LEVITICUS 10 - Hakcipta - Biatah Bidayuh

Dosa Nadab ngga Abihu

¹ Anak Aaron adi dŭn Nadab ngga Abihu masin masin tambit tipaku apui, na bam apui dieh, nambah kimanyan, ka jugan-i ka TUHAN. Pak apui anŭ dŭh kudus amai TUHAN dŭh bada ngara jugan-i.

² Gŭgŭh TUHAN pait apui da badang ngara ndŭg ka kabŭs di darŭm Bari TUHAN.

³ Komŭnŭ Moses nang di Aaron, “Ati inŭh kayuh adi TUHAN mbŭh kidaan kan-I nang, ‘Sopŭrŭg daya adi bituan di Aku, dŭh siŭn dŭh an stabi di pinyikudus Ku; Aku re pinandŭng bragah Ku di daya Ku.’ ” Pak Aaron pirŭŭ adŭp-i adŭ.

⁴ Moses bagan Mishael ngga Elzaphan anak Uzziel, tua dari Aaron, ka nang di ngara, “Mandŭg kamati ka tawek tadang madis ngan ngga bu so Bari TUHAN, ka na-i di sapa tarun yŭn bibari.”

⁵ Jadi ngara mandŭg ka bidigŭng di piraka tadang tadang anŭ ngara tawek-i ka sapa tarun yŭn bibari nunda ka adi Moses ko pesan.

⁶ Komŭnŭ Moses nang di Aaron ngga anak-i Eleazar ngga Ithamar, “Dŭhnyah tandah ubok ngan dŭh dog nyinod, puan kah nyiratak piraka ngan ngga kiren adŭp ngan ngurid. Kambŭi angān ndai simŭnŭ, angān re kabŭs, ka TUHAN re baji di sopŭrŭg daya Israel. Pak sopŭrŭg daya Israel adi bŭkŭn bisa ngurid di pinyikabŭs anŭ adi jadi so apui adi TUHAN mbŭh pait.

⁷ Dŭhnyah tagan tiban Bari TUHAN, angān kabŭs rai-i, sabab angān muko dog nyikudus ngga inyo kudus TUHAN.” Sawŭ meh ngara ndai nimun adi Moses ko kidaan.

Atur Yŭn bara Imam

⁸ TUHAN nang di Aaron,

⁹ “Kuu ngga anak anak dari mu dŭh siŭn mŭrŭt Bari Ku ripas ko nok wain, puan kah nok adi bisā; kambŭi angān ndai simŭnŭ, angān re kabŭs. Ati inŭh ukum-adat adi sopŭrŭg sesang ngan patut sita.

¹⁰ Angān dŭh siŭn dŭh ngatŭn kayuh adi TUHAN dapu, so anŭ adi mbŭh kanyet dog pakai, so kayuh adi bisig ngga anŭ adi kais.

¹¹ Angān dŭh siŭn dŭh an ngajar bara daya Israel sopŭrŭg ukum-adat adi ko Aku nggen di angān so Moses.”

¹² Moses nang di Aaron ngga anak-i adi dŭm duwŭh madis Eleazar ngga Ithamar, “Tambit tadŭh sadis ruwang kayuh so pinguman adi muko dog jugan ka TUHAN, ka ndai ruti adi dŭh biragi, ka man-i sindŭk mija-sambah, sabab sadis anŭ inŭh raru kudus.

¹³ Man-i di tarun yŭn adi kudus, amai anŭ inŭh utung yŭn mu ngga bara anak dari mu so sadis pinguman adi mbŭh dog jugan ka TUHAN. Anŭ inŭh kayuh adi TUHAN ko pesan di aku.

¹⁴ Pak kuu ngga bara rawang mu bisa man isin sudo ngga sape-i adi ko dog jugan ndu pinganggen adi grua ngga pinganggen ka TUHAN adi dog nitah yŭn bara imam. Angān siŭn man-i di tadŭ yŭn adi bisig nanyam ka adat. Sopŭrŭg pinganggen anŭ mbŭh dog nggen di angān ngga bara anak ngan jadi utung adi angān dapu so sadis bidingan daya Israel.

¹⁵ Ngara siŭn taban sape anŭ samŭn isin sudo anŭ di tipuh ramak-i dog jugan ndu sadis pinguman ka TUHAN. Sopŭrŭg anŭ, angān ngga bara anak ngan adu adu dapu, nanyam ka adi TUHAN ko pesan.”

¹⁶ Moses siken pasar kambing adi mbŭh dog nitah ndu sadis taran dosa, pak ayŭh dog kidaan nang dāng anŭ mbŭh dog badang. Anŭ bada ayŭh baji di Eleazar ngga Ithamar, ka ayŭh babŭ siken,

¹⁷ “Mani angān dŭh man sadis taran dosa anŭ di tarun yŭn adi kudus? Anŭ kayuh adi raru kudus, ka TUHAN mbŭh nggen-i di angān isa angān pakai-i ngga taran dosa daya Israel.

¹⁸ Amai angān dŭh taban deya-i ngga mŭrŭt ka Bari TUHAN, angān patut man sadis anŭ diginŭ gŭh, nanyam adi aku ko pesan.”

¹⁹ Aaron nam, “Kambŭi aku man sadis taran dosa anŭ andu ati, re TUHAN nyibandar kah? Bara daya mbŭh jugan sadis taran dosa ka TUHAN andu ati, ka ngara taban gŭh sadis badang, pak kayuh adi raru arap ati mbŭh dog aku.”

²⁰ Kan Moses dingah pinganang anŭ, asŭng-i puas.