LEVITICUS 24 - Hakcipta - Biatah Bidayuh

Sita Prita

¹ TUHAN kidaan di Moses

² da nggen atur ati ka daya Israel: Taban aŭn inyo kanā adi siabo kana yŭn dudu prita di darŭm Bari TUHAN isa prita ari sakŭt.

³ Barang singumi andu Aaron siŭn tung prita prita anŭ ka bada-i adu adu sakŭt ndŭg isan isan, darŭm Bari TUHAN di sapa tabir adi di jawin Pati Simanya di Yŭn adi Siabo Kudus. Atur-adat ati an adu adu dog sita.

⁴ Aaron siŭn sita prita prita adi di rika prita adi dog ndai so tigŭrŭ mas, ka dŭh siŭn dŭh bada-i sakŭt barang singumi andu darŭm Bari TUHAN.

Ruti adi Dog Jugan ka Tapa

⁵ Tambit simŭng-duwŭh kilogram tibaduk ka ndai simŭng-duwŭh baru ruti.

⁶ Tipan baru ruti anŭ bada duwŭh jari, nŭm di barang jari, di tunduh mija adi dog marut ngga tigŭrŭ mas, adi darŭm Bari TUHAN.

⁷ Na kada aŭn kimanyan di tunduh barang jari, ngga nandā ruti anŭ sadis pinguman ka TUHAN.

⁸ Barang andu Sabbath, yŭn adu adu, ruti anŭ dŭh siŭn dŭh dog na di darŭm Bari TUHAN. Ati inŭh kayuh adi Israel dŭh siŭn dŭh ndai adu adu.

⁹ Ruti anŭ mbŭh tung Aaron ngga bara sesang-i, ka ngara siŭn man-i di tarun yŭn adi kudus, amai-i kada so sadis pinguman adi raru kudus adi mbŭh dog jugan ka TUHAN yŭn bara imam.

Suto Ukum adi Tŭnggŭn ngga adi Batur

^10-11 Agi ndi naan dari adi daya Egypt sama-i, ka sindŭ-i daya Israel dŭn Shelomith, anak Dibri so tibaran-asar Dan. Di tarun yŭn bibari dari anŭ bikaii ngga ndi naan daya Israel. Sitadŭn kaii anŭ ayŭh mangu TUHAN, jadi ngara taban ayŭh ka yŭn Moses,

¹² jaga ayŭh, ka kajŭn TUHAN kidaan di ngara simuki re ngga ayŭh.

¹³ TUHAN nang di Moses,

¹⁴ “Taban daya anŭ ruah so tarun yŭn bibari. Barang naan daya adi agi dingah ayŭh bipangu siŭn na tangan-i di tunduh ubak daya anŭ ngga kidaan ayŭh sarah, komŭnŭ sopŭrŭg daya Israel siŭn manjan ayŭh ngga batuh ndŭg kabŭs.

¹⁵ Komŭnŭ, kidaan di daya Israel nang tadŭ tadŭ daya adi mangu Tapa dŭh siŭn dŭh dog ndai simŭnŭ,

¹⁶ dog ukum kabŭs. Tadŭ tadŭ daya Israel puan kah daya pinami adi rŭŭ di Israel, adi mangu TUHAN dŭh siŭn dŭh dog manjan sopŭrŭg daya Israel ngga batuh ndŭg kabŭs.

¹⁷ “Tadŭ daya adi siŭ daya siŭn dog ukum kabŭs,

¹⁸ ka tadŭ daya adi siŭ dāng daya bŭkŭn dŭh siŭn dŭh an gati-i. Rati-i inŭh asŭng gati asŭng.

¹⁹ “Kambŭi tadŭ so angān bada daya biragan, anŭ adi angān ndai di ayŭh re dog ndai gŭh di angān.

²⁰ Kambŭi angān bada turang daya pata, tung jangān turang siŭn dog mata gŭh; kambŭi angān bada ndi batŭh daya karak, ndi so tung jangān re dog bada karak gŭh. Kambŭi angān mata ndi jipŭh daya, ndi so tung jangān re dog mata gŭh. Ani ani adi ndai ngan di daya ngga bada ayŭh mandam re dog maras di angān.

²¹ Asi asi adi siŭ dāng siŭn gati-i, pak asi asi adi siŭ manusia re dog ukum kabŭs.

²² Ukum-adat ati yŭn sopŭrŭg ngan, daya Israel ngga daya pinami adi rŭŭ bigaur ngga angān, amai Aku ati TUHAN adi Tapa ngan.”

²³ Kan Moses muko nang sakanŭ di daya Israel, ngara taban daya anŭ ruah ka sapa tarun yŭn bibari ka manjan ayŭh ngga batuh ndŭg kabŭs. Simŭnŭ inŭh daya Israel ndai nanyam adi TUHAN ko pesan di Moses.