JOSHUA 13 - Hakcipta - Biatah Bidayuh

Tarun Tana adi Gibabŭ an Dog Tambit

¹ Joshua madin mbŭh raru minyamba. TUHAN nang di ayŭh, “Kuu mbŭh raru minyamba, pak raru bagŭ tarun tana adi babŭ an dog tambit;

² sopŭrŭg tarun tana Philistia ngga Geshur,

³ samŭn sopŭrŭg tarun tana Avvim tura ka siratan. (Tarun tana so sungi Shihor, di baat Egypt, jeh ndŭg baat Ekron tura ka utara mbŭh dog nyirundeng tarun tana daya Canaan. Raja raja daya Philistia rŭŭ di Gaza, Ashdod, Ashkelon, Gath, ngga Ekron.)

⁴ Gibabŭ bagŭ tana rais daya Canaan, ka Mearah (adi dog dapu daya Sidon) jeh ndŭg Aphek, di arong baat daya Amor;

⁵ tarun tana daya Gebal; ndi tarun tarun tana Lebanon ndŭg timor, so Baalgad, di tura ka siratan Darŭd Hermon, ndŭg Ateng Hamath.

⁶ Anŭ samŭn sopŭrŭg tarun tana daya Sidon, adi rŭŭ di rais tarun tana sandah di asah dudu Darŭd Lebanon ngga Misrephoth Maim. Aku re pibu sopŭrŭg ngara anŭ kan bara daya Israel nyerang ngara. Kuu dŭh siŭn dŭh kutung tarun tana anŭ dupan bara daya Israel, nimun adi Aku muko pesan di kuu.

⁷ Ngapŭi kutung meh tarun tana anŭ dupan tibaran-asar adi dŭm prii, ngga di sitangah tibaran-asar Manasseh, yŭn jadi tana adi ngara dapu.”

Tarun tana Tura ka Timor Yang Jordan dog Kutung

⁸ Tibaran-asar Reuben ngga tibaran-asar Gad samŭn sitangah tibaran-asar Manasseh anŭ ndi mbŭh kambat tana adi Moses, adi urun TUHAN, mbŭh nggen di ngara. Tana anŭ inŭh di tura ka timor Yang Jordan.

⁹ Buka tarun tana ngara inŭh jeh ndŭg Aroer (di bŭngŭn Rubān Arnon), samŭn kupo adi di yun rubān anŭ samŭn sopŭrŭg tarun tana adi rata buang bayah bigatung so Medeba ndŭg Dibon.

¹⁰ Ka-i jeh ndŭg arong baat Ammon samŭn sopŭrŭg kupo adi muko dog mritah raja Sihon adi daya Amor, adi muko mritah di Heshbon.

¹¹ Samŭn tarun tana Gilead, gadung Geshur ngga Maacah, ndi abong abong Darŭd Hermon, samŭn ndi abong abong Bashan, jeh ndŭg Selecah.

¹² Anŭ samŭn tarun tana adi dog mritah Og, sikasŭn raja adi so daya Rephaim, adi muko mritah di Ashtaroth ngga Edrei. Moses muko ngarah ngara ka pibu ngara.

¹³ Sunggu mŭnŭ bara daya Israel dŭh pibu bara daya Geshur ngga daya Maacah; ngara gibabŭ rŭŭ di Israel.

¹⁴ Moses dŭh nggen tana di tibaran-asar Levi. Nimun adi TUHAN muko kidaan di Moses, adŭ ngara bisa trima ndu utung ngara inŭh ndi utung so sadis adi dog badang di tunduh mija-sambah yŭn TUHAN adi Tapa daya Israel.

Tarun Tana adi Dog Nitah Yŭn Tibaran-asar Reuben

¹⁵ Moses mbŭh nggen kada so tarun tana anŭ ka bara rawang tibaran-asar Reuben bada jadi utung ngara.

¹⁶ Bayah tarun tana ngara inŭh ndŭg Aroer (di bŭngŭn Rubān Arnon) samŭn kupo adi di yun rubān anŭ, ka samŭn sopŭrŭg tarun tana adi rata buang bayah bigatung maning Medeba.

¹⁷ Anŭ samŭn Heshbon ngga kupo kupo adi di tarun tana adi rata buang bayah bigatung: Dibon, Bamoth Baal, Beth Baalmeon,

¹⁸ Jahaz, Kedemoth, Mephaath,

¹⁹ Kiriathaim, Sibmah, Zereth Shahar di tunduh sandah di darŭm rubān anŭ,

²⁰ Bethpeor, ired ired Darŭd Pisgah, ngga Beth Jeshimoth.

²¹ Anŭ samŭn sopŭrŭg kupo adi di tarun tana adi rata buang bayah bigatung, samŭn ndi abong abong tarun tana darŭm pritah raja Sihon adi daya Amor adi muko mritah di Heshbon. Moses ngarah ayŭh samŭn bara pinguasa di Midian: Evi, Rekem, Zur, Hur ngga Reba. Sopŭrŭg ngara anŭ muko mritah tarun tana anŭ yŭn Raja Sihon.

²² Samah ngga ngara anŭ adi dog siŭ daya Israel inŭh ndi naan daya adi pandai kidaan nasip, dŭn Balaam anak Beor.

²³ Yang Jordan inŭh baat di tura ka barat yŭn tibaran-asar Reuben. Sopŭrŭg anŭ inŭh kupo kupo ngga anak anak kupo adi dog nggen di bara rawang tibaran-asar Reuben, bada jadi utung ngara.

Tarun Tana adi Dog Nitah Yŭn Tibaran-Asar Gad

²⁴ Moses muko gŭh nggen kada so tarun tana anŭ ka bara rawang tibaran-asar Gad, bada jadi utung ngara.

²⁵ Tarun tana ngara inŭh samŭn Jazer ka sopŭrŭg kupo di gadung Gilead, sitangah so tarun tana Ammon jeh ndŭg Aroer di tura ka timor Rabbah.

²⁶ Bayah tarun tana ngara inŭh so Heshbon jeh ndŭg Ramath Mizpeh ngga Betonim, so Mahanaim jeh ndŭg baat Lodebar.

²⁷ Di Rubān Jordan, anŭ samŭn Beth Haram, Bethnimrah, Sukkoth, ngga Zaphon, kada so tarun tana adi dog mritah Raja Sihon so Heshbon. Baat ngara di tura ka barat inŭh Yang Jordan jeh ndŭg Danu Galilee di tura ka utara.

²⁸ Anŭ inŭh dudu kupo ngga anak anak kupo adi dog nggen di bara rawang tibaran-asar Gad, bada jadi utung ngara.

Tarun Tana adi Dog Nitah Yŭn Tibaran-Asar Manasseh Timor

²⁹ Moses muko nggen kada tarun tana anŭ di bara rawang sitangah so tibaran-asar Manasseh, bada jadi utung ngara.

³⁰ Bayah tarun tana ngara inŭh ndŭg Mahanaim, ka samŭn sopŭrŭg abong Bashan — ka ndi tarun tana adi dog mritah Og, raja so Bashan, samŭn nŭm puru anak anak kupo Jair di Bashan.

³¹ Anŭ samŭn tarun tana Gilead, samŭn Ashtaroth ngga Edrei, adi jadi sindŭ sindŭ kupo di tarun tana adi dog mritah raja Og di Bashan. Sopŭrŭg anŭ mbŭh dog nggen di sitangah bara rawang adi sesang Machir anak Manasseh.

³² Simŭnŭ inŭh Moses kutung tarun tana di tura ka timor Jericho ngga Jordan di tika ayŭh gibabŭ di tarun tana rabak Moab.

³³ Pak Moses dŭh pirutung tarun tana di tibaran-asar Levi. Ayŭh kidaan di ngara nang tung ngara utung inŭh sadis adi dog jugan ka TUHAN adi Tapa Israel.