JOSHUA 5 - Hakcipta - Biatah Bidayuh

¹ Sopŭrŭg raja daya Amor adi rŭŭ di tura ka barat Yang Jordan ngga sopŭrŭg raja daya Canaan adi rŭŭ mapang Rawŭt Mediterranean mbŭh dingah pasar muki TUHAN mbŭh nyibadŭh Yang Jordan ndŭg ka bara daya Israel mbŭh mutas-i. Ngara jadi taru ka pinyibirani ngara mbŭh miyap bada daya Israel.

Bisunat di Gilgal

² Komŭnŭ TUHAN kidaan di Joshua, “Ndai kudu kudu sinda so batuh ka nyunat daya Israel.”

³ Jadi Joshua ndai nimun TUHAN mbŭh pesan, ka ayŭh nyunat daya Israel di tarun adi dog kadŭn Sandah Sunat.

^4-6 Di tika daya Israel bu so Egypt, sopŭrŭg dari taŭn muko dog nyunat. Pak sitadŭn pat puru sawa anŭ adi ngga ngara bigandon di tarun tana-pajam, mating anak pira dari dog nyunat. Ka dinge, di tŭbŭn jaman anŭ sopŭrŭg dari, adi gi-piaŭn bisa matak biperang di tika ngara bu so Egypt, mbŭh abo kabŭs amai ngara nyibireu TUHAN. Nimun adi TUHAN mbŭh bipayu, ngara dŭh siŭn kiris tarun tana anŭ adi kaya ngga damŭn, adi Ayŭh ko janji di tayung-babuk ngara.

⁷ Bara anak dari ngara bŭn dog nyunat, ka-i mbŭh turap bauh anŭ inŭh adi Joshua nyunat.

⁸ Ripas ngara mbŭh bisunat, barang naan darŭm ndi bangsa anŭ rŭŭ di bari ndŭg ka tawan ngara mbŭh bua.

⁹ TUHAN nang di Joshua, “Andu ati Aku mbŭh kadi so angān mangŭh anŭ adi angān dapŭd so jadi urun di Egypt.” Anŭ sabab tarun anŭ dog kadŭn Gilgal, ka-i babŭ ndŭg andu ati.

¹⁰ Sitadŭn daya Israel bibari di Gilgal, di rabak sindŭk Jericho, ngara sita Gawai Paska ngga singumi andu simŭng pat andu buran anŭ.

¹¹ Ngga andu anŭ ndi andu adi sibungas ngara man pinguman so pimuruh adi ngara purun di Canaan: sirandang gandom ngga ruti dŭh biragi.

¹² Manna mbŭh dŭh tia rabu ka tana, ka daya Israel mbŭh dŭh gŭh tia biyŭn-i. So nganŭ ngara man pinguman adi dog purun di Canaan.

Joshua Ngga ndi naan Daya adi digŭng Pedang

¹³ Darŭm Joshua gibabŭ sindŭk Jericho, gŭgŭh ka ayŭh kiris ndi naan daya mijog di sirung jawin-i, digŭng pedang. Joshua panu tudu ayŭh ka siken, “Kuu ndi naan so bara soldadu ami kah ndi naan so pinganyu ami?”

¹⁴ Ayŭh nang, “Aku dŭh ndi so bara soldadu ngan, ka dŭh gŭh pinganyu ngan. Aku agi digiti jadi pingibās soldadu TUHAN.” Joshua sipŭŭb di tana nyambah ka nang, “Aku ati urun mai, tuan. Ani raan mai aku ndai?”

¹⁵ Pingibās soldadu TUHAN nang di ayŭh, “Kadi kasut mu; kuu mijog di tana kudus.” Ka Joshua ndai nimun dog bada.