LEVITICUS 25 - Hakcipta - Biatah Bidayuh

Sawa adi Ju

¹ TUHAN minyu ngga Moses di Darŭd Sinai ka pesan ayŭh

² da nggen di daya Israel atur-adat ati: Kan angān mŭrŭt tarun tana adi TUHAN nggen di angān, angān kibās TUHAN kan angān dŭh ngŭmŭh tana anŭ di barang sawa adi ju.

³ Angān siŭn ngŭmŭh tana ngan, kapŭg daan daan tŭngŭn adi arap di teya anggor ngan, ka ngatŭm buwa buwa pimuruh darŭm tipuh nŭm sawa.

⁴ Pak ngga sawa di ju inŭh sawa adi ngga tana anŭ dŭh siŭn dog ngŭmŭh, sawa adi dog nitah yŭn TUHAN. Dŭhnyah biteya birŭmŭh, bait kapŭg daan daan anggor adi arap darŭm sawa adi ju.

⁵ Dŭhnyah ngatŭm buwa gandom adi timbu sadi-i, ka dŭhnyah gŭh ngatŭm buwa anggor adi ruah so tŭngŭn adi dŭh dog kapŭg daan-i adi arap, amai sawa adi ju inŭh sawa adi ngga tana dŭh siŭn dog ngŭmŭh.

⁶ Sunggu tana anŭ dŭh dog ngŭmŭh sitadŭn sawa anŭ, ayŭh re piruah pinguman yŭn ngan, yŭn urun ngan, yŭn daya-gaji ngan, ka yŭn daya pinami adi rŭŭ ngga ngan,

⁷ dāng adi kudip ngan, ka dāng tarun di tarun tana ngan. Ka tadŭ masam buwa adi tana anŭ piruah bisa dog man.

Sawa Pinyipari

⁸ Mirang ju kari ju sawa, prungun-i pat puru prii sawa.

⁹ Komŭnŭ, ngga andu adi simŭng darŭm buran ju, anŭ inŭh Andu Pingapun Dosa, pait ndi naan daya bada mambak trompet di ndi tarun tarun tana anŭ.

¹⁰ Simŭnŭ inŭh angān bisa puan nang sawa adi numbor rimŭh-puru dog nyidŭrŭ yŭn sopŭrŭg daya adi rŭŭ di tana anŭ. Darŭm sawa anŭ sopŭrŭg rata adi muko dog jua an dog pari ka daya adi sibungas dapu-i, puan kah ka sesang-i, ka tadŭ daya adi muko dog jua jadi urun siŭn dog pari gŭh ka manak adŭp-i.

¹¹ Angān dŭh siŭn nyipurun di teya teya ngan, puan kah ngatŭm buwa gandom adi timbu sadi-i, puan kah nguruk buwa anggor adi dŭh dog kapŭg daan-i adi arap.

¹² Ndi sawa sawa anŭ inŭh jadi kudus yŭn ngan, ka angān siŭn man ani ani kayuh adi adŭp tarun tana anŭ piruah yŭn ngan.

¹³ Darŭm sawa anŭ sopŭrŭg rata adi muko dog jua siŭn dog pari ka daya adi sibungas dapu-i.

¹⁴ Ngapŭi kan di tika angān jua puan kah miris tana so dupan adŭp ngan daya Israel, dŭhnyah nipu dingan ngan.

¹⁵ Rega-i an dog natu nanyam kiang sawa adi ngga tana anŭ tungang piruah buwa pimuruh diŭ so Sawa Pinyipari adi re.

¹⁶ Kambŭi bagŭ sawa-i, rega-i siŭn bigatung dŭ, pak kambŭi sawa-i kurang, rega-i kurang gŭh, sabab anŭ adi dog jua inŭh kiang buwa pimuruh adi tana anŭ tungang piruah.

¹⁷ Dŭhnyah ngakar dingan adŭp ngan adi daya Israel, pak taru meh TUHAN.

Pinyusah di Sawa adi Ju

¹⁸ Tunda sopŭrŭg ukum-adat ngga pesan TUHAN, isa angān udip ngga siramat di tarun tana anŭ.

¹⁹ Tana anŭ re piruah buwa buwa pimuruh, ka angān re biyŭn sopŭrŭg adi angān raan man ka re udip ngga siramat.

²⁰ Pak agi daya an siken ani garang re nŭŭh man sitadŭn sawa adi ju, kan tana dŭh dog ngŭmŭh ka buwa buwa mating dog ngatŭm.

²¹ TUHAN re nyiberkat tana anŭ di sawa adi nŭm ka-i re piruah sukup pinguman yŭn tipuh duwŭh sawa.

²² Kan angān nyipurun darŭm sawa adi mai, angān re gibabŭ man anŭ adi dapŭd ngan darŭm sawa adi nŭm, ka angān re gibabŭ biyŭn sukup pinguman ndŭg ka buwa buwa adi angān purun sawa anŭ dog ngatŭm.

Pari Tana ngga Ramin

²³ Sikari kari dŭhnyah piruro jua tana ngan, amai dŭh inŭh angān adi dapu-i; TUHAN adi dapu-i, ka angān inŭh keya ka daya pinami adi nginjam pakai-i.

²⁴ Kan tana dog jua, hak daya adi sibungas dapu-i an miris pari patut dog stabi.

²⁵ Kambŭi tadŭ so angān daya Israel jadi sirata ka dŭh siŭn dŭh jua tana ngan, jurud madis ngan adi siabo sindŭk ngga angān patut miris pari tana anŭ.

²⁶ Kambŭi angān dŭh biyŭn jurud madis adi re miris pari tana anŭ, kadŭ-i andu bŭkŭn angān jadi kaya ka biyŭn sukup duit ngga miris-i pari ka adŭp ngan.

²⁷ Kambŭi simŭnŭ angān dŭh siŭn dŭh bayar ka sianŭ adi miris-i ngga kiang adi patut ngga utung adi re dog dapŭd sibayuh Sawa Pinyipari adi re mandŭg. Simŭnŭ angān tungang tambit pari tana ngan.

²⁸ Pak kambŭi angān dŭh biyŭn sukup duit ngga miris pari tana anŭ, tana anŭ taŭn gibabŭ di ribo kuasa sianŭ adi muko miris-i ndŭg ka Sawa Pinyipari adi re mandŭg. Di Sawa Pinyipari anŭ adi re mandŭg meh tana anŭ re dog pari ka sianŭ adi sibungas dapu-i.

²⁹ Kambŭi angān jua ramin adi di darŭm kupo adi bikuta, angān siŭn miris pari ramin anŭ darŭm sibungas tipuh ndi sawa, ngitong so andu buran adi ngga-i dog jua.

³⁰ Pak kambŭi angān dŭh miris pari ramin anŭ darŭm tipuh sawa anŭ, hak ngga angān miris-i re manyap, ka ramin anŭ jadi rata adi ruro yŭn sianŭ adi muko miris-i, ngga bara sesang-i. Ramin anŭ dŭh re dog pari darŭm Sawa Pinyipari.

³¹ Pak ramin ramin adi darŭm kupo adi dŭh bikuta an dog nyirundeng keya ka tana sapa tarun. Daya adi sibungas dapu-i biyŭn hak miris-i pari, ka-i dŭh siŭn dŭh dog pari darŭm Sawa Pinyipari.

³² Saja-i simŭnŭ, daya Levi biyŭn hak miris pari buat-rata ngara di tadŭ nga-i di kupo kupo adi ngara dapu.

³³ Kambŭi ndi ramin di ndi so kupo kupo anŭ dog jua daya Levi ka dŭh dog miris pari, ramin anŭ dŭh siŭn dŭh dog pari darŭm Sawa Pinyipari, sabab ramin ramin adi daya Levi dapu di darŭm kupo kupo ngara inŭh rata ruro adŭp ngara di dupan daya Israel.

³⁴ Pak tarun tana kupai adi maning kupo daya Levi taŭn dŭh siŭn dog jua; anŭ inŭh mbŭh adu adu buat-rata ngara.

Pinurung yŭn Daya Sirata

³⁵ Kambŭi tadŭ daya Israel adi rŭŭ bisindŭk ngga angān jadi sirata ka dŭh tungang nyiran adŭp-i, angān dŭh siŭn dŭh nggen di ngara nimun angān nggen di daya-gaji ngan, isa ngara bisa babŭ bisindŭk ngga angān.

³⁶ Dŭhnyah mite so daya Israel anak duit ngan puan kah tadŭ mun utung so kayuh adi dog nginjam, pak nurut pinyiraan Tapa ka bada ngara rŭŭ sindŭk angān.

³⁷ Dŭhnyah bada ngara bayar anak duit adi angān nginjam di ngara, ka dŭhnyah gŭh jiroh utung so pinguman adi angān jua di ngara.

³⁸ Ati inŭh pesan TUHAN adi Tapa ngan, adi piruah angān so Egypt siŭn-I nggen di angān tarun tana Canaan ka jadi Tapa ngan.

Pirupas Urun

³⁹ Kambŭi agi daya Israel adi rŭŭ sindŭk angān jadi raru sirata ndŭg ka jua adŭp-i jadi urun ngan, angān dŭh siŭn bada ayŭh ndai kraja urun.

⁴⁰ Ayŭh siŭn rŭŭ ngga angān keya ka daya-gaji adŭ, ka nyiraja yŭn ngan ndŭg ka Sawa Pinyipari adi re mandŭg.

⁴¹ Di tipuh anŭ ngara ngga bara anak ngara siŭn pari ka rawang adŭp ngara samŭn ka buat-rata tayung-babuk ngara.

⁴² Daya Israel inŭh bara urun TUHAN, ka Ayŭh adi taban ngara ruah so Egypt; ngara dŭh siŭn dog jua jadi urun.

⁴³ Dŭhnyah kasar ngga ngara, pak taru meh Tapa ngan.

⁴⁴ Kambŭi angān biguna di urun, angān siŭn miris so bangsa bangsa bŭkŭn adi maning angān.

⁴⁵ Angān siŭn gŭh miris anak anak daya pinami adi rŭŭ bigaur ngga angān. Anak anak adi mun anŭ adi dog biranak di tarun tana ngan siŭn jadi keya ka buat-rata ngan.

⁴⁶ Angān siŭn gŭh nggen ngara ndu bisaka ka bara anak ngan, adi ngara dŭh siŭn dŭh yŭn bituan sitŭkŭd umbur ngara. Pak angān dŭh siŭn kasar ngga tadŭ tadŭ dingan ngan adi samah daya Israel.

⁴⁷ Nyamtadar-i, kambŭi ndi naan daya pinami adi rŭŭ bigaur ngga angān jadi kaya, ka agi kada daya Israel jadi sirata ka jua adŭp-i jadi urun di daya pinami anŭ, puan kah di ndi naan daya so rawang daya pinami anŭ.

⁴⁸ Ripas ayŭh muko dog jua, ayŭh gibabŭ biyŭn hak dog miris pari. Ndi so jurud-i puan kah

⁴⁹ tua samba-i puan kah bitungar-i, puan kah dingan madis-i siŭn miris ayŭh pari; bait kah kambŭi ayŭh biyŭn duit, ayŭh bisa bayar yŭn pirupas adŭp-i.

⁵⁰ Ayŭh dŭh siŭn dŭh an bisiken ngga sianŭ adi ko miris adŭp-i, ka ngara dŭh siŭn dŭh an mirang sawa so sibungas andu adi ngga ayŭh jua adŭp-i ndŭg ka Sawa Pinyipari adi re mandŭg, ka ngŭtŭ rega yŭn pinyirupas-i nanyam ka gaji adi dog bayar ka daya-gaji.

^51-52 Ayŭh dŭh siŭn dŭh an pari kada rega-i nunda ka kiang sawa adi dŭm,

⁵³ keya ka daya adi nyiraja burong sawa ka dog bayar gaji di tŭbŭn sawa. Tuan-i dŭh siŭn kasar ngga ayŭh.

⁵⁴ Kambŭi ayŭh dŭh dog pirupas nunda ka ndi so aran anŭ, ayŭh ngga bara anak-i dŭh siŭn dŭh dog pirupas darŭm Sawa Pinyipari adi re mandŭg.

⁵⁵ Tadŭ tadŭ daya Israel dŭh siŭn ruro jadi urun, sabab daya Israel taŭn mbŭh jadi urun TUHAN. Ayŭh piruah ngara so Egypt; Ayŭh inŭh TUHAN adi Tapa ngara.