JOSHUA 23 - Hakcipta - Biatah Bidayuh

Pinganang Pinyibrakang Joshua

¹ Mua tian ripas anŭ TUHAN bada Israel siramat so bara pinganyu ngara. Di tipuh anŭ Joshua mbŭh raru minyamba,

² jadi ayŭh bagan sopŭrŭg daya Israel, bara nyamba, bara pinguru, bara akim, ka bara pingubak Israel, ka nang, “Madin aku mbŭh raru minyamba.

³ Angān mbŭh kiris sopŭrŭg kayuh adi TUHAN adi Tapa ngan mbŭh ndai di tunduh sopŭrŭg bangsa ati yŭn ngan. TUHAN adi Tapa ngan mbŭh biperang yŭn ngan.

⁴ Aku mbŭh pirutung ndu utung bara tibaran-asar ngan tarun tana bangsa bangsa ati adi gibabŭ dŭm, simŭnŭ gŭh tarun tana bangsa adi aku muko ngarah, so Yang Jordan adi di Timor ndŭg ka Rawŭt Mediterranean di tura ka barat.

⁵ TUHAN adi Tapa ngan re bada ngara ngundur so angān, ka Ayŭh re pibu ngara darŭm angān masang. Angān re dapu tana ngara, nanyam adi TUHAN adi Tapa ngan mbŭh bijanji re nggen di angān.

⁶ Ngapŭi nakit nakit ingat ka tunda sopŭrŭg kayuh adi mbŭh dog nuris darŭm surat Ukum-adat Moses. Ka dŭhnyah nyibireu tadŭ tadŭ-i darŭm surat anŭ,

⁷ ka angān manyah bigaur ngga ngara adi gibabŭ agi dŭm di ruang ngan, puan kah nyabŭt dŭn tapa tapa ngara, puan kah pakai dŭn tapa ngara ngga bipayu, puan kah nyambah tapa ngara, puan kah mutu ubak ka tapa ngara.

⁸ Angān patut tŭtŭd di TUHAN, nimun adi mbŭh ndŭg madin.

⁹ TUHAN mbŭh pibu bangsa bangsa adi bās ngga adi bake darŭm angān masang, ka mating adi tungang rawan angān.

¹⁰ Tadŭ tadŭ so angān tungang bada siribu naan daya bu, sabab TUHAN adi Tapa ngan inŭh adi birawan yŭn ngan, nimun adi Ayŭh mbŭh janji.

¹¹ Amai anŭ meh, angān an nakit ngga siabo asŭng rindu TUHAN adi Tapa ngan.

¹² Kambŭi angān dŭh tŭtŭd pak tunda bangsa bangsa adi babŭ agi rŭŭ di ruang ngan ka sawan banan ngga ngara,

¹³ angān re tatu puan nang TUHAN Tapa ngan re dŭh tia pibu bangsa bangsa anŭ darŭm angān masang. Bangsa bangsa anŭ re jadi pinyusah di angān keya ka jarat bait rubang, ka re mandam nyam pasut di punok ngan puan kah reja di batŭh ngan. Ka anŭ re tui ndŭg ka angān mbŭh mating tia dŭm di tarun tana adi kana ati adi TUHAN adi Tapa ngan mbŭh nggen di angān.

¹⁴ “Madin tipuh adi ngga aku kabŭs mbŭh mandŭg. Barang naan angān mbŭh puan darŭm asŭng ngga simangi nang TUHAN adi Tapa ngan mbŭh nggen di angān sopŭrŭg kayuh adi kana nanyam ka janji-I. Barang janji adi Ayŭh mbŭh ndai mbŭh dog sita; ndi mating gŭh adi dŭh bitŭtŭk.

¹⁵ Pak nimun Ayŭh mbŭh sita barang janji adi Ayŭh mbŭh ndai ngga angān, simŭnŭ gŭh Ayŭh re pimanu sopŭrŭg pinyibisā-i.

¹⁶ Kambŭi angān dŭh sita simanya adi TUHAN adi Tapa ngan mbŭh pesan angān da sita ka kambŭi angān bituan ka nyambah tapa tapa adi bŭkŭn, darŭm baji-I Ayŭh re ngukum angān, ka angān re rasu mating tia dŭm rŭŭ di tana adi kana ati adi Ayŭh mbŭh nggen di angān.”