JOSHUA 6 - Hakcipta - Biatah Bidayuh

Pinyirabu Jericho

¹ Tiban-bās Jericho dog tŭŭp ka dog jaga isa daya Israel dŭh tungang mŭrŭt. Mating daya tungang mŭrŭt puan kah ruah so kupo anŭ.

² TUHAN nang di Joshua, “Aku na Jericho ka darŭm tangan mu, samŭn raja-i ngga sopŭrŭg soldadu-i adi pagan.

³ Kuu ngga bara soldadu mu an panu maning kupo anŭ ndi sidah ndi andu yŭn tipuh nŭm andu.

⁴ Ju naan imam, barang naan digen ndi trompet, an panu diŭ di jawin Pati Simanya. Ngga andu adi ju kuu ngga bara soldadu mu an panu maning kupo anŭ pikuju kari darŭm bara imam mambak trompet ngara.

⁵ Komŭnŭ ngara an mambak trompet ngga jawŭn adi tui. Kan angān dingah jawŭn anŭ, sopŭrŭg daya an nyirais bana, ka sindung sindung kupo anŭ re rubuh. Nganŭ bara soldadu siŭn nyurong mŭrŭt ka darŭm kupo anŭ.”

⁶ Joshua bagan bara imam ka nang di ngara, “Tawid Pati Simanya, ka ju naan angān siŭn panu diŭ di jawin-i digen trompet.”

⁷ Komŭnŭ ayŭh mritah bara daya da piguru panu maning kupo anŭ, ngga ndi tibaran soldadu adi panu diŭ di jawin Pati Simanya TUHAN.

^8-9 Jadi, nimun adi Joshua mbŭh ngatur, ndi tibaran soldadu piguru panu di jawin bara imam adi mambak trompet; di punok ngara, bara imam adi tawid Pati Simanya, dog tunda ndi tibaran soldadu. Sitadŭn anŭ, trompet taŭn dŭh rŭŭ rŭŭ jawŭn.

¹⁰ Pak Joshua muko mritah bara daya bada dŭh nyirais, dŭh minyu ndi bang piminyu ndŭg ka ayŭh mbŭh bada.

¹¹ Jadi Joshua bada tibaran anŭ taban Pati Simanya TUHAN maning kupo anŭ ndi sidah. Komŭnŭ ngara maad ka tarun yŭn bibari ka nyirŭmŭn diginŭ.

^12-13 Joshua awar makat andu jawa ndi, ka anŭ mbŭh saba adi duwŭh adi ngga bara imam ngga bara soldadu panu maning kupo anŭ nimun adi muko ngara ndai di andu adi diŭ: tibaran soldadu adi diŭ panu di jawin; komŭnŭ, bara imam adi ju naan adi mambak ju trompet; komŭnŭ, bara imam adi tawid Pati Simanya TUHAN; ka sikasŭn-i, ndi tibaran soldadu di punok. Sitadŭn anŭ, dudu trompet anŭ dŭh rŭŭ rŭŭ dog mambak.

¹⁴ Di andu anŭ adi duwŭh, ngara panu maning kupo anŭ ndi sidah adŭ. Komŭnŭ ngara pari, maad ka bari. Ngara ndai simŭnŭ birijut nŭm andu.

¹⁵ Ngga andu adi ju, ngara makat ngga arong siri jawa, ka panu maning kupo anŭ pikuju kari nimun adi mbŭh — andu anŭ adŭ ngara panu maning kupo anŭ pikuju kari.

¹⁶ Kari adi ju, kan bara imam mbŭh re mambak trompet ngara, Joshua bada bara daya nyirais, ka-i nang, “TUHAN mbŭh nggen kupo ati di angān!

¹⁷ Kupo anŭ ngga sopŭrŭg kayuh adi darŭm-i dŭh siŭn dŭh kubo dog pirabur ndu pinganggen ka TUHAN. Adŭ-i Rahab, dayung sundar anŭ ngga ramin arŭn-i siŭn dog tandah, amai ayŭh muko sukan pinyiong ta.

¹⁸ Pak angān dŭhnyah tambit tadŭ kayuh adi re dog pirabur; kambŭi angān tambit, angān re taban pinyusah ngga pinyirusag ka bari bari daya Israel.

¹⁹ Sopŭrŭg kayuh adi dog ndai so pirak, mas, timaga, puan kah basi mbŭh dog nitah yŭn TUHAN. Kayuh kayuh anŭ re dog na di darŭm pinyirikŭn-rata TUHAN.”

²⁰ Jadi bara imam mambak trompet. Ka kan bara daya bagŭ dingah-i, ngara rasu nyirais, ka sindung kupo rubuh. Komŭnŭ sopŭrŭg bara soldadu Israel rasu maad sandah ka nyerang kupo anŭ ka sirabut-i.

²¹ Ngara siŭ barang naan daya di darŭm kupo ngga pedang, dari dayung adi gi-mara ngga adi mbŭh minyamba. Ngara siŭ gŭh sapi, biri ngga kaldi.

²² Joshua kidaan di duwŭh naan ngara anŭ adi muko jadi pinyiong, “Di ka ramin dayung sundar anŭ, ka taban ayŭh ngga rawang-i ngga ruah, nimun adi angān muko bijanji ngga ayŭh.”

²³ Jadi ngara taban Rahab ngga ruah, samŭn sindŭ sama-i, bara jurud dari-i, ngga sopŭrŭg adi bŭkŭn darŭm rawang-i. Ngara taban sopŭrŭg ngara, bara jurud madis ngga bara urun, ngga di ka tarun yŭn adi siramat sindŭk tarun yŭn daya Israel bibari.

²⁴ Komŭnŭ ngara sigot kupo anŭ ndŭg ka rŭpŭg, samŭn barang masam kayuh adi darŭm-i, adŭ-i kayuh kayuh adi dog ndai so mas, pirak, timaga, ngga basi, adi ngara tambit ka na di darŭm pinyirikŭn-rata TUHAN.

²⁵ Pak Joshua dŭh siŭ Rahab, adi dayung sundar anŭ, ngga sopŭrŭg jurud madis-i, amai ayŭh muko sukan duwŭh naan pinyiong anŭ adi ayŭh pait ka Jericho. (Sesang Rahab rŭŭ di Israel ndŭg andu ati.)

²⁶ Di tipuh anŭ Joshua piruah pinganang pinyibakan: “Tadŭ tadŭ daya adi suba an pari pijog kupo Jericho re dog nyatŭk pangu TUHAN. Asi asi adi juman puun pinagap rasan-i re kinanyap anak pinuai dari-i. Asi asi adi pijog tiban kuta-i re kinanyap anak sibusu-i.”

²⁷ Jadi TUHAN agi ngga Joshua, ka dŭn-i mbŭh raru timagah di ndi tarun tarun tana rais anŭ.