LEVITICUS 11 - Hakcipta - Biatah Bidayuh

Dāng adi Siŭn dog Man

¹ TUHAN nggen di Moses ngga Aaron atur-adat ati

^2-3 yŭn daya Israel: Angān siŭn man tadŭ tadŭ dāng deyŭh adi tipire tinjug-i ka adi ngunyai pinguman so kundi-i,

^4-6 pak angān dŭh siŭn man onta, dŭngŭn batuh, ka rebit. Dāng dāng ati dŭh siŭn dŭh dog nyirundeng kais; ngara ngunyai pinguman so kundi-i, pak tinjug-i dŭh tipire.

⁷ Dŭhnyah man ayo. Ngara dŭh siŭn dŭh dog nyirundeng kais; tinjug ngara tipire pak ngara dŭh ngunyai pinguman so kundi-i.

⁸ Dŭhnyah man dāng dāng anŭ puan kah tama tadang-i, dāng dāng anŭ kais.

⁹ Angān siŭn man tadŭ tadŭ iken adi bisirimed ngga bisisik,

^10-12 pak tadŭ tadŭ dāng adi udip darŭm piin adi dŭh bisirimed ngga bisisik dŭh siŭn dog man. Dāng dāng adi mun anŭ dŭh siŭn dŭh dog nyirundeng kais. Angān dŭh siŭn man puan kah tama tadang-i. Angān dŭh siŭn man tadŭ tadŭ dāng adi dŭh bisirimed ngga dŭh bisisik adi udip darŭm piin.

^13-19 Angān dŭh siŭn man tadŭ tadŭ manuk ati: beuh, bo, beuh-sise, manuk nasar, manuk gagak, manuk volcha, manuk kak; manuk onta; manuk iken rawŭt, barang masam bangau, manuk undan, manuk kosa, kadā;

²⁰ Sopŭrŭg anak kayuh piurad inŭh kais,

²¹ adŭ-i adi minyakir.

²² Angān siŭn man kadis baga, kadis sikirik, puan kah kadis biasa.

²³ Pak sopŭrŭg adi sŭ ka piurad, samŭn adi bigawang dŭh siŭn dŭh dog nyirundeng kais.

^24-28 Kambŭi angān tama tadang dāng dāng ati, angān re kais ndŭg singumi andu: sopŭrŭg dāng adi bitinjug, pak adŭ-i adi tipire tinjug-i ka ngunyai pinguman so kundi-i ka sopŭrŭg dāng adi biyŭn pat kaja adi bisirŭh. Kambŭi angān gŭrŭng puan kah tawid tadang dāng ati, angān dŭh siŭn dŭh ngu piraka ngan, pak angān gibabŭ gŭh kais ndŭg singumi andu.

^29-30 Barang masam babu, bait tibug dŭh siŭn dŭh dog nyirundeng kais.

³¹ Asi asi adi tama tadang dāng anŭ re kais ndŭg singumi andu.

³² Kambŭi tadang tadang dāng anŭ rabu nyatŭk tadŭ tadŭ kayuh, kayuh anŭ jadi kais; bait-i pimakai adi dog ndai so kayuh, ka piraka, birurang, puan kah guni, dŭh kira ani guna-i; kayuh anŭ patut dog kurom darŭm piin, pak-i gibabŭ kais ndŭg singumi andu.

³³ Ka kan tadang dāng dāng anŭ rabu nyatŭk priok tana, sopŭrŭg isi priok anŭ mbŭh jadi kais, ka angān dŭh siŭn dŭh mape priok anŭ.

³⁴ Tadŭ tadŭ pinguman adi bisa dog man, pak muko dog nyijuh piin adi so priok adi kais, re jadi kais; ka tadŭ tadŭ mun piin nok adi darŭm priok anŭ mbŭh jadi kais gŭh.

³⁵ Ani bait ani adi yŭn tadang kayuh ko rabu inŭh kais. Tuku apui tana puan kah oven-tana dŭh siŭn dŭh dog mape,

³⁶ pak rubang piin ngga tong piin dŭh kais, sunggu tadŭ tadŭ kayuh bŭkŭn adi muko dog tadang anŭ mbŭh jadi kais.

³⁷ Kambŭi ndi so tadang anŭ rabu nyatŭk bine adi re dog purun, ruwang bine anŭ gibabŭ bisig.

³⁸ Pak kambŭi bine anŭ dog kurom darŭm piin, ka ndi so tadang anŭ rabu nyatŭk-i, ruwang bine anŭ jadi kais.

³⁹ Kambŭi tadŭ tadŭ dāng adi bisa dog man kabŭs, tadŭ tadŭ daya adi tama tadang-i re jadi kais ndŭg singumi andu.

⁴⁰ Ka kambŭi tadŭ so angān man tatad dāng anŭ, angān dŭh siŭn dŭh ngu piraka ngan, pak angān re gibabŭ kais ndŭg singumi andu. Tadŭ tadŭ angān adi gŭrŭng tadang dāng anŭ dŭh siŭn dŭh ngu piraka ngan, pak angān gibabŭ kais ndŭg singumi andu.

⁴¹ Angān dŭh siŭn man tadŭ tadŭ dāng adi sŭ adi panu di tana,

⁴² bait-i adi bigawang, puan kah panu ngga pat kaja, puan kah adi bagŭ kaja-i.

⁴³ Dŭhnyah kinais adŭp ngan man tadŭ mun dāng anŭ.

⁴⁴ Aku ati TUHAN adi Tapa ngan, ka angān dŭh siŭn dŭh bada adŭp ngan adu adu kudus, amai Aku ati kudus.

⁴⁵ Aku ati TUHAN adi taban angān ngga ruah so Egypt isa Aku bisa jadi Tapa ngan. Angān dŭh siŭn dŭh kudus, amai Aku ati kudus.

⁴⁶ Anŭ inŭh ukum-adat pasar dāng dāng ngga manuk manuk; pasar sopŭrŭg kayuh adi udip darŭm piin, ngga sopŭrŭg adi udip di deyŭh.

⁴⁷ Angān dŭh siŭn dŭh an nakit ngatŭn ani adi sŭn adat nang bisig ngga ani adi kais, di dupan dāng adi siŭn dog man ngga dāng adi dŭh siŭn dog man.