LEVITICUS 13 - Hakcipta - Biatah Bidayuh

Ukum-adat jeja ka Andam Kurit

¹ TUHAN nggen di Moses ngga Aaron atur-adat ati.

² Kambŭi tadŭ so angān biyŭn bakang puan kah pirakis, puan kah bŭ adi bisa marui jadi andam kurit adi bisā, daya anŭ siŭn dog taban ka yŭn imam adi so asar Aaron.

³ Imam anŭ siŭn piruh bakang anŭ, ka kambŭi buruh adi timbu dieh mbŭh marui buda ka bakang anŭ rōng buang tŭrŭp dŭ so kurit di bŭngŭn-i, anŭ inŭh andam kurit adi bisā. Ka imam anŭ siŭn pikadŭn daya anŭ kais.

⁴ Pak kambŭi bakang anŭ buda ka dŭh rōng ka dŭh tŭrŭp dŭ so kurit di bŭngŭn-i, ka buruh dieh dŭh marui buda, imam anŭ siŭn pijo daya anŭ so daya bagŭ sitŭkŭd ju andu.

⁵ Imam anŭ siŭn piruh daya anŭ dinge di andu adi ju, ka kambŭi di pikir-i, bakang anŭ mun mun-i, ka dŭh rarā, ayŭh siŭn pijo daya anŭ so daya bagŭ sitŭkŭd ju andu dinge.

⁶ Imam anŭ siŭn piruh daya anŭ di andu adi ju dinge; ka kambŭi bakang anŭ mbŭh asab ka dŭh rarā, ayŭh siŭn pikadŭn daya anŭ bisig nanyam ka adat, amai anŭ mbŭh bakang braŭn adŭ. Daya anŭ siŭn ngu piraka-i ka jadi bisig nanyam ka adat.

⁷ Pak kambŭi bakang anŭ pari bŭ ka rarā ripas imam muko piruh ayŭh ka pikadŭn ayŭh bisig, daya anŭ dŭh siŭn dŭh pari ka imam anŭ.

⁸ Imam anŭ siŭn piruh ayŭh dinge, ka kambŭi bakang anŭ mbŭh rarā dinge, imam siŭn pikadŭn ayŭh kais; anŭ inŭh mbŭh andam kurit adi bisā.

⁹ Kambŭi tadŭ so angān biyŭn andam kurit adi bisā, daya anŭ siŭn dog taban ka yŭn imam,

¹⁰ adi re piruh ayŭh. Kan agi bakang adi buda di kurit-i, adi bada buruh buda, ka puno ngga pinana,

¹¹ anŭ mbŭh andam kurit adi bisā. Imam anŭ siŭn pikadŭn daya anŭ kais; daya anŭ dŭhsah dog pijo so daya bagŭ, amai ayŭh mbŭh giranan kais.

¹² Kambŭi andam kurit anŭ papah ka raput pŭrŭng-i so ubak ndŭg kaja,

¹³ imam siŭn piruh daya anŭ dinge. Kambŭi ayŭh kiris nang sawŭ mbŭh raput pŭrŭng-i, ayŭh siŭn pikadŭn daya anŭ bisig nanyam ka adat. Kambŭi kurit daya anŭ mbŭh marui buda ndi tarun tarun, daya anŭ bisig nanyam ka adat.

¹⁴ Pak so andu bakang adi bipuse timbur, daya anŭ mbŭh kais.

¹⁵ Imam anŭ siŭn piruh daya anŭ dinge, ka kambŭi ayŭh kiris bakang adi bipuse, ayŭh siŭn pikadŭn daya anŭ kais. Bakang adi bipuse inŭh andam kurit adi bisā, ka daya anŭ inŭh mbŭh kais.

¹⁶ Pak kan bakang anŭ bua ka pari buda dinge, daya anŭ siŭn di ka yŭn imam,

¹⁷ adi re piruh ayŭh dinge. Kambŭi bakang anŭ marui buda, daya anŭ mbŭh bisig nanyam ka adat, ka imam siŭn pikadŭn ayŭh bisig.

¹⁸ Kambŭi tadŭ so angān biyŭn pirakis adi mbŭh bua,

¹⁹ ka kan bŭ adi buda puan kah tapo adi bireh buda timbur di arok pirakis anŭ, daya anŭ siŭn di ka yŭn imam.

²⁰ Imam anŭ siŭn piruh daya anŭ, ka kambŭi tapo anŭ mun adi rōng ka tŭrŭp so kurit adi di bŭngŭn-i, ka buruh dieh marui buda, ayŭh siŭn pikadŭn daya anŭ kais. Anŭ inŭh andam kurit adi bisā adi piguru so pirakis anŭ.

²¹ Pak kambŭi imam piruh ka dapŭd nang buruh di bakang anŭ dŭh marui buda, buang rōng-i dŭh tŭrŭp so kurit adi di bŭngŭn-i, pak mara bireh, imam anŭ siŭn pijo daya anŭ sitŭkŭd ju andu.

²² Kambŭi tapo anŭ rarā, imam siŭn pikadŭn daya anŭ kais; daya anŭ mbŭh dog andam kurit adi bisā.

²³ Pak kambŭi tapo anŭ dŭh birubah ka dŭh gŭh rarā, anŭ mbŭh arit pirakis adi mbŭh bua, ka imam siŭn pikadŭn daya anŭ bisig nanyam ka adat.

²⁴ Kambŭi daya raus, ka raus anŭ marui buda puan kah bireh buda,

²⁵ imam siŭn piruh daya anŭ. Kambŭi buruh adi di tapo anŭ mbŭh marui buda, ka mbŭh rōng tŭrŭp dŭ so kurit adi di bŭngŭn-i, anŭ inŭh andam kurit adi bisā adi mbŭh timbur so raus anŭ; ka imam siŭn pikadŭn daya anŭ kais.

²⁶ Pak kambŭi buruh dieh dŭh marui buda, ka rōng-i dŭh tŭrŭp so kurit adi di bŭngŭn-i, ka dŭh gŭh takod singŭt, imam siŭn pijo daya anŭ sitŭkŭd ju andu.

²⁷ Imam siŭn piruh daya anŭ dinge di andu adi ju, ka kambŭi-i rarā, anŭ mbŭh andam kurit adi bisā, ka imam siŭn pikadŭn daya anŭ kais.

²⁸ Pak kambŭi tapo anŭ dŭh birubah ka dŭh gŭh rarā, buang mara bireh, anŭ dŭh andam kurit adi bisā. Imam siŭn pikadŭn daya anŭ bisig nanyam ka adat, amai-i arit raus adŭ.

²⁹ Kan tadŭ so angān, dari bait dayung, biyŭn bakang di ubak puan kah di raang,

³⁰ imam siŭn piruh-i. Kambŭi-i mun adi tŭrŭp dŭ so kurit adi di bŭngŭn-i ka buruh dieh sia ka jarang, anŭ inŭh andam kurit adi bisā, ka ayŭh siŭn pikadŭn daya anŭ kais.

³¹ Kambŭi di tika imam piruh daya anŭ, ka bakang anŭ dŭh rōng tŭrŭp dŭ so kurit adi di bŭngŭn-i, pak buruh adi tiranah mating dieh, ayŭh siŭn pijo daya anŭ sitŭkŭd ju andu.

³² Imam siŭn piruh bakang anŭ di andu adi ju, ka kambŭi-i dŭh rarā ka mating buruh adi sia dieh, buang dŭh gŭh rōng tŭrŭp dŭ so kurit adi di bŭngŭn-i,

³³ daya anŭ siŭn nundo ubak-i pak kidŭm ubok adi di bŭngŭn bakang anŭ. Imam siŭn pijo daya anŭ sitŭkŭd ju andu dinge.

³⁴ Di andu adi ju, imam siŭn piruh bakang anŭ dinge; ka kambŭi-i dŭh rarā ka dŭh gŭh rōng tŭrŭp dŭ so kurit adi di bŭngŭn-i, ayŭh siŭn pikadŭn daya anŭ bisig nanyam ka adat. Daya anŭ siŭn ngu piraka-i ka ayŭh re jadi bisig.

³⁵ Pak kambŭi bakang anŭ rarā ripas ayŭh muko dog pikadŭn bisig,

³⁶ imam siŭn piruh ayŭh dinge. Kambŭi bakang anŭ rarā, imam dŭhsah jiroh buruh adi sia dieh; mbŭh giranan daya anŭ kais.

³⁷ Pak kambŭi di pikir imam bakang anŭ dŭh rarā, ka buruh adi tiranah agi timbu dieh, bakang anŭ mbŭh bua, ka imam siŭn pikadŭn daya anŭ bisig nanyam ka adat.

³⁸ Kan tadŭ so angān dari bait dayung biyŭn tapo tapo adi buda di kurit-i,

³⁹ imam siŭn piruh daya anŭ. Kambŭi tapo tapo anŭ dŭh paŭh takod buda, anŭ kaŭs-i takar adi timbur di kurit-i; daya anŭ inŭh bisig nanyam ka adat.

^40-41 Kambŭi ubok daya ruruh di tura ka punok puan kah di tura ka jawin ubak-i, anŭ dŭh bada ayŭh kais.

⁴² Pak kambŭi bakang adi bireh buda timbur di yŭn anŭ adi badu, anŭ inŭh andam kurit adi bisā.

⁴³ Imam siŭn piruh daya anŭ, ka kambŭi agi bakang adi bireh buda dieh,

⁴⁴ imam siŭn pikadŭn daya anŭ kais, amai andam kurit adi bisā anŭ di ubak-i.

⁴⁵ Kambŭi daya dog andam kurit adi bisā, daya anŭ dŭh siŭn dŭh nēn piraka adi ranjang rasas, dŭhsah nyinod ubok-i, nutu jawin-i di tura ka sagān, ka ngga sirŭŭn bana nang, “Kais kais!”

⁴⁶ Daya anŭ taŭn babŭ kais sitŭkŭd ayŭh babŭ dog andam anŭ, ka ayŭh dŭh siŭn dŭh rŭŭ di sapa tarun yŭn bibari, jo so daya bŭkŭn.

Ukum-adat Jeja ka Kurat Andam

⁴⁷ Kambŭi agi kurat andam di piraka, bait-i di piraka adi dog ndai so buruh biri puan kah so banang linen,

⁴⁸ puan kah di tadŭ supek banang linen puan kah di supek banang adi dog ndai so buruh biri, puan kah di birurang, puan kah di tadŭ kayuh adi dog ndai so birurang,

⁴⁹ kambŭi-i barŭm puan kah bireh, anŭ inŭh kurat andam adi papah ka dŭh siŭn dŭh dog kiren di imam.

⁵⁰ Imam siŭn piruh-i ka nyidŭrŭ nyikŭn-i sitŭkŭd ju andu.

⁵¹ Ayŭh siŭn piruh-i dinge di andu adi ju, ka kambŭi kurat anŭ agi papah, kayuh anŭ mbŭh kais.

⁵² Imam siŭn badang-i amai-i kurat andam adi papah, ka dŭh siŭn dŭh dog badang ngga apui.

⁵³ Pak kambŭi, di tipuh kayuh anŭ dog piruh, ka imam anŭ dapŭd kurat anŭ dŭh papah di kayuh anŭ,

⁵⁴ ayŭh siŭn bada kayuh anŭ dog ngu ka dog nyidŭrŭ bada pagŭng sitŭkŭd ju andu dinge.

⁵⁵ Komŭnŭ ayŭh siŭn piruh-i, ka kambŭi kurat anŭ dŭh birubah kala-i sunggu-i dŭh papah, kayuh anŭ babŭ kais; angān dŭh siŭn dŭh badang kayuh anŭ bait-i adi madam tura ka jawin puan kah tura ka punok.

⁵⁶ Pak kambŭi di tika imam piruh-i dinge, kala anŭ mbŭh asab, ayŭh siŭn nyiratak kadi-i so piraka puan kah birurang anŭ.

⁵⁷ Jadi, kambŭi kurat anŭ timbur dinge, kurat anŭ mbŭh papah dinge, ka daya adi dapu kayuh anŭ siŭn badang-i.

⁵⁸ Kambŭi ayŭh ngu kayuh anŭ, ka tapo anŭ tikadi, ayŭh siŭn ngu-i dinge, ka kayuh anŭ re jadi bisig nanyam ka adat.

⁵⁹ Ati inŭh ukum-adat pasar kurat andam adi di piraka, dŭh puan nang di piraka adi dog ndai so buruh biri puan kah so banang linen, puan kah adi dog adŭp banang linen puan kah banang buruh biri, puan kah tadŭ kayuh adi dog ndai so birurang; simŭnŭ inŭh pingatur-i jeja ka kayuh adi bisig ngga kais nanyam ka adat.