LEVITICUS 20 - Hakcipta - Biatah Bidayuh

Ukum yŭn Daya adi Dŭh Dingah Pinganang

¹ TUHAN kidaan di Moses,

² da minyu di daya Israel, “Asi asi so angān puan kah daya pinami adi rŭŭ bigaur ngga angān nggen tadŭ tadŭ anak-i yŭn dog pakai ngga nyambah tapa Molech siŭn dog manjan sopŭrŭg daya Israel ngga batuh ndŭg ka kabŭs.

³ Kambŭi tadŭ so angān nggen ndi naan so anak-i ka Molech ka nyembar Bari Ku, buang pimangŭh adŭn kudus Ku, Aku re ngukum ayŭh ka dŭh re nyirundeng ayŭh daya Ku.

⁴ Pak kambŭi bara daya Israel dŭh piduri kayuh adi ayŭh mbŭh ndai, ka dŭh siŭ ayŭh,

⁵ adŭp Aku re mandŭg di ngukum ayŭh samŭn sopŭrŭg di rawang-i samŭn sopŭrŭg ngara adi sua dŭh tŭtŭd di Aku amai nyambah Molech. Aku re dŭh tia nyirundeng ngara daya Ku.

⁶ “Kambŭi tadŭ so angān mite pinyitayan so daya adi bisiken ngga roh daya adi mbŭh kabŭs, Aku re ngukum ayŭh ka re dŭh tia nyirundeng ayŭh daya Ku.

⁷ Bada adŭp ngan kudus, sabab Aku ati TUHAN adi Tapa ngan.

⁸ Tunda ukum-adat Ku, sabab Aku ati TUHAN adi bada angān kudus.”

⁹ TUHAN nggen atur-adat ati: Asi asi angān adi mangu sama ngan puan kah sindŭ ngan siŭn dog nggen ukum kabŭs; angān dapu tanggong di pinyikabŭs adŭp ngan.

¹⁰ Kambŭi daya tanggah ngga sawŭn dingan-i adi daya Israel, so-duwŭh dari ngga dayung anŭ siŭn dog ukum kabŭs.

¹¹ Daya adi raban ngga ndi naan so bara sawŭn nyama-i, mbŭh pimangŭh sama-i, jadi so-duwŭh dari ngga dayung anŭ siŭn dog ukum kabŭs. Ngara tanggong di pinyikabŭs adŭp ngara.

¹² Kambŭi daya raban ngga iban dayung-i, so-duwŭh ngara siŭn dog ukum kabŭs. Ngara mbŭh raban, ka tanggong di pinyikabŭs adŭp ngara.

¹³ Kambŭi dari bisiket ngga dari adi bŭkŭn, ngara mbŭh ndai kayuh adi sipŭ, ka so-duwŭh ngara siŭn dog ukum kabŭs. Ngara tanggong di pinyikabŭs adŭp ngara.

¹⁴ Kambŭi dari sawŭn dayung samŭn sindŭ-i, so-taruh ngara siŭn dog badang ndŭg ka kabŭs, amai kayuh adi ngara ndai sawŭ mbŭh raru sipŭ. Kayuh adi mun anŭ dŭh patut jadi di dupan ngan.

¹⁵ Kambŭi dari birambang ngga dāng, ayŭh ngga dāng anŭ siŭn dog siŭ.

¹⁶ Kambŭi dayung suba an bada dāng nyirambang adŭp-i, dayung ngga dāng anŭ siŭn dog ukum kabŭs. Ngara tanggong di pinyikabŭs adŭp ngara.

¹⁷ Kambŭi dari sawŭn sude dayung adŭp-i, puan kah sude tiri-i, ngara an dog pimangŭh di sirung jawin daya bagŭ, ka dog pibu so dupan bara daya Israel. Ayŭh muko raban ngga sude-i, jadi dŭh siŭn dŭh dapu tanggong di sarah anŭ.

¹⁸ Kambŭi dari nyibŭŭs ngga dayung adi gi-aŭn kais nandā buran-i, so-duwŭh ngara an dog pibu so dupan bara daya Israel, amai ngara mbŭh miranggar atur-adat pasar kayuh adi kais nanyam ka adat.

¹⁹ Kambŭi ndi naan dari raban ngga tua-i adi dayung, so-duwŭh ngara dŭh siŭn dŭh dapu tanggong di sarah anŭ.

²⁰ Kambŭi daya raban ngga sawŭn tua-i, ayŭh pimangŭh tua-i, jadi ayŭh ngga dayung anŭ siŭn dog ukum; mating katŭn so ngara duwŭh re biyŭn anak.

²¹ Kambŭi daya tambit sawŭn jurud-i ndu sawŭn, ngara re dŭh mira biranak ndŭg ka kabŭs. Dari anŭ mbŭh ndai kayuh adi kais nanyam ka adat ka mbŭh pimangŭh jurud-i.

²² TUHAN nang, “Sita sopŭrŭg ukum-adat samŭn pesan Ku, isa angān dŭh dog tirawan tarun tana Canaan adi ka Aku taban angān.

²³ Dŭhnyah tunda adat bara daya adi rŭŭ diginŭ; Aku aŭn pibu ngara anŭ isa angān bisa mŭrŭt tarun tana anŭ. Ngara mbŭh kinuas Aku ngga sopŭrŭg kraja pingandai ngara adi arap.

²⁴ Pak Aku mbŭh bijanji re nggen di angān tarun tana anŭ adi kaya ngga damŭn ndu bisaka ngan, ka Aku taŭn re nggen-i di angān. Aku ati TUHAN adi Tapa ngan, ka Aku mbŭh nyidŭrŭ angān so bangsa bangsa bŭkŭn.

²⁵ Anŭ sabab-i angān dŭh siŭn dŭh an nakit ngatŭn dāng ngga manuk adi bisig ngga kais nanyam ka adat. Dŭhnyah man dāng bait manuk adi kais. Aku mbŭh kadŭn-i kais. Kambŭi angān man-i angān re kais.

²⁶ Angān dŭh siŭn dŭh kudus ka mbŭh tung jaku, sabab Aku ati TUHAN ka Aku ati kudus. Aku mbŭh nyidŭrŭ angān so bangsa bangsa bŭkŭn, isa Aku sadi adŭ dapu angān.

²⁷ “Tadŭ tadŭ dari bait dayung adi bisiken ngga roh roh daya adi mbŭh kabŭs siŭn dog manjan ngga batuh ndŭg ka kabŭs; tadŭ tadŭ so angān adi ndai kayuh anŭ dapu tanggong di pinyikabŭs adŭp-i.”