mbŭh bidosa dŭ so daya bŭkŭn adi rŭŭ di Jerusalem?

⁵ Manŭn dŭh! Ka Aku kidaan di angān, kambŭi angān dŭh marik pimudip ngan pari ka Tapa, sopŭrŭg ngan re kabŭs mun ngara anŭ gŭh.”

Upama Tŭngŭn Ara adi Jawŭh

⁶ Ka-I nyidundan upama ati di ngara: “Agi ndi naan daya biyŭn tŭngŭn ara di teya anggor-i. Ayŭh di jiroh buwa ara dieh pak mating dapŭd-i.

⁷ Jadi ayŭh nang di tukang teya-i, ‘Tingga, mbŭh taruh sawa aku ari mandŭg kamati di jiroh buwa di tŭngŭn ara ati, ka mating dapŭd ku. Tabŭng-i! Re ngga mani saat tana adŭ?’

⁸ Pak tukang-teya nam, ‘Tuan,Tandah adŭ ndŭg ndi sawa dinge. Aku re nyakor maning tŭngŭn-i ka na tamŭh dieh.

⁹ Jadi kambŭi-i buān sawa bauh, kana; kambŭi dŭh, kaam bisa tabŭng-i.’ ”

Jesus Pibua ndi naan Dayung di Andu Sabbath

¹⁰ Di ndi andu Sabbath Jesus ngajar di ramin simayang-Jahudi.

¹¹ Agi diginŭ ndi naan dayung adi dog roh arap adi bada ayŭh mudar sitian simŭng-mai sawa; ayŭh bana mudug ka mbŭh dŭh adŭ tungang nŭnggŭn adŭp-i.

¹² Kan Jesus kiris ayŭh, Jesus bagan ayŭh ka nang di ayŭh, “Dayung, kuu mbŭh bua so udar mu!”

¹³ Ayŭh na tangan-I di tunduh dayung anŭ, ka nganŭ gŭh ayŭh mijog tŭnggŭn, ka rasu muji Tapa.

¹⁴ Pingubak ramin simayang-Jahudi tuas amai Jesus pibua daya di andu Sabbath. Ayŭh nang di bara daya, “Nŭm andu taŭn agi ngga ata patut nyiraja. Mandŭg di tipuh anŭ kambŭi an dog pibua, pak dŭhnyah di andu Sabbath!”

¹⁵ Tuhan nam ayŭh, “Kuu pingadong! Di andu Sabbath, adŭp ngan siraru piruah sapi puan kah kaldi so buwang ka taban-i da di nok piin.

¹⁶ Ka siati adi sesang Abraham adi Shetan mbŭh muak sitian simŭng-mai sawa; dŭh kah ayŭh patut dog pirupas di andu Sabbath?”

¹⁷ Pinyinam-I mbŭh bada bara pinganyu-I mangŭh, pak bara daya bŭkŭn mbŭh gaŭn amai sopŭrŭg pingandai bās-I.

Upama Ruwang Sabi

¹⁸ Jesus siken, “Munki gaya kayuh kan Tapa mritah? Ani bisa Ku ngga awing-i?

¹⁹ Ayŭh agi simuti. Ndi naan daya mbit ruwang sabi ka purun-i di teya. Ayŭh timbu jadi tŭngŭn kayuh, ka manuk ndai sarin di daan-i.”

Upama Ragi

²⁰ Jesus pari siken, “Ani bisa Ku ngga awing gaya kayuh kan Tapa mritah?

²¹ Ayŭh agi simuti. Ndi naan dayung tambit kada ragi ka kunyu-i ngga pat puru lita tibaduk ndŭg ka kambang.”

Tiban adi Siit

²² Darŭm Jesus panu tambus kupo kupo ka anak anak kupo, nuju Jerusalem, Ayŭh ngajar daya.

²³ Agi daya siken Ayŭh, “Tuan, nisŭ kah daya adi re dog nyiramat?” Jesus nam ngara,

²⁴ “Ngga situngang tungang ngan suba mŭrŭt so tiban adi siit; sabab bagŭ daya taŭn re suba mŭrŭt so dieh pak dŭh tungang.

²⁵ Tuan ramin re makat ka tŭŭp tiban; ka kan angān mijog di sapa ka gutog-i buang nang, ‘Kuka tiban yŭn ami, tuan!’ ayŭh re nam angān, ‘Aku dŭh puan so ki angān mandŭg!’

²⁶ Nganŭ angān re nam, ‘Kieh ko man nok ngga kaam; kaam ko ngajar di kupo ami!’

²⁷ Pak ayŭh re nang dinge, ‘Aku dŭh puan so ki angān mandŭg. Bu so aku, sopŭrŭg ngan daya adi ginaka!’

²⁸ Di tika kuu kiris Abraham, Isaac, ka Jacob, samŭn bara nabi darŭm Ong Bauh Tapa, kuu re sien buang sangsara sabab adŭp mu mbŭh dog taran ka sapa!

²⁹ Daya re mandŭg so timor ngga barat, so utara ngga so siratan, ka guru sua bigawai darŭm Ong Bauh Tapa.

³⁰ Nganŭ ngara adi sikasŭn madin re jadi diŭ, ka ngara adi diŭ madin re jadi sikasŭn.”

Pinyirindu Jesus di Jerusalem

³¹ Di tika anŭ gŭh agi kada daya Pharisee tudu Jesus ka nang di Ayŭh, “Kaam dŭh siŭn dŭh bu so ti, di ka tarun bŭkŭn, amai Herod an siŭ Kaam.”

³² Jesus nam ngara, “Panu kidaan di bisirŭh anŭ: ‘Aku pibu umot ka pibua daya andu ati ngga andu sipagi, ka andu adi taruh Aku re ngamas kraja Ku.’

³³ Pak Aku dŭh siŭn dŭh pijuu pimanu Ku andu ati, sipagi ka girundi; dŭh inŭh patut nabi dog siŭ di tarun bŭkŭn adŭ-i di Jerusalem.

³⁴ “Jerusalem, Jerusalem! Kuu siŭ bara nabi, ka manjan ngga batuh bara pinyisung adi Tapa pait ka kuu! Mbŭh pikudu kari Aku raan dakŭp sopŭrŭg daya mu, nimun sindŭ siok nguruk anak-i di ribo urad-i, pak kuu abah!

³⁵ Ramin Tuhan ngan re dog tagan. Ka puan meh, angān dŭh re kiris Aku dinge ndŭg ka andu adi ngga angān nang, ‘Biberkat inŭh Ayŭh adi mandŭg ngga adŭn Tuhan.’ ”