LEVITICUS 16 - Hakcipta - Biatah Bidayuh

Andu Pingapun Dosa

¹ TUHAN minyu di Moses ripas pinyikabŭs anak dari Aaron adi duwŭh madis amai jugan apui adi dŭh kudus ka TUHAN.

² Ayŭh nang, “Kidaan di jurud mu Aaron nang, adŭ-i di tipuh adi patut ayŭh siŭn mŭrŭt ka Yŭn adi Siabo Kudus di punok tabir, amai diginŭ inŭh Aku nandŭng darŭm abun nyirungan tŭtŭp Pati Simanya. Kambŭi ayŭh miranggar atur anŭ, ayŭh re kabŭs.

³ Ayŭh siŭn mŭrŭt ka Yŭn adi Siabo Kudus adŭ-i ripas ayŭh muko taban ndi pŭrŭng dari sapi adi gi-mara yŭn sadis taran dosa ka ndi dari biri yŭn sadis badang.”

⁴ Komŭnŭ TUHAN nggen atur adat ati: Diŭ so Aaron mŭrŭt ka Yŭn adi Siabo Kudus, ayŭh dŭh siŭn dŭh mamuh ka kasŭk piraka imam: jipo-ambu linen ngga sinjang rajut, abŭt kupong ngga bubok.

⁵ Bara daya Israel siŭn nggen di Aaron duwŭh dari kambing yŭn sadis taran dosa, ka ndi dari biri yŭn sadis badang.

⁶ Ayŭh siŭn jugan dari sapi ndu sadis ngga taran dosa adŭp-i ngga dosa rawang-i.

⁷ Komŭnŭ ayŭh siŭn tambit dari kambing anŭ adi duwŭh ka taban-i ka tiban Bari TUHAN.

⁸ Diginŭ ayŭh siŭn taran dadu pakai duwŭh batuh, ndi dog nandā, “Yŭn TUHAN” ka anŭ ndi dog nandā “Yŭn Azazel.”

⁹ Aaron siŭn nyadis kambing anŭ adi dog mien pakai taran-dadu yŭn TUHAN ka jugan-i yŭn sadis taran dosa.

¹⁰ Kambing anŭ adi dog mien yŭn Azazel siŭn dog jugan udip udip-i ka TUHAN, rasu dog pirupas bada bu ka yŭn Azazel, siŭn taran dosa daya bagŭ.

¹¹ Kan Aaron nyadis dari sapi anŭ ndu sadis taran dosa adŭp-i ngga rawang-i,

¹² ayŭh siŭn tambit tipaku apui adi brisi ngga bam apui adi so mija-sambah ngga duwŭh agŭm kimanyan adi anŭk, ka taban mŭrŭt ka Yŭn adi Siabo Kudus.

¹³ Ka diginŭ di sirung jawin TUHAN ayŭh siŭn na kimanyan di bam apui, ka asuh kimanyan anŭ re grindung tŭtŭp Pati Simanya isa ayŭh dŭh kiris-i ka dŭh kabŭs.

¹⁴ Ayŭh siŭn tambit kada deya sapi anŭ ka pakai trinju-i ngga masik-i di parad ka jawin tŭtŭp anŭ, ka masik kada-i pikuju kari di parad ka jawin adŭp Pati Simanya.

¹⁵ Ripas anŭ ayŭh siŭn siŭ kambing anŭ yŭn sadis taran dosa daya bagŭ, ka taban deya-i mŭrŭt ka Yŭn adi Siabo Kudus, ka masik-i di tunduh tŭtŭp anŭ ka di parad ka jawin adŭp Pati Simanya anŭ nimun ayŭh mbŭh masik deya sapi tejah.

¹⁶ Simŭnŭ inŭh ayŭh pimanu adat pibisig yŭn Yŭn adi Siabo Kudus so pinyikais daya Israel ngga so sopŭrŭg dosa ngara. Ayŭh dŭh siŭn dŭh ndai anŭ di Bari TUHAN, amai-i mijog di ruang tarun yŭn daya Israel bibari, adi mbŭh kais nanyam ka adat.

¹⁷ So jam adi ngga Aaron mŭrŭt Yŭn adi Siabo Kudus pimanu adat pibisig ndŭg ka ayŭh ruah so nŭ, daya dŭh siŭn agi di darŭm Bari TUHAN. Kan ayŭh mbŭh ngamas adat pibisig yŭn adŭp-i, rawang-i, ka yŭn sopŭrŭg daya Israel,

¹⁸ ayŭh dŭh siŭn dŭh ruah di ka yŭn mija-sambah yŭn sadis badang ka pibisig-i. Ayŭh dŭh siŭn dŭh tambit kada deya sapi ngga kada deya kambing ka susen-i di sopŭrŭg junggir adi di barang sikuh mija-sambah anŭ.

¹⁹ Ayŭh siŭn pakai trinju-i ngga masik kada deya anŭ pikuju kari di tunduh mija-sambah. Simŭnŭ inŭh ayŭh pibisig-i so dosa daya Israel, ka bada-i kudus.

Kambing Gŭrŭng Dosa

²⁰ Kan Aaron mbŭh ngamas pimanu adat pibisig yŭn Yŭn adi Siabo Kudus, yŭn tarun tarun bŭkŭn darŭm Bari TUHAN, ka yŭn mija-sambah, ayŭh siŭn jugan ka TUHAN kambing anŭ adi gibabŭ udip adi dog mien yŭn Azazel.

²¹ Ayŭh siŭn na so-duwŭh tangan-i di tunduh ubak kambing anŭ ka ngaku di tunduh-i sopŭrŭg arap, dosa ngga sopŭrŭg pinyakar adi arap adi muko daya Israel ndai, ngga mindah sopŭrŭg sarah anŭ ka ubak kambing anŭ. Komŭnŭ kambing anŭ siŭn dog taban ndi naan daya adi ko dog tijuan, ngga bu ka tarun tana-pajam.

²² Kambing anŭ re gŭrŭng sopŭrŭg dosa ngara ngga di ka tarun tana-pajam adi mating daya rŭŭ dieh.

²³ Komŭnŭ Aaron siŭn mŭrŭt Bari TUHAN, kadi piraka imam adi ko-i kasŭk di adŭp-i diŭ so-i mŭrŭt ka Yŭn adi Siabo Kudus, ka tingge-i diginŭ.

²⁴ Ayŭh dŭh siŭn dŭh mamuh adŭp-i di tarun yŭn adi kudus rasu kasŭk piraka adŭp-i. Ripas anŭ, ayŭh siŭn ruah ka sapa ka jugan sadis badang ngga kadi dosa adŭp-i ngga dosa daya bagŭ.

²⁵ Ayŭh siŭn badang di tunduh mija-sambah ramak dāng anŭ adi muko dog nitah yŭn sadis taran dosa.

²⁶ Daya anŭ adi dog tijuan da taban kambing ngga bu ka tarun tana-pajam ka yŭn Azazel, dŭh siŭn dŭh ngu piraka-i ka mamuh adŭp-i diŭ so-i pari maad ka tarun yŭn daya bibari.

²⁷ Sapi ngga kambing anŭ adi deya-i dog pakai yŭn sadis taran dosa adi dog taban ka Yŭn adi Siabo Kudus ngga taran dosa, siŭn dog taban ka sapa tarun yŭn bibari ka dog badang bada rŭpŭg. Sopŭrŭg kurit-i, isin-i, ka kuboi-i an dog badang gŭh.

²⁸ Daya adi badang kayuh anŭ dŭh siŭn dŭh ngu piraka-i, ka mamuh adŭp-i diŭ so-i pari maad ka tarun yŭn bibari.

Sita Andu Pingapun Dosa

²⁹ Atur-adat ati dŭh siŭn dŭh adu adu dog sita: Di andu adi simŭng darŭm buran adi ju, daya Israel ngga daya pinami adi rŭŭ bigaur ngga ngara dŭh siŭn dŭh bipusa ka dŭh siŭn ndai tadŭ tadŭ mun kraja.

³⁰ Di andu anŭ, ngara dŭh siŭn dŭh pimanu adat adi ngga pibisig adŭp-i, isa ngara jadi bisig nanyam ka adat.

³¹ Andu anŭ siŭn jadi andu adi raru kudus, andu adi ngga ngara bipusa ka dŭh ndai tadŭ mun kraja. Atur-adat ati dŭh siŭn dŭh adu adu dog sita.

³² Imam bās, adi ko dog garar ngga adat adi batur ngga gati sama-i, siŭn pimanu adat pibisig. Ayŭh siŭn nēn piraka imam-i.

³³ Ayŭh siŭn pimanu adat pibisig ngga pibisig Yŭn adi Siabo Kudus, tarun tarun bŭkŭn darŭm Bari TUHAN, mija-sambah, imam imam, ka sopŭrŭg daya Israel.

³⁴ Atur-adat ati dŭh siŭn dŭh adu adu dog sita. Adat ati dŭh siŭn dŭh dog pimanu ndi sidah darŭm ndi sawa ngga pibisig daya Israel so sopŭrŭg dosa ngara. Jadi Moses ndai nimun TUHAN mbŭh pesan.