LEVITICUS 26 - Hakcipta - Biatah Bidayuh

Berkat yŭn Daya adi Dingah Pinganang

¹ TUHAN nang, “Dŭhnyah ndai tibudo puan kah pijog patong, uros batuh, puan kah batuh adi dog mŭŭt ka nyambah-i. Aku TUHAN adi Tapa ngan.

² Sita gawai gawai adat ka stabi di tarun yŭn Aku dog nyambah. Aku ati TUHAN.

³ “Kambŭi angān udip nanyam ka ukum-adat Ku ka tunda pesan Ku,

⁴ Aku re pait ujen ka angān di tipuh-i adi batur, isa tana piruah buwa buwa pimuruh ka tŭngŭn tŭngŭn kayuh buān.

⁵ Buwa buwa pimuruh ngan re ruai pisŭng ndŭg ka angān re gibabŭ ngatŭm gandom kan-i mbŭh tika ngga sun buwa anggor, ka angān re gibabŭ sun buwa anggor kan-i mbŭh tika purun gandom. Angān re biyŭn sopŭrŭg anŭ adi angān raan man, ka angān re rŭŭ ngga siramat di tarun tana ngan.

⁶ “Aku re bada angān udip bamai di tarun tana ngan, ka angān re bŭŭs buang mating taru di tadŭ daya. Aku re kadi dāng dāng adi mangah so tarun tana anŭ, ka perang gŭh re mating tia.

⁷ Angān re manang ngarah pinganyu ngan;

⁸ rimŭh naan adŭ angān re tungang ngarah siratus naan pinganyu, ka siratus naan re tungang ngarah simŭng ribu naan pinganyu.

⁹ Aku re nyiberkat angān ka nggen bagŭ anak di angān; Aku re ingat simanya adi Aku muko ndai ngga angān.

¹⁰ Buwa pingatŭm ngan re bagŭ, ka re sadang yŭn sitŭkŭd ndi sawa, ka angān re taran tadŭh pingatŭm adi amba ramŭn an biyŭn sadang tarun yŭn nyikŭn buwa pingatŭm adi bauh.

¹¹ Aku re rŭŭ di ruang ngan darŭm Bari Ku, ka Aku dŭh re tagan angān.

¹² Aku re agi ngga angān; Aku re jadi Tapa ngan, ka angān re jadi daya Ku.

¹³ Aku, TUHAN Tapa ngan, taban angān ngga ruah so Egypt isa angān dŭh tia jadi urun. Aku pirusak kuasa anŭ adi ngabŭt angān, ka bada angān udip darŭm sanang, dŭh di ribo kuasa daya.”

Ukum yŭn Daya adi Dŭh Dingah Pinganang

¹⁴ TUHAN nang, “Kambŭi angān abah tunda pesan Ku, angān re dog ukum.

¹⁵ Kambŭi angān abah tunda ukum-adat Ku, ka miranggar simanya adi Aku mbŭh ndai ngga angān,

¹⁶ Aku re ngukum angān. Aku re taban pinyirusag ka angān, mun andam andam adi dŭh tikuri ka sungoh adi bisa bada angān karak ka adi re kirŭpŭt pimudip ngan. Angān re nyipurun, pak-i dŭh re jadi guna di angān, amai pinganyu ngan re ngarah angān ka re man kayuh adi angān purun.

¹⁷ Aku re rawan angān, isa angān dog ngarah. Sinadan daya adi tiru di angān re mritah angān. Angān re taru ka re bikaduh pŭn daya mating tadak angān.

¹⁸ “Sunggu kambŭi sopŭrŭg kayuh anŭ mbŭh dog angān ka angān gibabŭ gŭh abah dingah pinganang Ku, Aku re nambah ukum ngan ju rupet.

¹⁹ Aku re pirabur uap-sambuh ngan. Ujen re mating, ka tana ngan re jadi badŭh ka riang mun basi.

²⁰ Angān re bandar bandar nyiraja pak sopŭrŭg-i re jadi au-tarun, sabab tana ngan dŭh re piruah buwa bawa pimuruh ka tŭngŭn tŭngŭn kayuh dŭh re buān.

²¹ “Kambŭi angān gibabŭ nyipunok Aku ka abah dingah pinganang Ku, Aku re nambah dinge ukum ngan ju rupet.

²² Aku re pait dāng dāng mangah ka ruang ngan, ka-i re siŭ bara anak ngan, siŭ dāng kudip ngan, ka kidŭm angān bada nisŭ ndŭg ka aran aran ngan re dŭh tia dog kadŭg.

²³ “Kambŭi sunggu sopŭrŭg ukum anŭ mbŭh nyatŭk angān, ka angān gibabŭ dŭh an dingah pinganang Ku, pak pijuu rawan Aku,

²⁴ nganŭ Aku re rawan angān ka ngukum angān ju rupet rabis mandam so adi mbŭh.

²⁵ Aku re taban perang ka angān ngga ngukum angān amai angān miranggar simanya ta, ka kambŭi angān tikuruk re magŭng adŭp ngan darŭm kupo ngan, Aku re pait andam adi dŭh tikuri ka ruang ngan, ka angān re nyerah adŭp ngan ka pinganyu ngan.

²⁶ Aku re ngurang pinguman ngan, isa simŭng naan dayung re samah pakai ndi oven-tana ngga ndai ruti adi ngara biyŭn. Ngara re kutung ruti anŭ, ka kan-i mbŭh abo man ngan, angān re babŭ sibŭrŭk.

²⁷ “Kambŭi sunggu sopŭrŭg anŭ mbŭh nyatŭk angān ka angān gibabŭ rawan Aku ka abah dingah pinganang Ku,

²⁸ nganŭ ngga baji Ku Aku re rawan angān ka nambah ukum ngan dinge ju rupet rabis mandam so adi mbŭh.

²⁹ Sibŭrŭk ngan re raru bisā ndŭg ka angān re man bara anak adŭp ngan.

³⁰ Aku re pirabur tarun yŭn angān bisambah di sandah, nyirubuh mija mija kimanyan ngan, ka taran tadang ngan di tunduh dudu tibudo ngan adi mbŭh tumbang. Adi raru sipŭ-i,

³¹ Aku re nyirubuh kupo kupo ngan, ka pirabur tarun yŭn angān bisambah, ka dŭh re kambat sadis sadis ngan.

³² Aku re kubo pirusak tana ngan ndŭg ka bara pinganyu adi ngisi-i re gŭgŭh kiris pinyirusak-i.

³³ Aku re taban perang ka angān ka bada angān papar sasah ka tarun tarun tana rais daya tami. Tarun tana ngan re dog tagan ka kupo kupo ngan re asur.

^34-35 Jadi, di tipuh anŭ, sitadŭn angān dog taran ka rais pinganyu ngan, tana adi angān abah tandah bada rŭŭ-paya re dapŭd sukup paya darŭm-i dog tagan.

³⁶ “Aku re bada sinadan angān adi dog taran ka rais daya ruai taru ndŭg ka jawŭn dawŭn dog poh sabak re bada angān bikaduh. Angān re bikaduh keya ka dog tadak darŭm biperang, ka angān re rabu pŭn ka pinganyu mating sindŭk angān.

³⁷ Angān re sikak sikakong dingan ngan pŭn ka daya mating tadak angān, ka angān dŭh re tungang rawan tadŭ tadŭ pinganyu.

³⁸ Angān re kabŭs di rais adi yŭn angān dog taran, ka dog kubur di rais pinganyu ngan.

³⁹ Angān adi nisŭ adi gibabŭ udip di rais pinganyu ngan re udip sangsara amai dosa adŭp ngan ngga dosa tayung-babuk ngan.

⁴⁰ “Pak bara sesang ngan re ngaku dosa ngara ngga dosa dosa tayung-babuk ngara, adi nyipunok Aku ka adi rawan Aku,

⁴¹ ka bada Aku rawan ngara ka bada ngara dog taran ka rais pinganyu ngara. Ngga pinŭbŭn-i di tika bara sesang ngan mbŭh pirapat adŭp ngara ka mbŭh trima ukum yŭn dosa ngga kraja ngara adi birawan,

⁴² Aku re ingat simanya Ku ngga Jacob ngga Isaac ka ngga Abraham, ka Aku re pibauh janji Ku an nggen tarun tana anŭ di daya Ku.

⁴³ Pak diŭ so anŭ, rais anŭ dŭh siŭn dŭh dog kangan so daya adi rŭŭ dieh, isa-i bisa rŭŭ-paya ngga sukup, ka ngara dŭh siŭn dŭh trima ukum ngga sukup-i amai mbŭh tirawan ukum-adat ngga pesan Ku.

⁴⁴ Pak sunggu mŭnŭ, di tika ngara gibabŭ di rais pinganyu ngara, Aku dŭh re tagan bait pirabur ngara. Anŭ bisa pirusak simanya Ku ngga ngara, ka Aku ati TUHAN Tapa ngara.

⁴⁵ Aku re pibauh simanya adi Aku muko ndai ngga tayung-babuk ngara di tika Aku kiren di sopŭrŭg bangsa kuasa Ku darŭm Aku taban daya Ku ruah so Egypt, siŭn Aku adi TUHAN, bisa jadi Tapa ngara.”

⁴⁶ Sopŭrŭg anŭ inŭh pesan ngga ukum-adat adi TUHAN nggen di Moses di Darŭd Sinai yŭn daya Israel.