JONAH 3 - Hakcipta - Biatah Bidayuh

Jonah Tunda Pinganang TUHAN

¹ TUHAN minyu ngga Jonah dinge.

² Ayŭh nang, “Di ka Nineveh, kupo bās anŭ, ka kidaan di daya diginŭ pinganang adi Aku mbŭh nggen di kuu.”

³ Ka Jonah tunda pinganang TUHAN ka matak ka Nineveh, ndi kupo adi bayah adi tungang taruh andu nŭŭh panu mutas-i.

⁴ Jonah piguru panu di kupo anŭ, ka ripas panu ndi andu, ayŭh kidaan, “Dŭm pat puru andu Nineveh re dog pirabur!”

⁵ Daya Nineveh sabah pinganang Tapa. Jadi ngara bada barang naan daya bipusa, ka sopŭrŭg daya, adi kaya ngga adi sirata, nēn piraka banang guni adi tandā atin nyesar amai dosa.

⁶ Kan raja Nineveh dingah kayuh anŭ, ayŭh makat so takta-i, kadi kasut-i, kasŭk piraka banang guni, ka guru di tunduh apŭk.

⁷ Ayŭh piagah di daya Nineveh: “Ati inŭh pesan so raja ngga bara pinurung-i: Sopŭrŭg daya dŭh siŭn man bait nok, samŭn sapi sapi, biri biri ka sopŭrŭg dāng kudip.

⁸ Sopŭrŭg daya ngga dāng dŭh siŭn dŭh nēn piraka banang guni. Barang naan daya dŭh siŭn dŭh bidua ngga siabo atin ngara ka Tapa ka dŭh siŭn dŭh ko udip ginaka ka dŭh tia ndai pingandai adi arap.

⁹ Kadŭ Tapa bisa nukar pikir-I; kadŭ Ayŭh bisa ko baji, ka ata meh dŭh re kabŭs!”

¹⁰ Tapa kiris ani adi ndai ngara; Ayŭh kiris ngara mbŭh pasan urah ginaka ngara. Jadi Ayŭh nukar pikir-I ka dŭh ngukum ngara nimun adi ko-I nang.