JOHN 9 - Hakcipta - Biatah Bidayuh

Jesus Pibua Ndi naan Daya Karak

¹ Darŭm Jesus panu, Ayŭh kiris ndi naan daya adi mbŭh karak so andu-i dog biranak.

² Bara murid-I siken Ayŭh, “Gurū, dosa asi adi bada ayŭh dog biranak karak? Dosa adŭp-i kah dosa pimas-i?”

³ Jesus nam, “Anŭ dŭh sitagar dosa-i puan kah sitagar dosa pimas-i, pak isa kuasa Tapa bisa dog kiren darŭm ayŭh.

⁴ Siragi andu babŭ jawa, ata dŭh siŭn dŭh an ndai pingandai adi-I pait Aku da ndai; kan-i mbŭh karŭm, mating daya bisa nyiraja.

⁵ Sitadŭn Aku agi di ong, Aku inŭh Jawa ong.”

⁶ Ripas-I ko nang sakanŭ, Jesus nyiruja di tana ka kunyak-i ngga ruja anŭ; Ayŭh gurai-i di batŭh daya anŭ

⁷ ka nang, “Panu di ngu jawin mu di Pagong Siloam.” (Rati Siloam inŭh “Dog pait.”) Ka daya anŭ di ngu jawin-i, ka pari buang dapŭd kiris.

⁸ Bara dingan-i samŭn daya adi ko kiris ayŭh mite sidakah nang, “Dŭh kah siati daya adi siraru ta kiris guru mite sidakah?”

⁹ Kada daya nang, “Ayŭh inŭh anŭ,” pak adi bŭkŭn nang, “Dŭh, pak-i mun ayŭh.” Ka adŭp daya anŭ meh nang, “Aku inŭh ayŭh.”

¹⁰ “Simuki kuu dapŭd kiris madin?” ngara siken ayŭh.

¹¹ Ayŭh nam, “Daya adi dŭn Jesus kunyak tana, gurai-i di batŭh ku, ka bada aku di ka Siloam di ngu jawin ku. Aku di, ka ngu jawin ku ka nganŭ gŭh aku dapŭd kiris.”

¹² “Diki daya anŭ?” ngara siken. “Dŭh aku puan,” ayŭh nam.

Bara daya Pharisee Siken munki Ayŭh dapŭd Kiris

^13-14 Andu adi ngga Jesus kunyak tana anŭ ka pibua daya anŭ mbŭh andu Sabbath. Jadi ngara taban daya anŭ, adi ko karak, ka yŭn bara daya Pharisee.

¹⁵ Ngapŭi daya Pharisee siken dinge ayŭh, munki ayŭh dapŭd kiris. Ayŭh nang di ngara, “Ayŭh gurai tana adi-I ko kunyak di batŭh ku; aku ngu jawin ku, ka madin aku dapŭd kiris.”

¹⁶ Kada daya Pharisee nang, “Daya adi ndai kayuh ati dŭh-I so Tapa, amai Ayŭh dŭh sita ukum-adat Sabbath.” Adi bŭkŭn nang, “Simuki daya adi bidosa bisa ndai pingandai-nginga adi mun ati?” Pinyidapŭd ngara di kayuh anŭ mbŭh dŭh brinyam.

¹⁷ Ngara siken daya anŭ dinge, “Kuu nang Ayŭh pibua kuu, bada kuu dapŭd kiris; ani pikir-kira mu pasar Ayŭh?” “Ayŭh anŭ Nabi,” daya anŭ nam.

¹⁸ Bara Pinguasa Jahudi dŭh an sabah ayŭh ko karak ka madin mbŭh dapŭd kiris, ndŭg ka ngara bagan pimas-i.

¹⁹ Ngara siken, “Anak ngan kah siati? Angān nang ayŭh karak so andu-i dog biranak; simuki meh garang ayŭh dapŭd kiris madin?”

²⁰ Pimas-i nam, “Kieh puan ayŭh anak ami, ka kieh puan ayŭh karak so andu-i dog biranak.

²¹ Pak kieh dŭh puan simuki ayŭh dapŭd kiris madin; ka kieh dŭh gŭh puan asi pibua ayŭh, bada ayŭh dapŭd kiris. Siken adŭp-i; ayŭh mbŭh baga ka bisa nam yŭn adŭp-i!”

²² Pimas-i nang sakanŭ sabab ngara taru bara Pinguasa Jahudi, adi mbŭh bipekat an pibu tadŭ daya so ramin simayang-Jahudi adi ngaku Jesus sawŭ Kristus.

²³ Anŭ sabab pimas-i nang, “Ayŭh mbŭh baga; siken adŭp-i!”

²⁴ Ngara bagan dinge daya anŭ adi taŭn ko karak so-i dog biranak, ka nang di ayŭh, “Bipayu di sirung jawin Tapa kuu nang kayuh adi sawŭ! Kieh puan daya anŭ adi pibua kuu daya bidosa.”

²⁵ “Aku dŭh puan bait-i Ayŭh daya adi bidosa puan kah daya adi dŭh bidosa,” daya anŭ nam, “Kaŭs aku puan: Aku agi karak, ka madin aku kiris tarun.”

²⁶ “Ani ndai-I di kuu?” ngara siken. “Simuki Ayŭh pibua kuu, bada kuu dapŭd kiris?”

²⁷ “Muko aku kidaan di angān,” ayŭh nam, “ka angān dŭh an sabah. Mani angān an dingah dinge? Manyah-i angān an jadi murid-I gŭh?”

²⁸ Ngara bakit ayŭh ka nang, “Kuu murid-I; kieh murid Moses.

²⁹ Kieh puan Tapa mbŭh minyu di Moses, pak daya anŭ, so ki Ayŭh mandŭg dŭh gŭh kieh puan!”

³⁰ Daya anŭ nam, “Saruh kayuh ati! Angān dŭh puan so ki Ayŭh mandŭg, pak Ayŭh mbŭh pibua aku, bada aku dapŭd kiris!

³¹ Ata puan Tapa dŭh dingah pimite daya bidosa; Ayŭh dingah pimite daya adi stabi di Ayŭh ka adi ndai pinyiraan-I.

³² So sibungas ong jadi gi-bŭn ata dingah agah pasar daya bada daya adi dog biranak karak dapŭd kiris.

³³ Kambŭi daya ati dŭh mandŭg so Tapa, Ayŭh manŭn dŭh dapŭd ndai ani ani.”

³⁴ Ngara nam, “Kuu dog biranak ka dog nyiran darŭm dosa, ka kuu suba re ngajar kieh?” Ka ngara miratak ukum di tunduh ayŭh da dŭh tia mŭrŭt ramin simayang-Jahudi.

Karak Darŭm Pimudip Roh

³⁵ Kan Jesus dingah kayuh adi mbŭh jadi, Ayŭh di dapŭd daya anŭ ka siken ayŭh, “Sabah mu kah di Anak Manusia?”

³⁶ Daya anŭ nam, “Kidaan di aku, Tuan, asi Ayŭh, isa aku bisa sabah di Ayŭh!”

³⁷ Jesus nang di ayŭh, “Kuu mbŭh kiris Ayŭh, ka adŭp-I inŭh adi minyu ngga kuu madin.”

³⁸ “Aku sabah Tuhan!” daya anŭ nang ka-i sidikang nyambah Jesus.

³⁹ Jesus nang, “Aku mandŭg ka ong di kidaan arap kana daya, isa adi karak dapŭd kiris ka adi dapŭd kiris jadi karak.”

⁴⁰ Kada daya Pharisee adi agi ngga Ayŭh diginŭ, dingah Ayŭh minyu sakanŭ; ngara siken, “Kieh ati karak gŭh kah?”

⁴¹ Jesus nam, “Kambŭi angān karak, angān dŭh bidosa. Pak amai angān nang adŭp ngan kiris tarun, sirati-i angān babŭ bidosa.”