LEVITICUS 23 - Hakcipta - Biatah Bidayuh

Gawai Adat

¹ TUHAN nggen di Moses

² atur-adat ati yŭn gawai adat, di tika daya Israel tikuruk simayang:

³ Angān biyŭn nŭm andu ngga ndai kraja ngan, pak ingat andu adi ju, andu Sabbath, adi ngga angān rŭŭ. Di andu anŭ dŭhnyah nyiraja, pak tikuruk simayang. Sabbath inŭh andu adi dog nitah yŭn TUHAN, dŭh kira diki diki angān rŭŭ.

⁴ Piagah gawai gawai adat ati di tipuh adi mbŭh dog miratak:

Gawai Paska ngga Gawai Ruti Dŭh-Biragi

⁵ Gawai Paska, dog sita ngga stabi di TUHAN, piguru so simŭdŭp batŭh andu dog ngga andu adi simŭng-pat darŭm sibungas buran.

⁶ Ngga andu adi simŭng-rimŭh di tipuh Gawai Ruti dŭh-Biragi, ka sitŭkŭd ju andu angān dŭh siŭn man ruti adi biragi.

⁷ Di sibungas andu darŭm tipuh anŭ angān siŭn tikuruk simayang, ka dŭhnyah ndai kraja adi angān ndai barang andu.

⁸ Jugan sadis pinguman ngan ka TUHAN yŭn tipuh ju andu. Di andu adi ju angān siŭn tikuruk simayang dinge, pak dŭhnyah ndai kraja adi angān ndai barang andu.

^9-10 Kan di tipuh angān mŭrŭt ka tarun tana adi TUHAN nggen di angān, ka angān ngatŭm buwa gandom ngan, taban sibungas bŭtŭs jangut ngan ka imam.

¹¹ Imam re jugan-i ndu pinganggen adi grua ka TUHAN, isa angān bisa dog trima. Imam anŭ re jugan pinganggen anŭ ka TUHAN ripas andu Sabbath.

¹² Andu adi ngga angān jugan sadis gandom, andu anŭ gŭh nyadis ndi anak biri adi dari adi ndi sawa umbur-i buang adi pidanah ndu sadis badang.

¹³ Samah ngga sadis anŭ angān siŭn jugan duwŭh kilogram tibaduk bigaur ngga inyo kanā ndu sadis pinguman. Dagŭn sadis anŭ pimunos asŭng TUHAN. Pak angān siŭn jugan gŭh samah ngga sadis anŭ ndi lita wain.

¹⁴ Dŭh diŭ man sibungas buwa gandom ngan, puan kah adi mata, adi dog nyirandang puan kah adi dog ndai bada jadi ruti, kambŭi gibayuh dog jugan ka Tapa. Atur-adat ati an adu adu dog sita sesang ngan.

Gawai Pingatŭm

¹⁵ Mirang bada sukup ju minggu so andu ripas andu Sabbath adi ngga angān taban bŭtŭs buwa gandom ngan yŭn jugan ka TUHAN.

¹⁶ Ngga andu adi rimŭh-puru, anŭ inŭh ripas Sabbath adi ju, jugan dinge ka TUHAN sadis gandom adi bauh.

¹⁷ Barang rawang an taban duwŭh baru ruti ka jugan-i ka TUHAN ndu pinganggen adi grua. Ndi baru ruti an dog ndai so duwŭh kilogram tibaduk bigaur ngga ragi ka dog jugan ka TUHAN ndu pinganggen buwa bungas adi siabo kana adi mbŭh dog ngatŭm.

¹⁸ Jadi samah ngga ruti anŭ daya Israel siŭn gŭh jugan ju anak biri adi gi-ndi sawa umbur-i, ndi dari sapi, ka duwŭh dari biri; sopŭrŭg dāng anŭ an adi pidanah. Dāng dāng anŭ siŭn dog jugan ndu sadis badang ka TUHAN, samŭn sadis ruwang kayuh ngga sadis wain. Dagŭn sadis anŭ pimunos asŭng TUHAN.

¹⁹ Ka dinge jugan ndi dari kambing ndu sadis taran dosa, ka duwŭh anak biri adi dari adi ndi sawa umbur-i ndu sadis bidingan.

²⁰ Imam anŭ siŭn jugan baru ruti anŭ samŭn duwŭh anak biri anŭ ndu pinganggen adi grua ka TUHAN yŭn bara imam. Sopŭrŭg sadis anŭ kudus.

²¹ Di andu anŭ angān dŭhnyah ndai kraja adi angān ndai barang andu, pak tikuruk simayang. Bara sesang ngan siŭn adu adu sita atur-adat ati, dŭh puan nang diki diki ngara rŭŭ.

²² Kan angān ngatŭm ŭmŭh ngan, dŭhnyah ngatŭm anŭ adi di bŭngŭn irah, ka dinge dŭhnyah pari di sun reru; tandah anŭ yŭn daya adi sirata ka yŭn daya pinami. TUHAN inŭh Tapa ngan.

Gawai Sawa Bauh

^23-24 Di sibungas andu darŭm buran adi ju, sita andu adi dog nitah ngga rŭŭ, ka samah tikuruk simayang kan trompet jawŭn.

²⁵ Jugan sadis pinguman ka TUHAN, ka dŭhnyah ndai kraja adi angān ndai barang andu.

Andu Pingapun Dosa

^26-27 Andu adi simŭng darŭm buran adi ju, inŭh andu adat sawa adi siŭn dog pimanu ngga taran dosa daya bagŭ. Di andu anŭ dŭhnyah sikari kari man tadŭ kayuh. Mandŭg tikuruk simayang buang jugan sadis pinguman ka TUHAN.

²⁸ Dŭhnyah ndai tadŭ mun kraja di andu anŭ, amai anŭ inŭh andu adi ngga angān pimanu adat adi ngga taran dosa.

²⁹ Tadŭ daya adi man tadŭ kayuh di andu anŭ, re dŭh tia dog nyirundeng daya Tapa.

³⁰ Jadi kambŭi agi daya ndai tadŭ masam kraja di andu anŭ, adŭp Tapa re siŭ daya anŭ.

³¹ Atur-adat ati inŭh yŭn sopŭrŭg sesang ngan, dŭh puan nang diki diki ngara rŭŭ.

³² So simŭdŭp batŭh andu di andu adi numbor prii darŭm buran anŭ ndŭg simŭdŭp batŭh andu di andu adi simŭng, sita andu anŭ bada jadi andu adi dog nitah ngga rŭŭ, ka dŭh man ani ani.

Gawai Bari-Dawŭn

^33-34 Gawai Bari-Dawŭn piguru so andu adi simŭng-rimŭh darŭm buran ju ka dog pijuu ndŭg ju andu.

³⁵ Di sibungas andu darŭm tipuh anŭ, mandŭg tikuruk simayang, ka dŭhnyah ndai kraja adi angān ndai barang andu.

³⁶ Barang andu sitŭkŭd ju andu, angān siŭn jugan sadis pinguman. Ngga andu adi mai angān siŭn mandŭg dinge tikuruk simayang ka jugan sadis pinguman. Anŭ inŭh andu adi ngga angān simayang, ka angān dŭhnyah ndai tadŭ mun kraja. (

³⁷ Ati inŭh gawai adat adi ngga angān kibās TUHAN darŭm angān tikuruk simayang buang jugan sadis pinguman, sadis badang, sadis ruwang kayuh, sadis sadis, samŭn sadis wain, nanyam adi dog guna barang andu.

³⁸ Gawai gawai anŭ inŭh ngga nambah andu andu Sabbath adi ari angān sita; ka dudu sadis anŭ inŭh ngga nambah pinganggen adi angān ari jugan, mun sadis adi ngga bada payu bitŭtŭk, ka sadis adi dog jugan ka TUHAN so pinyiraan atin adŭp.)

³⁹ Kan angān muko ngatŭm ŭmŭh ngan, sita gawai pingatŭm yŭn tipuh ju andu, piguru so andu adi simŭng-rimŭh darŭm buran ju. Sibungas andu inŭh dog nitah jadi andu ngga rŭŭ.

⁴⁰ Di andu anŭ tambit buwa pimuruh ngan adi siabo kana, tambit gŭh daan daan kurma ka daan dawŭn kayuh adi pidawŭn, ka pinguru ndai gawai adat adi ngga kibās TUHAN adi Tapa ngan.

⁴¹ Sita gawai anŭ sitŭkŭd ju andu. Atur-adat ati siŭn adu adu dog sita bara sesang ngan.

⁴² Sopŭrŭg daya Israel siŭn rŭŭ di bari-dawŭn ju andu,

⁴³ isa bara sesang ngan puan nang TUHAN mbŭh bada daya Israel rŭŭ di bari-dawŭn kan Ayŭh taban ngara ruah so Egypt. Ayŭh inŭh TUHAN adi Tapa ngan.

⁴⁴ Simŭnŭ inŭh Moses nggen di daya Israel atur-adat ngga sita gawai gawai adat ngga kibās TUHAN.