LUKE 1 - Hakcipta - Biatah Bidayuh

Puun Pinganang

¹ Tabi Theophilus: Mbŭh bagŭ daya ko nuris ngga sibisa bisa ngara pinyiripot pasar kayuh adi mbŭh jadi di ruang ami.

² Ngara nuris kayuh adi ko dog kidaan di kieh so baba adŭp ngara adi mbŭh kiris sopŭrŭg-i so sibungas-i, ka adi mbŭh piagah agah anŭ.

³ Jadi meh, tuan Theophilus, sabab aku muko nakit nudug ruru sopŭrŭg kayuh anŭ so sibungas-i, aku pikir kana inŭh aku nuris ngga biruru sopŭrŭg-i yŭn mai.

⁴ Aku ndai simŭnŭ isa kaam bisa batur puan kayuh adi ko dog ngajar di kaam agi sawŭ.

Pinyibranak John Pembaptisa dog Kidaan

⁵ Di jaman Herod jadi raja di tarun tana Judea, agi ndi naan imam dŭn Zechariah. Ayŭh inŭh ndi so tibaran imam Abijah. Dŭn Sawŭn-i Elizabeth; ayŭh gŭh so rawang imam.

⁶ So-duwŭh ngara mbŭh daya tŭnggŭn di sirung jawin Tapa ka mbŭh sita ukum ukum-adat ngga pinyipesan Tuhan.

⁷ Ngara dŭh biyŭn anak sabab Elizabeth aboh, buang-i ngara duwŭh taŭn mbŭh minyamba.

⁸ Ndi andu, nunda idar-i, Zechariah nguru simayang darŭm Ramin Tuhan.

⁹ Nanyam ka adat adi bara imam tunda, ayŭh mbŭh dog mien pakai taran-dadu da mupun kimanyan di tunduh mija-sambah. Jadi ayŭh mŭrŭt Ramin Tuhan,

¹⁰ atan bara daya di sapa simayang di jam kimanyan dog mupun.

¹¹ Malaikat Tuhan nandŭng di ayŭh, mijog tura ka tauh mija-sambah di yŭn kimanyan dog mupun.

¹² Kan Zechariah kiris ayŭh, ayŭh gŭgŭh buang taru.

¹³ Pak Malaikat anŭ nang di ayŭh, “Dŭhnyah taru, Zechariah! Tapa mbŭh dingah dua mu; sawŭn mu re biranak ndi anak dari yŭn mu. Kuu siŭn kadŭn ayŭh John.

¹⁴ Munki masam gaŭn ka sanang asŭng mu re, ka munki masam sanang asŭng daya bagŭ re kan ayŭh dog biranak!

¹⁵ Ayŭh re jadi daya adi bās di batŭh Tuhan. Ayŭh dŭh siŭn nok wain bait tadŭ kayuh nok adi bisā. So tika-i dog biranak ayŭh re brisi ngga Roh Kudus,

¹⁶ ka ayŭh re taban bagŭ daya Israel pari ka Tuhan adi Tapa ngara.

¹⁷ Ayŭh re panu diŭ so Tuhan, bake buang bikuasa mun nabi Elijah. Ayŭh re bada bara sama ngga bara anak bidamai; ayŭh re marik daya adi tangek pari tunda pikir daya tŭnggŭn; ayŭh re sidia daya yŭn Tuhan.”

¹⁸ Zechariah nang di malaikat anŭ, “Simuki aku re puan kayuh ati sawŭ? Aku mbŭh minyamba, ka sawŭn ku mbŭh minyamba gŭh.”

¹⁹ Malaikat anŭ nam. “Aku ati Gabriel, adi siraru sidia ndai nanyam pinyibada Tapa. Ayŭh pait aku da minyu ngga kuu ka kidaan di kuu agah kana ati.

²⁰ Pak kuu dŭh sabah di pinganang ku, adi re jadi bitŭtŭk di tika adŭp-i. Sabab kuu dŭh sabah, kuu re jadi bawa; kuu re dŭh bisa minyu ndŭg ka andu adi ngga pinganang ku ati jadi bitŭtŭk.”

²¹ Atan anŭ, bara daya kajŭn Zechariah buang mbŭh bipikir mani ayŭh raru tui darŭm Ramin Tuhan.

²² Kan ayŭh ruah, ayŭh dŭh tungang minyu ngga ngara, jadi ngara rasu puan nang ayŭh agi kiris kayuh saruh darŭm Ramin Tuhan. Dŭh tungang nang ani ani, ayŭh pakai tangan minyu ngga ngara.

²³ Kan tipuh adi ngga-i nyiraja darŭm Ramin Tuhan mbŭh ripuan, Zechariah mari ka ramin-i.

²⁴ Dŭh tui ripas anŭ sawŭn-i Elizabeth bite, ka dŭh-i bu so arŭn sitian rimŭh buran.

²⁵ “Rango inŭh meh madin Tapa mbŭh turung aku,” ayŭh nang. “Ayŭh mbŭh kadi mangŭh ku so batŭh daya bagŭ!”

Pinyibranak Jesus Kristus Dog Kidaan

²⁶ Darŭm Elizabeth mbŭh bite nŭm buran, Tapa pait Malaikat Gabriel ka ndi kupo di Galilee dŭn Nazareth.

²⁷ Ayŭh taban agah ka yŭn ndi naan dayung adi mbŭh bitunang ngga ndi naan dari dŭn Joseph, adi sesang Raja David. Dŭn dayung anŭ inŭh Mary.

²⁸ Malaikat anŭ mandŭg tudu ayŭh ka nang, “Tabi ka kuu adi biberkat! Tuhan agi ngga kuu!”

²⁹ Mary mbŭh bana bipito da pinganang malaikat, ka bipikir ani meh rati pinganang-i anŭ.

³⁰ Malaikat anŭ nang di ayŭh, “Dŭhnyah taru, Mary; Tapa mbŭh raru mandis ngga kuu.

³¹ Kuu re bite ka biranak ndi anak dari, ka kuu re kadŭn Ayŭh Jesus.

³² Ayŭh re jadi bās ka dog kadŭn Anak Tapa adi Sambu Sopŭrŭg. Tuhan Tapa re bada Ayŭh jadi raja, nimun David adi babuk-I,

³³ ka Ayŭh re adu adu jadi raja yŭn bara sesang Jacob; pritah-I re dŭh biyŭn pinŭbŭn!”

³⁴ Mary nang di Malaikat anŭ, “Aku ati dayung tibŭn. Simuki garang kayuh ati re bisa jadi?”

³⁵ Malaikat anŭ nam, “Roh Kudus re mandŭg ka kuu, ka kuasa Tapa re nyayung kuu. Anŭ sabab Anak adi kudus anŭ re dog kadŭn Anak Tapa.

³⁶ Ingat madis mu Elizabeth. Ayŭh adi daya nang aboh, madin mbŭh nŭm buran bite, sunggu ayŭh mbŭh raru minyamba.

³⁷ Mating inŭh kayuh adi Tapa dŭh bisa ndai.”

³⁸ “Aku urun Tuhan,” Mary nang; “Isa-i jadi di aku nimun adi nang mai.” Ka malaikat anŭ bu so ayŭh.

Mary Munan Elizabeth

³⁹ Dŭh tui ripas anŭ Mary bigaut matak ka ndi kupo di rais tarun tana sandah Judea.

⁴⁰ Ayŭh di mŭrŭt ramin Zechariah ka nggen tabi di Elizabeth.

⁴¹ Kan Elizabeth dingah tabi Mary, anak darŭm tain-i minanjon. Elizabeth, brisi ngga Roh Kudus

⁴² nang ngga sirŭŭn bana, “Kuu inŭh adi siabo biberkat di dupan bara dayung, ka biberkat inŭh Anak adi kuu re ruwan!

⁴³ Mani kayuh bās ati bisa jadi di aku: sindŭ Tuhan ku munan aku?

⁴⁴ Amai di jam aku dingah tabi mu, anak darŭm tain ku minanjon ngga gaŭn.

⁴⁵ Bituah inŭh kuu an sabah pinganang Tuhan re jadi bitŭtŭk, adi-I nang di kuu!”

Ragu Puji Mary

⁴⁶ Mary nang, “Atin ku muji Tuhan;

⁴⁷ simangi ku gaŭn sabab Tapa adi Pinyikudip ku,

⁴⁸ amai Ayŭh mbŭh ingat aku, urun-I adi tŭkŭn timŭngŭn! So madin sopŭrŭg daya re nang aku biberkat,

⁴⁹ sabab kayuh adi bās Tapa adi Bikuasa mbŭh ndai di aku. Kudus inŭh adŭn-I;

⁵⁰ so turap ndi ndŭg turap andi Ayŭh kiren masi-I di ngara adi stabi di Ayŭh.

⁵¹ Ayŭh mbŭh ton tangan-I adi bikuasa ka mesak bara adi miruap samŭn sopŭrŭg atur-pinyiraan ngara.

⁵² Ayŭh mbŭh bisor raja raja adi bikuasa so takta ngara, ka mbŭh katuh daya adi tŭkŭn timŭngŭn.

⁵³ Ayŭh pibisoh daya adi sirata ngga kayuh kana, ka bada daya kaya bu bŭrŭh.

⁵⁴ Ayŭh ingat janji adi-I mbŭh ndai ngga tayung-babuk ta, ka mbŭh mandŭg an turung urun-I Israel.

⁵⁵ Ayŭh dŭh kambŭt an kiren masi di Abraham ka di sopŭrŭg sesang-i ndŭg situi tui!”

⁵⁶ Mary rŭŭ ngga Elizabeth kira ka agi taruh buran; komŭnŭ ayŭh mari ka ramin adŭp-i.

Pinyibranak John Pembaptisa

⁵⁷ Kan tika-i biranak mbŭh mandŭg, Elizabeth ruwan ndi anak dari.

⁵⁸ Bara rasū-i samŭn bara madis-i dingah munki masam kana Tuhan mbŭh ngga ayŭh, ka ngara sopŭrŭg samah samah gaŭn ngga ayŭh.

⁵⁹ Kan sipira anŭ mbŭh ndi minggu umbur-i, ngara mandŭg di nyunat ayŭh. Ngara an kadŭn ayŭh Zechariah, tunda dŭn sama-i.

⁶⁰ Pak sindŭ-i nang, “Dŭh! Ayŭh patut dog kadŭn John.”

⁶¹ Ngara nang di ayŭh, “Pak kuu dŭh biyŭn madis adi dog kadŭn sakanŭ!”

⁶² Jadi ngara ndai tandā ka sama-i, siken ani dŭn an-i nggen di anak anŭ.

⁶³ Zechariah mite ndi kiping papan yŭn nuris; ayŭh nuris, “Dŭn-i inŭh John.” Sopŭrŭg ngara mbŭh inga inga!

⁶⁴ Di jam anŭ gŭh Zechariah dapŭd minyu dinge, ka-i rasu muji Tapa.

⁶⁵ Bara rasū-i mbŭh raru taru, ka agah pasar kayuh ati mbŭh tambus barang yŭn di rais tarun tana sandah Judea.

⁶⁶ Barang naan adi dingah kayuh anŭ bipikir darŭm asŭng-i, “Ani meh re anak ati jadi?” amai kuasa Tuhan tatŭng agi ngga ayŭh.

Zechariah Minyu Pasar Kayuh adi Re Jadi

⁶⁷ Sama John, Zechariah, dog nguasa Roh Kudus, kidaan di daya agah so Tapa:

⁶⁸ “Ja ata muji Tuhan, adi Tapa daya Israel! Ayŭh mbŭh mandŭg di turung daya-I ka mbŭh pirupas ngara.

⁶⁹ Ayŭh mbŭh nggen di ata Pinyikudip adi bikuasa, adi sesang urun-I David.

⁷⁰ Ayŭh mbŭh minyu so baba bara nabi kudus-I ndun jah

⁷¹ nang Ayŭh re nyiramat ata so bara pinganyu ta, so kuasa sopŭrŭg ngara adi tiru di ata.

⁷² Ayŭh nang Ayŭh re kiren masi-I di tayung-babuk ta ka ingat simanya kudus-I.

^73-74 Ngga payu-I di babuk ta Abraham Ayŭh bijanji an nyiramat ata so tangan pinganyu ta ka bada ata bituan di Ayŭh dŭh ngga taru,

⁷⁵ isa ata bisa jadi kudus buang tŭnggŭn di sirung jawin-I sitŭkŭd umbur ta.

⁷⁶ “Kuu nak, re dog kadŭn nabi Tapa adi Sambu Sopŭrŭg. Kuu re panu diŭ so Tuhan di sidia aran yŭn-I,

⁷⁷ di kidaan di daya-I ngara re dog nyiramat kan dosa ngara dog apun.

⁷⁸ Tapa ta masi buang duduh. Amai an nyiramat ata, Ayŭh re mandŭg. Keya ka pinusak batŭh andu

⁷⁹ Ayŭh nggen jawa-I di sopŭrŭg daya adi udip darŭm karŭm buang di ribo singangi pinyikabŭs, ka jaga kaja ta panu mŭrŭt aran damai.”

⁸⁰ Anak anŭ dŭ dŭ masang darŭm pŭrŭng ngga darŭm roh. Ayŭh rŭŭ di tarun tana-pajam ndŭg ka andu adi ngga-i kiren adŭp-i di daya Israel.