JOSHUA 9 - Hakcipta - Biatah Bidayuh

Bara Daya Gibeon Nipu Joshua

¹ Pimanang daya Israel darŭm perang mbŭh dog puan bara raja adi rŭŭ tura ka barat Jordan — di gadung sandah, di sigŭn dudu sandah, ka di ndi abong tarun rabak mapang Rawŭt Mediterranean jeh ka utara ndŭg Lebanon. Ngara anŭ inŭh raja daya Hitti, raja daya Amor, raja daya Canaan, raja daya Periz, raja daya Hivi, ngga raja daya Jebus.

² Ngara anŭ bipekat ka nguruk adŭp-i yŭn re rawan Joshua ngga bara daya Israel.

³ Pak bara daya Gibeon adi daya Hivi, mbŭh dingah kayuh adi Joshua mbŭh ndai di Jericho ngga di Ai,

⁴ ka ngara rasu ndai pikir-i an nipu ayŭh. Ngara matak ka taban di tunduh kaldi pinguman darŭm guni adi mbŭh tiratak ngga bŭrŭh-kurit adi bitapung.

⁵ Ngara nēn piraka adi mbŭh ranjang rasas ka kasut adi dog napung. Ngara taban ruti adi mbŭh badŭh ka bikurat.

⁶ Ngara di ka tarun yŭn bibari di Gilgal ka nang di Joshua ngga di bara daya Israel, “Kieh mandŭg so tarun adi jo. Kieh raan angān ndai ndi pekat-damai ngga kieh.”

⁷ Pak bara daya Israel nang, “Re ngga mani kieh ndai pekat-damai ngga angān? Kadŭ-i angān rŭŭ di arong ati.”

⁸ Ngara nang di Joshua, “Kieh ati urun mai.” Joshua siken ngara, “Asi angān? So ki pimandŭg ngan?”

⁹ Ka ngara kidaan di ayŭh dundan sakati: “Kieh mandŭg so tarun tana adi raru jo, tuan, sabab kieh mbŭh dingah pasar TUHAN adi Tapa ngan. Kieh mbŭh dingah barang masam kayuh adi-I mbŭh ndai di Egypt

¹⁰ samŭn kayuh adi mbŭh-I ndai di duwŭh naan raja daya Amor tura ka timor Jordan, anŭ inŭh Raja Sihon so Heshbon ngga Raja Og so Bashan, adi rŭŭ di Ashtaroth.

¹¹ Bara pinguru ami samŭn sopŭrŭg daya adi rŭŭ di tarun tana ami bada kieh sidia pinguman yŭn pimanu ami di dapŭd kaam. Kieh mbŭh dog kidaan bada jadi urun mai ka mite kaam ndai ndi pekat-damai ngga kieh.

¹² Tingga masam ruti ami. Di andu kieh tingge ramin arŭn ami di tudu kaam, ruti ati babŭ ngumat. Pak tingga! Madin ayŭh mbŭh badŭh ka bikurat.

¹³ Di andu kieh ngisi bŭrŭh-kurit ati, ayŭh babŭ bauh, pak tingga! Madin ayŭh mbŭh tiratak. Piraka ngga kasut ami mbŭh rusak sabab pimanu adi jo.”

¹⁴ Bara daya Israel trima kada pinguman so ngara pak dŭh bisiken ngga TUHAN pasar kayuh anŭ.

¹⁵ Joshua ndai pekat-damai ngga daya Gibeon ka dŭh siŭ ngara. Bara pinguru daya Israel bipayu an sita pekat-damai anŭ.

¹⁶ Taruh andu ripas pekat-damai anŭ mbŭh dog ndai, bara daya Israel puan nang ngara anŭ sawŭ rŭŭ di arong anŭ dŭh jo so ngara.

¹⁷ Jadi bara daya Israel matak ka panu, ka taruh andu ripas anŭ ngara mandŭg ka kupo kupo adi yŭn ngara anŭ rŭŭ: Gibeon, Chephirah, Beeroth, ka Kiriath Jearim.

¹⁸ Pak bara daya Israel dŭh dapŭd siŭ ngara, sabab bara pinguru ngara muko bipayu ngga ngara ngga adŭn TUHAN, adi Tapa Israel. Sopŭrŭg daya Israel mbŭh mingungut di bara pinguru pasar kayuh anŭ,

¹⁹ pak ngara nam, “Ata muko bipayu ngga ngara ngga adŭn TUHAN adi Tapa Israel. Madin ata dŭh bisa ida ida ngga ngara.

²⁰ Ata dŭh siŭn dŭh tandah ngara udip amai janji ta; kambŭi dŭh, Tapa re ngukum ata.

²¹ Tandah ngara udip, pak ngara re tukang kapŭg uwang ka muat piin yŭn ta.” Anŭ inŭh adi bara pinguru mbŭh kira.

²² Joshua bada bara daya Gibeon dog taban ka yŭn adŭp-i; ka-i siken ngara, “Mani angān nipu kieh, nang adŭp ngan mandŭg so tarun adi raru jo pŭn ka angān rŭŭ di arong ati?

²³ Sabab angān mbŭh ndai simŭnŭ, Tapa mbŭh ngukum angān. Angān re adu adu jadi urun, tukang kapŭg uwang ka muat piin yŭn ramin Tapa ku.”

²⁴ Ngara nam, “Kieh ndai-i, tuan, sabab kieh mbŭh puan nang taŭn-i sawŭ inŭh TUHAN adi Tapa mai mbŭh pesan urun-I Moses bada kubo nggen tarun tana ati ka kaam ka siŭ sopŭrŭg daya adi rŭŭ dieh buang mai masang biperang. Kieh ndai simŭnŭ sabab kieh taru kaam; kieh siŭt asŭng ami.

²⁵ Madin kieh mbŭh di darŭm kuasa mai; ndai di kieh nimun adi batur di pikir mai.”

²⁶ Jadi anŭ inŭh kayuh adi Joshua mbŭh ndai: ayŭh grindung ngara ka dŭh bada daya Israel siŭ ngara.

²⁷ Pak simŭnŭ gŭh ayŭh bada ngara jadi urun tukang kapŭg uwang ka muat piin yŭn daya Israel ka yŭn mija-sambah TUHAN. Ndŭg andu ati ngara babŭ ndai kraja anŭ di tarun adi TUHAN mbŭh mien yŭn adŭp-I dog nyambah.