JOSHUA 21 - Hakcipta - Biatah Bidayuh

Kupo kupo Daya Levi

¹ Pinguru pinguru bara rawang daya Levi di bidapŭd ngga imam Eleazar, Joshua anak Nun ngga bara pingubak rawang so sopŭrŭg tibaran-asar Israel.

² Di Shiloh di tarun tana Canaan ngara nang di ngara, “TUHAN mbŭh pesan so baba Moses nang kieh an dog nggen kupo kupo yŭn ami rŭŭ, samŭn tarun tana kupai maning-i yŭn dāng kudip ami.”

³ Jadi nanyam adi TUHAN mbŭh pesan, daya Israel nggen di daya Levi kada kupo ngga tarun tarun tana kupai so tarun tana adi ngara dapu.

⁴ Bara rawang daya Levi adi so manak Kohath inŭh adi sibungas dog pirutung kupo kupo anŭ. Bara rawang adi sesang imam Aaron mbŭh dog pirutung simŭng taruh kupo so tarun tana Judah, Simeon, ngga Benjamin.

⁵ Manak Kohath adi bŭkŭn dog pirutung simŭng kupo so tarun tana Ephraim, Dan, ngga Manasseh Barat.

⁶ Manak Gershon dog pirutung simŭng taruh kupo so tarun tana Issachar, Asher, Naphtali, ngga Manasseh Timor.

⁷ Bara rawang so manak Merari dog pirutung simŭng duwŭh kupo so tarun tana Reuben, Gad, ngga Zebulun.

⁸ Pakai taran dadu, daya Israel pirutung kupo kupo ngga tarun tarun tana kupai-i ka bara daya Levi, nimun adi TUHAN mbŭh pesan so baba Moses.

⁹ Anŭ inŭh dŭn dŭn kupo adi so tarun tana Judah ngga Simeon adi mbŭh dog nggen

¹⁰ di bara sesang Aaron adi manak Kohath, adi sesang Levi. Utung ngara inŭh adi sibungas dog ndai.

¹¹ Ngara dog nggen kupo Arba (Arba inŭh sama Anak), adi madin dog kadŭn Hebron, di rais tarun tana sandah Judah, samŭn tarun tana kupai adi maning-i.

¹² Pak tana tana kupo anŭ samŭn anak anak kupo-i taŭn mbŭh diŭ dog nggen di Caleb anak Jephunneh jadi utung-i.

¹³ Ngga nambah Hebron, (ndi so kupo pinyigrindung), kupo kupo ati mbŭh dog nggen di bara sesang imam Aaron: Libnah,

¹⁴ Jattir, Eshtemoa,

¹⁵ Holon, Debir,

¹⁶ Ain, Juttah, ngga Beth Shemesh, samŭn tarun tarun tana kupai-i: prii kupo so tibaran-asar Judah ngga Simeon.

¹⁷ Adi so tarun tana Benjamin ngara dog nggen pat kupo: Gibeon, Geba,

¹⁸ Anathoth, ngga Almon, samŭn tarun tarun tana kupai-i.

¹⁹ Simŭng taruh kupo sopŭrŭg-i, samŭn tarun tarun tana kupai-i, dog nggen di bara imam, adi bara sesang Aaron.

²⁰ Bara rawang daya Levi adi bŭkŭn adi manak Kohath dog nggen kada kupo so tarun tana Ephraim.

²¹ Ngara dog nggen pat kupo: Shechem, samŭn tarun tarun tana kupai di rais tarun tana sandah Ephraim (ndi so kupo pinyigrindung), Gezer,

²² Kibzaim, ngga Beth Horon, samŭn tarun tarun tana kupai-i.

²³ So tarun tana Dan ngara dog nggen pat kupo: Eltekeh, Gibbethon,

²⁴ Aijalon, ngga Gathrimmon, samŭn tarun tarun tana kupai-i.

²⁵ So tarun tana Manasseh Barat ngara dog nggen duwŭh kupo: Taanach ngga Gathrimmon, samŭn tarun tarun tana kupai-i.

²⁶ Bara rawang so manak Kohath trima simŭng kupo sopŭrŭg-i, samŭn tarun tarun tana kupai-i.

²⁷ Tibaran daya Levi adi bŭkŭn, adi manak Gershon, trima so tarun tana Manasseh timor duwŭh kupo: Golan di Bashan (ndi so kupo pinyigrindung) ngga Beeshterah, samŭn tarun tarun tana kupai-i.

²⁸ So tarun tana Issachar ngara trima pat kupo: Kishion, Daberath,

²⁹ Jarmuth, ngga Engannim, samŭn tarun tarun tana kupai-i.

³⁰ So tarun tana Asher ngara trima pat kupo: Mishal, Abdon,

³¹ Helkath, ngga Rehob, samŭn tarun tarun tana kupai-i.

³² So tarun tana Naphtali ngara trima taruh kupo: Kedesh di Galilee, ka samŭn tarun tarun tana kupai-i, (ndi so kupo pinyigrindung), Hammoth Dor, ngga Kartan, samŭn tarun tarun tana kupai-i.

³³ Bara rawang so manak Gershon trima prungun simŭng taruh kupo samŭn tarun tarun tana kupai-i.

³⁴ Bara daya Levi adi bŭkŭn, adi manak Merari, trima so tarun tana Zebulum pat kupo: Jokneam, Kartah,

³⁵ Dimnah, ngga Nahalal, samŭn tarun tarun tana kupai-i.

³⁶ So tarun tana Reuben ngara trima pat kupo: Bezer, Jahaz,

³⁷ Kedemoth, ngga Mephaath, samŭn tarun tarun tana kupai-i.

³⁸ So tibaran-asar Gad ngara trima pat kupo: Ramoth di Gilead, samŭn tarun tarun tana kupai-i (ndi so kupo pinyigrindung), Mahanaim,

³⁹ Heshbon, ngga Jazer, samŭn tarun tarun tana kupai-i.

⁴⁰ Jadi manak Merari dog nggen prungun simŭng duwŭh kupo.

^41-42 So tarun tana adi daya Israel dapu, prungun-i pat puru mai kupo, samŭn tarun tarun tana kupai adi maning-i, dog nggen di bara daya Levi.

Israel Rŭŭ di Tarun Tana Canaan

⁴³ Jadi TUHAN nggen di daya Israel sopŭrŭg tana anŭ adi Ayŭh muko bijanji ngga tayung-babuk ngara an nggen di ngara. Kan ngara mbŭh tambit tana anŭ, ngara rŭŭ diginŭ.

⁴⁴ TUHAN nggen di ngara damai di ndi tarun tana anŭ, nimun adi Ayŭh mbŭh bijanji ngga tayung-babuk ngara. Ndi mating gŭh so bara pinganyu ngara adi re tungang ngarah ngara, sabab TUHAN mbŭh nggen pimanang di bara daya Israel ngarah sopŭrŭg pinganyu ngara.

⁴⁵ TUHAN bada bitŭtŭk sopŭrŭg janji adi Ayŭh mbŭh ndai ngga daya Israel.