JOSHUA 8 - Hakcipta - Biatah Bidayuh

Kupo Ai dog Pirabur

¹ TUHAN nang di Joshua, “Taban sopŭrŭg soldadu ka di ka kupo Ai. Dŭhnyah taru bait jimŭ. Aku re nggen di angān pimanang, ngarah raja di Ai; bara daya-i, kupo-i, ngga tana-i re jadi tung jangān.

² Angān siŭn ndai di kupo Ai ngga raja-i nimun anŭ adi muko angān ndai di Jericho ngga raja-i, pak kari ati angān siŭn tambit buat-rata so dieh samŭn dāng kudip yŭn adŭp ngan. Sidia meh yŭn re nyerang kupo anŭ pakai gaya adi nyirŭgŭh so punok-i.”

³ Jadi Joshua sidia adŭp-i re di nyerang kupo Ai ngga sopŭrŭg soldadu-i. Ayŭh mien taruh puru ribu naan bara soldadu-i adi pagan ka pait ngara bada matak singarŭm

⁴ ngga atur ati: “Bisukan di parad mandi kupo anŭ, pak dŭhnyah paŭh jo; ka sidia yŭn re nyerang.

⁵ Aku ngga bara ku re masang tudu kupo anŭ. Kan daya Ai ruah di rawan kieh, kieh re bu, nimun adi mbŭh ata ndai sibungas-i.

⁶ Ngara re tadak kieh ndŭg ka ngara mbŭh jo so kupo. Ngara re pikir kieh bu mangān ngara, nimun adi mbŭh ata ndai dawŭ-i.

⁷ Nganŭ meh angān ruah so tarun yŭn ngan bisukan ka sirabut kupo anŭ. TUHAN adi Tapa ngan re nggen-i di angān.

⁸ Ripas angān muko sirabut kupo anŭ, angān rasu sigot-i, nimun adi mbŭh TUHAN pesan. Anŭ inŭh atur yŭn ngan.”

⁹ Jadi Joshua bada ngara matak, ka ngara di ka tarun adi yŭn bisukan ka kajŭn diginŭ, tura ka barat Ai, di asah Ai ngga Bethel. Ngarŭm anŭ Joshua nyirŭmŭn di yŭn ngara bibari.

¹⁰ Awar Isan isan, Joshua makat ka bagan bara soldadu-i bada tikuruk. Ka Joshua ngga bara pinguru Israel nguru ngara matak di ka kupo Ai.

¹¹ Bara soldadu adi ayō Joshua masang panu nuju tiban-bās kupo Ai ka bibari di parad ka utara, ka agi rubān di asah ngara ngga kupo Ai.

¹² Ayŭh taban 5000 naan bara-i ka bada ngara bisukan di parad ka barat kupo anŭ, di asah Ai ngga Bethel.

¹³ Bara soldadu dog ngatur yŭn biperang, anŭ inŭh bara adi so bari mbit tura ka utara kupo, ka bara adi bŭkŭn mbit tura ka barat. Joshua nyirŭmŭn di rubān ngarŭm anŭ.

¹⁴ Kan raja kupo Ai kiris bara soldadu Joshua, ayŭh ngga bara daya-i bigaut matak ka Rubān Jordan di nyerang bara daya Israel di tarun adi yŭn ngara ko ngarah ngara dawŭ-i, dŭh rada adŭp ngara re dog nyerang so punok.

¹⁵ Joshua ngga bara-i ndai adŭp ngara bada mun adi ngundur, bu nuju tarun tana-matung.

¹⁶ Sopŭrŭg daya adi darŭm kupo Ai mbŭh dog bada tadak ngara, ka darŭm ngara tadak Joshua, ngara mbŭh makin dŭ dŭ jo so kupo.

¹⁷ Barang naan dari darŭm kupo Ai mbŭh ruah tadak bara daya Israel, ka kupo Ai mbŭh rapā, amai mating daya jaga-i.

¹⁸ Ka TUHAN nang di Joshua, “Tiju Ai ngga jarok mu; Aku nggen-i di kuu.” Joshua ndai nimun dog bada,

¹⁹ ka kan ayŭh pakat tangan-i, bara soldadu-i adi bisukan rasu ruah, bikaduh ka darŭm kupo ka sirabut-i. Ngara rasu sigot kupo anŭ.

²⁰ Kan bara daya so kupo Ai kimat punok, ngara kiris asuh bijambung ka rangit. Mbŭh mating gaya ngara re bikaduh bu amai bara daya Israel adi ko bu ka tarun tana-matung madin mbŭh pari di nyerang ngara.

²¹ Kan Joshua ngga bara-i kiris bara adi bŭkŭn mbŭh sirabut kupo Ai ka mbŭh sigot-i, ngara pari ka piguru siŭ bara daya Ai.

²² Bara daya Israel adi darŭm kupo Ai ruah ka sua nyerang ngara. Jadi daya Ai mbŭh dog nyikapung bara daya Israel, ka sopŭrŭg daya Ai abo dog siŭ. Ndi naan mating tungang bu ka ndi naan mating gŭh udip

²³ adŭ-i raja Ai. Ayŭh dog nakap ka dog taban ka yŭn Joshua.

²⁴ Bara daya Israel siŭ barang naan pinganyu di tarun tana-matung di yŭn ngara ko dog tadak. Komŭnŭ ngara pari ka kupo Ai ka siŭ barang naan daya diginŭ.

^25-26 Joshua gibabŭ tiju kupo Ai ngga jarok-i, ka dŭh pasan-i ndŭg ka barang naan daya diginŭ mbŭh dog siŭ. Sopŭrŭg daya adi rŭŭ di Ai dog siŭ andu anŭ; prungun-i agi 12,000 naan dari ngga dayung.

²⁷ Bara daya Israel tambit yŭn adŭp ngara dāng kudip ngga buat buat-rata adi dog sirapas di kupo anŭ, nimun adi ko TUHAN kidaan di Joshua.

²⁸ Jadi Joshua sigot kupo Ai ka tandah-i jadi tibawang ndŭg andu ati.

²⁹ Ayŭh kideng raja Ai di atuh kayuh ka tandah tadang-i diginŭ ndŭg singumi andu. Ngga simŭdŭp batŭh andu Joshua nggen ukum bada tadang-i dog kadi, ka-i dog taran dŭh jo so tiban-bās kupo. Ngara nugung tibande batuh di tunduh tadang-i, adi gibabŭ diginŭ ndŭg andu ati.

Ukum-Adat dog Basa di Darŭd Ebal

³⁰ Komŭnŭ Joshua pijog ndi mija-sambah yŭn TUHAN, adi Tapa Israel, di Darŭd Ebal.

³¹ Ayŭh pijog-i nanyam atur adi Moses, adi urun TUHAN mbŭh nggen di bara daya Israel, nimun adi dog nang di Ukum-adat Moses: “mija-sambah dog ndai so batuh adi dŭh dog mŭŭt ngga pingakas basi.” Di tunduh-i ngara jugan sadis badang ka TUHAN, ka ngara jugan gŭh sadis bidingan ngara.

³² Di tunduh mija-sambah anŭ, ka di sirung jawin bara daya Israel, Joshua nuris di batuh batuh anŭ Ukum-adat nimun adi Moses ko nuris.

³³ Bara daya Israel, ngga bara pinguru ngara, bara pingubak, ka bara akim, samŭn bara daya pinami adi rŭŭ bigaur ngga ngara, mijog di duwŭh parad Pati Simanya TUHAN, nura bara imam adi so asar Levi adi tawid-i. Sitangah so bara daya Israel mijog nyipunok Darŭd Gerizim, ka sitangah adi bŭkŭn mijog nyipunok Darŭd Ebal. Moses adi urun TUHAN muko pesan ngara bada ndai simŭnŭ kan-i mbŭh tipuh adi ngga ngara kambat berkat.

³⁴ Joshua basa meh tŭngŭn ukum-adat anŭ ngga sirŭŭn bana, samŭn pinganang berkat ngga pinganang pangu, nimun adi mbŭh dog nuris darŭm surat Ukum-adat.

³⁵ Barang Pinyipesan Moses dog basa Joshua di sirung jawin daya bagŭ adi agi tikuruk diginŭ, samŭn bara dayung ngga anak-anya, ngga bara daya pinami adi agi rŭŭ bigaur ngga ngara.