JOSHUA 15 - Hakcipta - Biatah Bidayuh

Tarun Tana adi dog Nitah yŭn Judah

¹ Bara rawang tibaran-asar Judah trima tung ngara utung tana nanyam ka adi dog nyuse digiti: Bayah tarun tana anŭ inŭh ndŭg siratan nuju tŭbŭn tarun tana-pajam Zin, jeh di siratan di baat Edom.

² Baat parad ka siratan anŭ piguru so tŭbŭn Rawŭt Pide di siratan,

³ jeh nuju siratan so Ateng Akrabbim ka ndŭg Zin. Ayŭh mūn nuju siratan so Kadesh Barnea, murah Hezron ndŭg Addar, biruit nuju Karka,

⁴ ka pijuu ndŭg Azmon, ka tunda tŭngŭn sungi di baat Egypt ndŭg Rawŭt Mediterranean, adi tŭbŭn baat anŭ. Anŭ inŭh baat Judah di parad ka siratan.

⁵ Baat adi parad ka timor inŭh Rawŭt Pide, mudek jeh ndŭg atak sungi adi jadi nangŭh Yang Jordan. Baat adi parad ka utara piguru so nŭ,

⁶ nuju Beth Hoglah ka pijuu ndŭg dūg tarun di tura ka utara adi nura Rubān Jordan. Komŭnŭ ayŭh maad nuju Batuh Bohan (Bohan inŭh anak dari Reuben),

⁷ so Rubān Pinyusah ndŭg Debir, komŭnŭ biruit ka utara nuju Gilgal, adi nura Ateng Adummim parad tura ka siratan rubān anŭ. Komŭnŭ ka-i nuju rubang rubang piin Enshemesh ka tambus Enrogel,

⁸ ka maad mutas Rubān Hinnom tura ka parad siratan sandah adi yŭn kupo daya Jebus adi dŭn Jerusalem mbŭh mijog. Baat anŭ pijuu ndŭg tibung sandah anŭ di tura ka barat Rubān Hinnom, di tŭbŭn Rubān Rephaim adi parad ka utara.

⁹ So nŭ baat anŭ ndŭg rubang rubang piin Nephtoah ka ruah tambus kupo kupo adi sindŭk Darŭd Ephron. Diginŭ ayŭh biruit nuju Baalah (puan kah Kiriath Jearim),

¹⁰ di yŭn-i maning parad ka barat Baalah nuju rais tarun tana sandah Edom, ka kadŭg parad utara Darŭd Jearim (puan kah Chesalon), mūn nuju Beth Shemesh ka murah Timnah.

¹¹ Baat anŭ jeh ndŭg sandah tura ka utara Ekron, biruit nuju Shikkeron, murah Darŭd Baalah, ka pijuu ndŭg Jamnia. Tŭbŭn baat anŭ inŭh di Rawŭt Mediterranean,

¹² adi jadi baat tura ka barat. Di darŭm gadung baat baat anŭ bara rawang tibaran-asar Judah agi rŭŭ.

Caleb Ngarah Hebron ngga Debir

¹³ Nanyam ka adi TUHAN muko pesan di Joshua, kada so tarun tana Judah mbŭh dog nggen di Caleb anak Jephunneh, so tibaran-asar Judah. Ayŭh trima Hebron, kupo adi dog dapu Arba, sama Anak.

¹⁴ Caleb pibu bara sesang Anak so kupo anŭ — bara manak Sheshai, Ahiman, ngga Talmai.

¹⁵ So nŭ ayŭh di nyerang bara daya adi rŭŭ di Debir. (Dawŭ-i kupo anŭ dog kadŭn Kiriath Sepher.)

¹⁶ Caleb nang, “Aku re nggen anak dayung ku Achsah ndu sawŭn dari adi tungang sirabut kupo Kiriath Sepher.”

¹⁷ Othniel, anak dari jurud Caleb adi dŭn Kenaz sirabut kupo anŭ, ka sawŭ Caleb nggen anak dayung-i Achsah di ayŭh ndu sawŭn.

¹⁸ Di andu ngara sawan Othniel ngasu dayung anŭ bada mite ndi engan tana so sama-i. Ayŭh mūn so kaldi-i, ka Caleb siken ayŭh ani raan-i.

¹⁹ Ayŭh nam, “Aku raan tarun adi biyŭn piin dieh. Tarun tana adi kaam mbŭh nggen di aku inŭh di tarun tana adi badŭh.” Jadi Caleb nggen di ayŭh atak piin adi di sijo ngga di saba.

Kupo Kupo Judah

²⁰ Ati inŭh tarun tana adi bara rawang tibaran-asar Judah trima jadi utung ngara.

²¹ Kupo kupo jeh tura ka siratan adi ngara dapu, anŭ adi sindŭk baat ngga Edom inŭh Kabzeel, Eder, Jagur,

²² Kinah, Dimonah, Adadah,

²³ Kedesh, Hazor, Ithnan,

²⁴ Ziph, Telem, Bealoth,

²⁵ Hazor Hadattah, Kerioth Hezron (puan kah Hazor),

²⁶ Amam, Shema, Moladah,

²⁷ Hazar Gaddah, Heshmon, Bethpelet,

²⁸ Hazar Shual, Beersheba, Biziothiah,

²⁹ Baalah, Iim, Ezem,

³⁰ Eltolad, Chesil, Hormah,

³¹ Ziklag, Madmannah, Sansannath,

³² Lebaoth, Shilhim, Ain, ngga Rimmon: prungun-i agi duwŭh puru-prii kupo, samŭn anak anak kupo adi maning-i.

³³ Jadi kupo kupo adi di sigŭn dudu sandah anŭ inŭh Eshtaol, Zorah, Ashnah,

³⁴ Zanoah, Engannim, Tappuah, Enam,

³⁵ Jarmuth, Adullam, Socoh, Azekah,

³⁶ Shaaraim, Adithaim, Gederah ngga Gederothaim: Prungun-i agi simŭng pat kupo, samŭn anak anak kupo adi maning-i.

³⁷ Agi gŭh Zenan, Hadashah, Migdalgad,

³⁸ Dilean, Mizpah, Joktheel,

³⁹ Lachish, Bozkath, Eglon,

⁴⁰ Cabbon, Lahmam, Chitlish,

⁴¹ Gederoth, Bethdagon, Naamah, ngga Makkedah: simŭng nŭm kupo samŭn anak anak kupo adi maning-i.

⁴² Ka agi gŭh Libnah, Ether, Ashan,

⁴³ Iphtah Ashnah, Nezib,

⁴⁴ Keilah, Achzib, ngga Mareshah: prii kupo, samŭn anak anak kupo adi maning-i.

⁴⁵ Agi dinge Ekron ngga kupo kupo-i ngga anak anak kupo-i,

⁴⁶ ka sopŭrŭg kupo ngga anak anak kupo sindŭk Ashdod, so Ekron ndŭg Rawŭt Mediterranean.

⁴⁷ Ka agi gŭh Ashdod ngga Gaza, samŭn kupo kupo-i ngga anak anak kupo-i, jeh ndŭg sungi di baat Egypt ngga tabing Rawŭt Mediterranean.

⁴⁸ Di rais tarun tana sandah agi Shamir, Jattir, Socoh,

⁴⁹ Dannah, Kiriath Sepher (puan kah Debir),

⁵⁰ Anab, Eshtemoa, Anim,

⁵¹ Goshen, Holon, ka Giloh: simŭng ndi kupo samŭn anak anak kupo adi maning-i.

⁵² Ka agi gŭh Arab, Dumah, Eshan,

⁵³ Janim, Beth Tappuah, Aphekah,

⁵⁴ Humtah, Hebron, ka Zior: prii kupo, samŭn anak anak kupo adi maning-i.

⁵⁵ Agi gŭh Maon, Carmel, Ziph, Juttah,

⁵⁶ Jezreel, Jokdeam, Zanoah,

⁵⁷ Kain, Gibeah, ngga Timnah: simŭng kupo samŭn anak anak kupo adi maning-i.

⁵⁸ Agi gŭh Halhul, Bethzur, Gedor,

⁵⁹ Maarath, Bethanoth, ngga Eltekon: nŭm kupo, ngga anak anak kupo adi maning-i.

⁶⁰ Ka agi gŭh Kiriath Baal (puan kah Kiriath Jearim) ngga Rabbah: duwŭh kupo, samŭn anak anak kupo maning-i.

⁶¹ Di tarun tana-pajam agi Beth Arabah, Middin, Secacah,

⁶² Nibshan, Kupo Garo, ngga Engedi: nŭm kupo samŭn anak anak kupo adi maning-i.

⁶³ Pak bara daya Judah dŭh tungang pibu bara daya Jebus, adi rŭŭ di Jerusalem. Bara daya Jebus gibabŭ rŭŭ diginŭ ngga bara daya Judah.