JOSHUA 11 - Hakcipta - Biatah Bidayuh

Joshua Ngarah Jabin ngga Bara Pambit-I

¹ Kan agah pasar pimanang daya Israel mbŭh ndŭg Raja Jabin di Hazor, ayŭh pait pinganang ka Raja Jobab di Madon, ka raja raja di Shimron ngga Achshaph,

² samŭn raja raja di rais tarun tana sandah di utara, di Rubān Jordan di siratan Danu Galilee, di sigŭn sigŭn sandah, ka di pang rawŭt sindŭk Dor.

³ Ayŭh pait gŭh pinganang ka daya Canaan di so-duwŭh parad yang Jordan, ka daya Amor, daya Hitti, daya Periz, daya Jebus di rais tarun tana sandah, samŭn daya Hivi adi rŭŭ di sigŭn Darŭd Hermon di tarun tana Mizpah.

⁴ Ngara mandŭg ngga sopŭrŭg bara soldadu ngara — bara soldadu adi kiang dudu sirah sumat di pang rawŭt. Ngara biyŭn bagŭ gŭh kuda ngga krita kuda.

⁵ Sopŭrŭg bara raja anŭ nguruk adŭp-i ka samah mandŭg di bibari di Sungi Merom yŭn re biperang ngga daya Israel.

⁶ TUHAN nang di Joshua, “Dŭhnyah taru ngara anŭ. Sipagi ngga arong munti andu, sopŭrŭg ngara re abo dog siŭ Ku yŭn Israel. Angān siŭn bada kuda kuda ngara bajang ka sigot krita krita kuda ngara.”

⁷ Jadi Joshua ngga sopŭrŭg soldadu-i nyerang ngara di Sungi Merom darŭm ngara dŭh rada.

⁸ TUHAN nggen pimanang di Israel ngarah ngara. Bara daya Israel nyerang ka tadak ngara jeh ndŭg Misrephoth Maim ngga Sidon tura ka utara, jeh ndŭg Rubān Mizpah tura ka timor. Perang anŭ dŭh rŭŭ rŭŭ ndŭg ka ndi naan pinganyu ngara mating gŭh dŭm.

⁹ Joshua ndai di ngara nimun adi TUHAN mbŭh pesan: ayŭh bada kuda kuda ngara bajang ka sigot krita krita kuda ngara.

¹⁰ Komŭnŭ Joshua pari, sirabut kupo Hazor ka siŭ raja-i. (Di jaman anŭ, Hazor inŭh kupo adi pritah-i adi siabo bake so sopŭrŭg pritah adi bŭkŭn.)

¹¹ Ngara siŭ barang naan daya diginŭ; ndi naan mating gŭh dog kidŭm, ka kupo anŭ dog sigot.

¹² Joshua sirabut sopŭrŭg kupo anŭ ngga raja raja-i, siŭ barang naan daya, nimun adi Moses, adi urun TUHAN mbŭh pesan.

¹³ Sunggu mŭnŭ, daya Israel dŭh sigot tadŭ tadŭ kupo adi dog pijog di anak sandah, adŭ-i Hazor adi dog sigot Joshua.

¹⁴ Daya Israel tambit sopŭrŭg kayuh adi brega, ngga dāng kudip so kupo kupo anŭ ka nyikŭn-i yŭn adŭp ngara. Pak ngara siŭ barang naan daya. Ndi naan mating gŭh dog kidŭm.

¹⁵ TUHAN mbŭh nggen pinyipesan-I di urun-I Moses, Moses mbŭh nggen-i di Joshua, ka Joshua tunda sopŭrŭg-i. Ayŭh ndai barang masam kayuh adi TUHAN pesan di Moses.

Tarun Tana adi Joshua Tambit

¹⁶ Joshua sirabut sopŭrŭg tarun tana anŭ — rais tarun tana sandah ka sigŭn sigŭn sandah, tura ka utara ngga siratan, sopŭrŭg abong Goshen ngga rais adi badŭh tura ka siratan, samŭn Rubān Jordan.

^17-18 Tarun tana anŭ, buka-i inŭh so Darŭd Halak di siratan sindŭk Edom, ka jeh ndŭg Baalgad di utara, di rubān Lebanon tura ka siratan Darŭd Hermon; Joshua biperang ngga raja raja tarun tana anŭ mua tian-i, pak ayŭh nakap ka siŭ sopŭrŭg ngara.

¹⁹ Kupo adi ndai damai ngga Israel adŭ-i Gibeon, adi yŭn kada daya Hivi rŭŭ. Sopŭrŭg kupo adi bŭkŭn mbŭh dog ngarah darŭm perang.

²⁰ TUHAN mbŭh bada ngara bigŭtŭ an biperang ngga daya Israel, isa ngara rarap ka dog siŭ dŭh ngga masi. Anŭ inŭh kayuh adi TUHAN mbŭh pesan di Moses.

²¹ Di tika anŭ Joshua pirarap bangsa grigasi adi dog kadŭn Anakim adi rŭŭ di rais tarun tana sandah — di Hebron, Debir, Anab, ka di sopŭrŭg rais tarun tana sandah Judah ngga Israel. Joshua pirarap ngara samŭn kupo kupo ngara.

²² Mating daya Anakim dŭm di tarun tana Israel, pak sunggu mŭnŭ, agi kada ngara dŭm di Gaza, Gath, ka Ashdod.

²³ Joshua sirabut ndi abong tarun tana anŭ, nimun adi TUHAN mbŭh pesan di Moses. Joshua nggen tarun tana anŭ di daya Israel siŭn ngara dapu, ka kutung-i dupan ngara, nanyam ka tibaran-asar. Daya Israel rŭŭ so biperang, ka rais ngara mbŭh darŭm damai.