JOSHUA 10 - Hakcipta - Biatah Bidayuh

Daya Amor dog Ngarah

¹ Adonizedek, raja di Jerusalem, dingah Joshua mbŭh sirabut ka pirabur Ai ka mbŭh siŭ raja-i, nimun adi mbŭh-i ndai di Jericho ngga di raja-i. Ayŭh dingah gŭh daya di Gibeon mbŭh ndai pekat-damai ngga daya Israel ka mbŭh rŭŭ bigaur ngga ngara.

² Daya di Jerusalem mbŭh gŭgŭh kan ngara dingah, sabab Gibeon inŭh bayah nyimati ngga tadŭ tadŭ kupo adi biyŭn raja. Ayŭh bayah dŭ so Ai, ka bara soldadu-i pandai biperang.

³ Jadi Adonizedek pait pinganang ati ka Raja Hoham di Hebron, ka Raja Piram di Jarmuth, ka Raja Japhia di Lachish, samŭn Raja Debir di Eglon:

⁴ “Mandŭg ka turung aku nyerang Gibeon, sabab daya-i mbŭh ndai pekat-damai ngga Joshua ka ngga daya Israel.”

⁵ Rimŭh naan raja Amor anŭ, anŭ inŭh raja so Jerusalem, Hebron, Jarmuth, Lachish, ka so Eglon. Ngara nguruk adŭp-i ka kirurung Gibeon, ka nyerang-i.

⁶ Daya Gibeon pait pinganang ka Joshua adi nganŭ bibari di Gilgal: “Dŭhnyah tandah kieh, tuan! Mandŭg rikas di turung kieh! Nyiramat kieh! Sopŭrŭg raja Amor di rais tarun tana sandah mbŭh nguruk adŭp-i ka mbŭh nyerang kieh!”

⁷ Jadi Joshua ngga sopŭrŭg bara soldadu-i, samŭn bara soldadu adi siabo pandai biperang matak so Gilgal.

⁸ TUHAN nang di Joshua, “Dŭhnyah taru ngara. Aku mbŭh nggen di kuu pimanang. Ndi naan so ngara anŭ dŭh gŭh re tungang ngarah kuu.”

⁹ Ndi ngarŭm ngarŭm Joshua ngga bara soldadu-i panu so Gilgal di ka Gibeon, ka ngara nyerang bara daya Amor darŭm ngara dŭh rada.

¹⁰ TUHAN bada daya Amor kandang-kandŭ taru kan kiris bara soldadu Israel. Daya Israel siŭ ngara di Gibeon ka tadak ngara mūn ateng darŭd di Beth Horon; adu adu nyerang ndŭg ka siratan jeh di Azekah ngga Makkedah.

¹¹ Darŭm daya Amor bikaduh mūn ateng darŭd mangān soldadu daya Israel, TUHAN bada ujen batuh adi baga rabu nyatŭk ngara ndi aran aran ndŭg Azekah. Bagŭ dŭ kabŭs dog ujen batuh so adi kabŭs da daya Israel.

¹² Di andu adi ngga TUHAN nggen pimanang di daya Israel, anŭ inŭh ngarah daya Amor, Joshua minyu ngga TUHAN. Di sirung jawin bara daya Israel ayŭh nang, “Batŭh andu, nŭnŭng nyirungan Gibeon; Buran, rŭŭ nyirungan Rubān Aijalon.”

¹³ Batŭh andu nŭnŭng ka buran dŭh trigen ndŭg ka bangsa anŭ mbŭh ngarah pinganyu-i. Anŭ agi dog nuris di Surat Jashar. Batŭh andu nŭnŭng di yun rangit ka dŭh mūn ndi andu andu anŭ.

¹⁴ Gi-bŭn, so jah ndŭg ka madin, andu adi mun anŭ, adi ngga TUHAN tunda pinganang manusia. TUHAN birawan ngarun daya Israel!

¹⁵ Ripas anŭ, Joshua ngga bara soldadu-i pari ka yŭn ngara bibari di Gilgal.

Joshua Nakap Rimŭh naan Raja Amor

¹⁶ Pak rimŭh naan raja Amor anŭ rupas ka bu bisukan di darŭm tang di Makkedah.

¹⁷ Agi daya dapŭd ngara, ka Joshua dog kidaan tarun yŭn ngara bisukan.

¹⁸ Ayŭh nang, “Biraring batuh batuh adi baga ka baba tang anŭ. Bada kada soldadu jaga diginŭ,

¹⁹ pak adŭp ngan dŭhnyah rŭŭ diginŭ. Adu adu tadak pinganyu ka nyerang ngara so punok. Dŭhnyah bada ngara pari ka kupo kupo ngara! TUHAN adi Tapa ngan mbŭh nggen di angān pimanang, ngarah ngara.”

²⁰ Joshua ngga bara daya Israel siŭ ngara, sunggu agi adi bŭkŭn tungang nyiramat adŭp-i di darŭm kupo ka dŭh dog siŭ.

²¹ Komŭnŭ sopŭrŭg soldadu Joshua siramat pari ka yŭn-i di yŭn bibari di Makkedah. Mating daya di ndi tarun tana anŭ birani minyu nyarah daya Israel.

²² Komŭnŭ Joshua nang, “Kadi batuh batuh so baba tang anŭ ka taban raja adi rimŭh naan anŭ ka yŭn ku.”

²³ Jadi baba tang anŭ dog kuka, ka raja raja anŭ adi so Jerusalem, Hebron, Jarmuth, Lachish, ka Eglon, dog taban ruah

²⁴ ka dog taban ka yŭn Joshua. Jadi Joshua bagan sopŭrŭg daya Israel da tudu adŭp-i ka mritah bara pingubak adi ko sua biperang ayō ayŭh da na kaja ngara di tungo bara raja anŭ. Ka ngara ndai nimun dog bada.

²⁵ Komŭnŭ Joshua nang di bara pingubak, “Dŭhnyah taru puan kah jimŭ. Angān dŭh siŭn dŭh birani ka dŭhnyah atin ngan arot, sabab ati inŭh kayuh adi TUHAN re ndai di tunduh sopŭrŭg pinganyu ngan.”

²⁶ Jadi Joshua siŭ raja raja anŭ ka kideng ngara di rimŭh tŭngŭn kayuh, di yŭn tadang ngara dog tandah ndŭg singumi andu.

²⁷ Kan batŭh andu mbŭh simŭdŭp Joshua nggen pinganang, ka tadang ngara dog bisor ka dog taran ka darŭm tang adi ko ngara yŭn bisukan. Batuh batuh adi baga dog na di baba tang anŭ ngga nabat-i, ka-i babŭ diginŭ madin.

Joshua Sirabut dŭ dŭ bagŭ Tarun Tana Daya Amor

²⁸ Joshua nyerang ka sirabut kupo Makkedah samŭn raja-i andu anŭ. Ayŭh bada barang naan daya di kupo anŭ dog siŭ; ndi naan mating gŭh dog kidŭm. Ayŭh ndai di raja Makkedah nimun ayŭh mbŭh ndai di raja Jericho.

²⁹ Ripas anŭ, Joshua ngga bara soldadu-i matak so Makkedah di ka Libnah ka nyerang-i.

³⁰ TUHAN nggen gŭh di bara daya Israel pimanang sirabut kupo anŭ ka ngarah raja-i. Ngara dŭh kidŭm asi asi, pak siŭ barang naan daya adi agi diginŭ. Ngara ndai di raja anŭ nimun ngara mbŭh ndai di raja Jericho.

³¹ Ripas anŭ, Joshua ngga bara soldadu-i matak so Libnah di ka Lachish, kirurung ka nyerang-i.

³² TUHAN nggen di bara daya Israel pimanang, ngarah Lachish di andu adi duwŭh darŭm tipuh biperang anŭ. Nimun adi mbŭh ngara ndai di Libnah, ngara dŭh kidŭm asi asi, pak siŭ barang naan daya di kupo anŭ.

³³ Raja Horam so Gezer mandŭg di turung Lachish, pak Joshua ngarah ayŭh ngga bara soldadu-i ka dŭh tandah asi asi udip.

³⁴ Komŭnŭ, Joshua ngga bara soldadu-i matak so Lachish di ka Eglon, kirurung ka nyerang-i.

³⁵ Ngara sirabut kupo anŭ andu anŭ gŭh ka siŭ barang naan daya adi agi diginŭ, nimun ngara mbŭh ndai di Lachish.

³⁶ Ripas anŭ, Joshua ngga bara soldadu-i matak dinge so Eglon, maad di ka gadung sandah di ka Hebron, nyerang-i

³⁷ ka sirabut-i. Ngara siŭ raja-i ngga barang naan daya di kupo anŭ samŭn di anak anak kupo adi maning anŭ. Joshua pirabur kupo anŭ, nimun adi mbŭh-i ndai di Eglon. Ndi naan daya mating gŭh dŭm.

³⁸ Komŭnŭ Joshua ngga bara soldadu-i pari ka Debir ka nyerang-i.

³⁹ Ayŭh sirabut-i, samŭn raja-i ka sopŭrŭg anak anak kupo adi sindŭk anŭ. Ngara siŭ barang naan daya adi agi diginŭ. Joshua ndai di Debir ngga di raja-i nimun adi mbŭh-i ndai di Hebron ngga di Libnah ngga raja-i.

⁴⁰ Joshua sirabut ndi tarun tarun tana anŭ. Ayŭh ngarah raja raja rais tarun tana sandah, ired ired tura ka timor, ka sigŭn sandah tura ka barat, samŭn tarun tana adi badŭh di rais tura ka siratan. Ndi naan mating gŭh dog tandah; barang naan dog siŭ. Anŭ inŭh adi TUHAN Tapa daya Israel mbŭh pesan.

⁴¹ Joshua ngarah ndi tarun tarun tana so Kadesh Barnea di tura ka siratan ndŭg Gaza sindŭk bŭngŭn rawŭt, samŭn sopŭrŭg tarun tana Goshen, ka jeh ka utara ndŭg Gibeon.

⁴² Joshua ngarah sopŭrŭg raja anŭ ka tambit tarun tana ngara darŭm ndi sidah matak, sabab TUHAN, adi Tapa Israel, agi birawan yŭn Israel.

⁴³ Ripas anŭ, Joshua ngga bara soldadu-i pari ka yŭn ngara bibari di Gilgal.