JOSHUA 22 - Hakcipta - Biatah Bidayuh

Joshua bada Tibaran Tibaran-Asar Timor Mari

¹ Komŭnŭ Joshua bagan bada tikuruk bara daya so tibaran-asar Reuben, Gad, ngga Manasseh Timor.

² Ayŭh nang di ngara, “Angān mbŭh ndai barang masam kayuh adi Moses urun TUHAN bada angān ndai, ka angān mbŭh tunda sopŭrŭg pesan ku.

³ Adi mbŭh tian ti ndi sidah gi-bŭn gŭh angān tandah dingan ngan daya Israel sadi darŭm pinyusah. Angān mbŭh nakit nakit tunda pesan TUHAN adi Tapa ngan.

⁴ Madin, nimun Ayŭh mbŭh bijanji, TUHAN adi Tapa ngan mbŭh nggen damai di bara daya Israel adi bŭkŭn. Di meh mari ka tarun tana adi angān mbŭh ngaku yŭn adŭp ngan, tana adi parad ka timor yang Jordan, adi Moses, urun TUHAN, mbŭh nggen di angān.

⁵ Ingat nakit nŭh adŭp ngan tunda ukum-adat adi Moses mbŭh pesan angān bada tunda: rindu TUHAN adi Tapa ngan, ndai pinyiraan-I, tunda Pinyipesan-I, tŭtŭd di Ayŭh, ka bituan di Ayŭh ngga siabo atin ka ngga siabo simangi ngan.”

^6-8 Joshua bada ngara mari ngga pinganang berkat sakati: “Angān mari taban adŭp ngan raru kaya, biyŭn bagŭ dāng kudip, pirak, mas, timaga, basi, ka bagŭ piraka. Kutung ngga bara dingan ngan adi samah tibaran-asar kayuh adi angān mbŭh tambit so pinganyu ngan.” Ka ngara meh mari. Moses mbŭh nggen tarun tana di parad timor Jordan yŭn sitangah tibaran-asar Manasseh, pak di sitangah anŭ ndi Joshua nggen tarun tana di tura ka barat yang Jordan, simŭnŭ gŭh di bara tibaran-asar adi bŭkŭn.

⁹ Jadi daya adi so tibaran-asar Reuben, Gad, ngga Manasseh Timor mari. Ngara tingge daya Israel adi bŭkŭn di Shiloh di tarun tana Canaan ka matak ka tarun tana adŭp ngara, tarun tana Gilead, adi ngara mbŭh tambit nimun adi TUHAN mbŭh pesan ngara so baba Moses.

Mija-sambah Di Tabing Jordan

¹⁰ Kan tibaran tibaran-asar Reuben, Gad, ngga Manasseh Timor mbŭh ndŭg Geliloth, gibabŭ di parad barat yang Jordan, ngara pijog mija-sambah adi bās ka grua di tabing yang anŭ.

¹¹ Daya Israel adi bŭkŭn dog kidaan. “Dingah! Daya adi so tibaran-asar Reuben, Gad, ngga Manasseh Timor mbŭh pijog mija-sambah di Geliloth, di pah mandi yang Jordan!”

¹² Kan daya Israel dingah sakanŭ, sopŭrŭg daya Israel samah mandŭg ka Shiloh an di biperang rawan tibaran tibaran-asar timor.

¹³ Pak diŭ so ngara matak, ngara pait Phinehas, anak imam Eleazar, ka yŭn daya tibaran-asar Reuben, Gad, ngga Manasseh Timor di tarun tana Gilead.

¹⁴ Simŭng naan pinguru samah di ngga Phinehas, ndi naan so barang tibaran-asar di tura ka barat ka barang naan pingubak rawang so barang manak anŭ.

¹⁵ Ngara mandŭg ka tarun tana Gilead, di dapŭd bara daya Reuben, Gad, ngga Manasseh Timor,

¹⁶ ka minyu yŭn sopŭrŭg daya TUHAN, ngara nang di ngara, “Mani angān ndai kayuh adi arap ati rawan Tapa Israel? Angān mbŭh rawan TUHAN darŭm angān pijog mija-sambah anŭ yŭn adŭp ngan! Angān mbŭh dŭh tia tunda Ayŭh!

¹⁷ Ingat nŭh dosa ta di Peor, di andu TUHAN ngukum daya-I ngga sesak-andam? Ata gibabŭ kinaman sabab anŭ. Dŭh kah dosa anŭ mbŭh sadang?

¹⁸ Angān re abah tunda Ayŭh madin kah? Kambŭi angān rawan TUHAN andu ati, Ayŭh re baji di barang naan ata di Israel sipagi.

¹⁹ Jadi madin, kambŭi tarun tana ngan dŭh kana yŭn ngan bisambah, mandŭg ka tarun tana TUHAN, di yŭn Bari-I. Mite kada tarun tana so kieh. Pak dŭhnyah rawan TUHAN bait kieh, anŭ inŭh pijog mija-sambah ngga nambah mija-sambah TUHAN Tapa ta.

²⁰ Ingat munki Achan anak Zerah dŭh an tunda pinganang pasar kayuh adi mbŭh dog ngŭtŭ dŭh siŭn dŭh dog pirabur; sopŭrŭg kaum Israel dog ukum sabab anŭ. Dŭh-i Achan sadi adŭ adi kabŭs sitagar dosa-i.”

²¹ Daya so tibaran-asar Reuben, Gad, ngga Manasseh Timor nam bara pingubak rawang tibaran-asar so barat:

²² “Adi Siabo Bikuasa inŭh Tapa! Ayŭh inŭh TUHAN! Adi Siabo Bikuasa inŭh Tapa! Ayŭh inŭh TUHAN! Ayŭh puan ani sabab kieh ndai simŭnŭ, ka kieh raan angān sua puan! Kambŭi kieh rawan TUHAN ka dŭh sabah di Ayŭh, dŭhnyah tandah kieh udip!

²³ Kambŭi kieh nyibireu TUHAN ka pijog mija-sambah yŭn adŭp ami yŭn badang sadis puan kah yŭn sadis ruwang kayuh puan kah yŭn sadis bidingan, isa-i adŭp TUHAN ngukum kieh.

²⁴ Pinŭtŭn ami dŭh-i simŭnŭ! Kieh ndai simuti sabab kieh taru di sundis andu-i sesang ngan re nang di sesang ami, ‘Re angān ngga mani TUHAN, adi Tapa Israel?

²⁵ Ayŭh bada yang Jordan jadi baat di asah kieh ngga angān daya Reuben ngga daya Gad. TUHAN inŭh Tapa daya Israel, dŭh inŭh Tapa ngan.’ Komŭnŭ sesang ngan kadŭ re bada sesang ami dŭh tia nyambah TUHAN.

²⁶ Jadi kieh pijog mija-sambah, dŭh yŭn badang sadis puan kah yŭn jugan pinganggen,

²⁷ pak isa-i jadi tandā yŭn daya ami ngga daya ngan, ka yŭn turap turap adi sundis ripas ata, nang kieh sawŭ nyambah TUHAN di Bari kudus-I ngga pinganggen adi dog badang ka ngga sadis sadis adi bŭkŭn ngga sadis bidingan. Anŭ, isa sesang sesang ngan dŭh nang tung jami dŭh yŭn TUHAN.

²⁸ Nanyam ka pikir-kira ami, kambŭi kayuh anŭ jadi bitŭtŭk di sundis andu, sesang ami bisa nang, ‘Tingga! Tayung-babuk ami pijog mija-sambah adi brimun ngga tung TUHAN. Dŭh-i yŭn badang sadis puan kah yŭn bisadis, pak isa-i jadi tandā di daya ami ngga di daya ngan.’

²⁹ Kieh tatu dŭh re rawan TUHAN, dŭh re dŭh tia tunda Ayŭh darŭm kieh pijog mija-sambah yŭn badang sadis, bait-i yŭn sadis ruwang kayuh, bait-i yŭn bisadis. Kieh dŭh re pijog tadŭ tadŭ mija-sambah adi bŭkŭn so tung TUHAN Tapa ta adi agi mijog di rawa Bari-I.”

³⁰ Imam Phinehas ngga simŭng naan pinguru bara daya Israel adi agi ngga ayŭh, pingubak pingubak rawang tibaran-asar so barat, dingah kayuh adi daya tibaran-asar Reuben, Gad, ngga Manasseh Timor nang, ka ngara mbŭh munos asŭng-i.

³¹ Phinehas, anak imam Eleazar, nang di ngara, “Madin ata puan TUHAN agi ngga ata. Angān mating rawan Ayŭh, ka angān mbŭh nyiramat daya Israel so ukum TUHAN.”

³² Komŭnŭ Phinehas ngga bara pinguru anŭ bu so yŭn daya Reuben ngga Gad di tarun tana Gilead ka pari ka Canaan, ka yŭn daya Israel, ka kidaan pasar kayuh anŭ di ngara.

³³ Bara daya Israel mbŭh munos asŭng-i ka kibās Tapa. Ngara dŭh tia minyu pasar matak nyerang di pirabur tarun tana adi yŭn daya Reuben ngga Gad rŭŭ.

³⁴ Daya Reuben ngga Gad nang, “Mija-sambah ati jadi saksi di sopŭrŭg ta nang TUHAN inŭh Tapa.” Ngapŭi ngara kadŭn-i “Saksi.”