JOSHUA 24 - Hakcipta - Biatah Bidayuh

Joshua Minyu di Bara Daya Israel di Shechem

¹ Joshua bagan bada tikuruk sopŭrŭg tibaran-asar Israel di Shechem. Ayŭh bagan bara nyamba, bara pinguru, bara akim, samŭn bara pingubak Israel, ka ngara tikuruk di sirung jawin Tapa.

² Joshua minyu di bara daya, “Ati inŭh kayuh adi TUHAN, Tapa Israel raan nang: ‘Jah-i tayung-babuk ngan rŭŭ di pah mandi Yang Euphrates ka nyambah tapa tapa bŭkŭn. Ndi so bara tayung-babuk ngan anŭ inŭh Terah, sama Abraham ngga Nahor.

³ Komŭnŭ Aku taban Abraham, adi babuk ngan, so tarun tana adi di pah mandi Yang Euphrates, ka taban ayŭh ngga mutas ndi tarun tarun tana Canaan. Aku nggen di ayŭh bagŭ sesang. Aku nggen di ayŭh Isaac,

⁴ ka di Isaac Aku nggen Jacob ngga Esau. Aku nggen di Esau rais tarun tana sandah Edom jadi utung-i, pak babuk ngan Jacob ngga bara anak-i di ka Egypt.

⁵ Ripas anŭ Aku pait Moses ngga Aaron, ka Aku taban pinyusah bās ka Egypt. Pak Aku taban angān ngga ruah so nŭ;

⁶ Aku taban bara tayung-babuk ngan ngga ruah so Egypt, ka bara daya Egypt tadak ngara pakai krita kuda ngga bara soldadu pinunggang kuda. Pak kan tayung-babuk ngan mbŭh ndŭg Rawŭt Bireh,

⁷ ngara bagan mite turung so Aku, ka Aku na karŭm di asah ngara ngga bara daya Egypt. Aku bada piin rawŭt ngapuh bara daya Egypt ka pirŭnggŭd ngara. Angān puan kayuh adi Aku muko ndai di Egypt. “ ‘Angān raru tui rŭŭ di tarun tana-pajam.

⁸ Komŭnŭ Aku taban angān ka tarun tana daya Amor, adi rŭŭ tura ka timor Yang Jordan. Ngara rawan angān, pak Aku bada angān manang rawan ngara. Angān tambit tarun tana ngara, ka Aku pirabur ngara darŭm angān masang.

⁹ Komŭnŭ Raja so Moab adi dŭn Balak anak Zippor makat rawan angān. Ayŭh pait pinganang ka Balaam anak Beor, ka bada ayŭh mangu angān.

¹⁰ Pak Aku dŭh dingah pimite Balaam, jadi ayŭh nyiberkat angān, ka ngga simŭnŭ inŭh Aku nyiramat angān so Balak.

¹¹ Angān mutas yang Jordan ka mandŭg ka Jericho. Bara daya adi di Jericho rawan angān, simŭnŭ gŭh daya Amor, daya Periz, daya Canaan, daya Hitti, daya Girgash, daya Hivi, ka daya Jebus. Pak Aku nggen di angān pimanang ngarah ngara.

¹² Darŭm angān masang, Aku bada ngara kandang-kandŭ taru, adi bada duwŭh naan raja daya Amor bu. Dŭh-i pedang ngga bawŭh panah ngan adi bada angān manang rawan ngara.

¹³ Aku nggen di angān tana adi bŭn angān birŭmŭh dieh ka kupo kupo adi dŭh angān pijog. Madin angān mbŭh rŭŭ diginŭ man buwa anggor so tŭngŭn adi dŭh angān purun, ka buwa kanā so tŭngŭn adi dŭh angān purun.’

¹⁴ “Ngapŭi meh madin,” Joshua pijuu nang, “Stabi di TUHAN ka bituan di Ayŭh ngga batur sawŭ ka ngga puno pinyabah. Taran sopŭrŭg tapa adi tayung-babuk ngan nyambah di Mesopotamia ka di Egypt, ka bituan di TUHAN adŭ.

¹⁵ Kambŭi angān dŭh raan bituan di Ayŭh, natu pikir-kira ngan andu ati, asi adi re ngan yŭn bituan; tapa tapa adi tayung-babuk ngan nyambah di Mesopotamia, puan kah tapa tapa daya Amor adi muko dapu tarun tana adi yŭn ngan rŭŭ madin. Pak aku ngga rawang ku, kieh re bituan di TUHAN.”

¹⁶ Bara daya nam, “Kieh dŭh re tingge TUHAN ka nyambah tapa tapa adi bŭkŭn!

¹⁷ TUHAN adi Tapa ami mbŭh taban bara tayung-babuk ami samŭn kieh ngga ruah so Egypt di yŭn ami dog piurun, ka kieh mbŭh kiris masam masam pingandai-nginga adi Ayŭh mbŭh ndai. Ayŭh bada kieh siramat darŭm kieh masang panu di barang yŭn, mutas rais rais daya bangsa bŭkŭn.

¹⁸ Darŭm kieh panu masang ka tarun tana ati, TUHAN pibu sopŭrŭg daya Amor adi rŭŭ digiti. Ngapŭi kieh re bituan di TUHAN; Ayŭh inŭh Tapa ami.”

¹⁹ Joshua nang di bara daya, “Pak kadŭ angān dŭh re tungang bituan di TUHAN. Ayŭh inŭh Tapa adi kudus ka dŭh re apun dudu dosa ngan. Ayŭh dŭh re tandah angān bituan di tapa tapa saruh,

²⁰ ka kambŭi angān tingge Ayŭh amai an bituan di tapa adi saruh, Ayŭh re rawan angān ka ngukum angān. Ayŭh re pirabur angān sunggu Ayŭh ko kana ngga angān.”

²¹ Bara daya nang di Joshua, “Dŭh! Kieh taŭn re bituan di TUHAN.”

²² Joshua kidaan di ngara, “Adŭp ngan jadi saksi yŭn adŭp ngan; angān mbŭh ngaku adŭp ngan raan bituan di TUHAN.” “Sawŭ,” ngara nang, “kieh jadi saksi yŭn adŭp ami.”

²³ “Taran meh garang sopŭrŭg tapa saruh ngan anŭ,” Joshua nang, “ka bipayu adŭp ngan re tŭtŭd di TUHAN, adi Tapa Israel.”

²⁴ Ka bara daya nang di Joshua, “Kieh re bituan di TUHAN adi Tapa ami. Kieh re tunda pinyipesan-I.”

²⁵ Jadi Joshua ndai simanya yŭn bara daya di andu anŭ, ka diginŭ di Shechem ayŭh nggen di ngara ukum ukum-adat ngga atur atur adi ngara patut tunda.

²⁶ Joshua nuris pesan pesan anŭ di surat Ukum-adat Tapa. Komŭnŭ ayŭh tambit tibande batuh ka pijog-i di ribo tŭngŭn oak di yŭn adi mbŭh dog nitah yŭn TUHAN.

²⁷ Ayŭh nang di sopŭrŭg daya, “Batuh ati re jadi saksi yŭn ta. Batuh ati muko dingah sopŭrŭg pinganang adi TUHAN mbŭh nang di ata. Ngapŭi-i jadi saksi di tunduh ngan, isa angān dŭh rawan Tapa ngan.”

²⁸ Komŭnŭ Joshua bada bara daya maad, ka barang naan pari ka tarun tana adŭp-i masin masin.

Joshua ngga Eleazar Kabŭs

²⁹ Ripas anŭ, urun TUHAN, Joshua anak Nun kabŭs aŭn umbur siratus simŭng sawa.

³⁰ Ngara kubur ayŭh di tarun tana adŭp-i di Timnath Serah di rais tarun tana sandah Ephraim tura ka utara Darŭd Gaash.

³¹ Sitadŭn Joshua udip, daya Israel bituan di TUHAN, ka ripas pinyikabŭs-i ngara babŭ mun anŭ sitŭkŭd bara pinguru anŭ gibabŭ udip adi muko kiris barang masam kayuh adi TUHAN ndai yŭn Israel.

³² Tadang Joseph, adi bara daya Israel taban so Egypt, mbŭh dog kubur di Shechem di supek tana adi Jacob miris so bara anak Hamor adi sama Shechem, rega siratus kiping pirak. Tarun tana anŭ mbŭh jadi bisaka bara sesang Joseph.

³³ Eleazar anak Aaron kabŭs ka dog kubur di Gibeah, kupo di rais tarun tana sandah Ephraim adi ko dog nggen di anak-i Phinehas.