LEVITICUS 17 - Hakcipta - Biatah Bidayuh

Pinyikudus Deya

¹ TUHAN pesan Moses

² da nggen di Aaron ngga anak anak-i ka sopŭrŭg daya Israel atur-adat ati:

^3-4 Tadŭ tadŭ daya Israel adi siŭ sapi, biri puan kah kambing ndu sadis ka TUHAN, di tadŭ yŭn ripas so di tiban Bari TUHAN mbŭh miranggar Ukum-adat. Ngara mbŭh piruah deya ka mbŭh dŭh tia dog nyirundeng daya Tapa.

⁵ Rati pesan ati inŭh: daya Israel madin an taban ka TUHAN dāng dāng adi siraru ngara siŭ di sapa rais. Ngara madin siŭn taban dāng dāng anŭ ka imam di tiban Bari TUHAN ka siŭ-i ndu sadis bidingan.

⁶ Imam siŭn naui deya anŭ di barang parad mija-sambah di tiban Bari, ka badang ramak-i siŭn-i piruah dagŭn adi pimunos asŭng TUHAN.

⁷ Daya Israel dŭh siŭn tia dŭh tŭtŭd di TUHAN, anŭ inŭh siŭ dāng ngara di sapa tarun ndu sadis yŭn umot-kambing. Daya Israel dŭh siŭn dŭh an adu adu sita atur-adat ati.

⁸ Tadŭ tadŭ daya Israel puan kah daya pinami adi rŭŭ di ruang daya Israel, adi jugan sadis badang puan kah tadŭ tadŭ sadis adi bŭkŭn

⁹ ndu pinganggen ka TUHAN di tarun bŭkŭn ripas so tiban Bari TUHAN re dŭh tia dog nyirundeng daya Tapa.

¹⁰ Kambŭi tadŭ tadŭ daya Israel, puan kah daya pinami adi rŭŭ di ruang daya Israel man dagin dāng adi gibabŭ bideya, TUHAN re rawan ngara anŭ ka dŭh an ngaku ngara daya-I.

¹¹ Asŭng sopŭrŭg kayuh adi udip agi di deya-i, sabab anŭ meh TUHAN mbŭh pesan nang sopŭrŭg deya an dog ren di tunduh mija-sambah ngga taran dosa daya bagŭ. Deya, adi taŭn asŭng, taran dosa daya.

¹² Anŭ inŭh sabab TUHAN mbŭh kidaan di daya Israel nang ngara, puan kah daya pinami adi rŭŭ di ruang ngara, dŭh siŭn man dagin adi gibabŭ bideya.

¹³ Kambŭi tadŭ tadŭ daya Israel, puan kah daya pinami adi rŭŭ di ruang daya Israel, nakap dāng puan kah manuk adi bisig nanyam ka adat, ngara dŭh siŭn dŭh basen deya-i di tana ka napuk-i ngga tana.

¹⁴ Asŭng sopŭrŭg kayuh adi udip taŭn di deya, sabab anŭ meh TUHAN mbŭh kidaan di daya Israel nang ngara dŭh siŭn man tadŭ tadŭ dagin adi gibabŭ bideya, ka tadŭ tadŭ daya adi man dagin adi gibabŭ bideya mbŭh dŭh tia dog nyirundeng daya-I.

¹⁵ Tadŭ tadŭ daya, daya Israel puan kah daya pinami, adi man dagin dāng adi kabŭs sadi adŭp-i, puan kah adi kabŭs dog siŭ dāng tarun, dŭh siŭn dŭh ngu piraka-i, ka mamuh adŭp-i, ka kajŭn ndŭg singumi andu sibayuh ngara pari jadi bisig nanyam ka adat.

¹⁶ Kambŭi ngara dŭh tunda atur-adat anŭ, ngara re dapu tanggong di sarah anŭ.