JOHN 8 - Hakcipta - Biatah Bidayuh

Ndi Naan Dayung dog Nakap Tanggah

¹ Barang naan daya maad ka ramin adŭp-i, pak Jesus di ka Sandah Kanā.

² Awar isan isan andu jawa ndi Ayŭh pari ka Ramin Tuhan. Sopŭrŭg daya mandŭg tikuruk maning Ayŭh; Ayŭh guru ka piguru ngajar ngara.

³ Bara gurū Ukum-adat Jahudi ngga daya Pharisee mandŭg taban ndi naan dayung adi dog nakap ndai pingandai tanggah. Ngara bada dayung anŭ mijog nura daya bagŭ.

⁴ “Gurū,” ngara nang di Jesus, “dayung ati dog nakap darŭm-i aŭn tanggah.

⁵ Darŭm Ukum-adat ta, Moses ko pesan nang dayung adi mun ati patut dog manjan ngga batuh ndŭg ka kabŭs. Ani pikir-kira Mai pasar kayuh ati?”

⁶ Ngara nang sakanŭ an kudog Jesus, yŭn ngara bisa nyarah Ayŭh. Pak Ayŭh mutu ka nuris di tana ngga trinju-I.

⁷ Darŭm ngara mijog diginŭ siken Ayŭh, Ayŭh rasu mijog ka nang di ngara, “Asi so angān adi bŭn ndai dosa, bisa migarang sibungas batuh ka ayŭh.”

⁸ Komŭnŭ Ayŭh mutu dinge, nuris di tana.

⁹ Kan ngara dingah sakanŭ, sopŭrŭg ngara bu, ndi ngga ndi, piguru ngga sianŭ adi minyamba dŭ. Sikasŭn-i, Jesus ngga dayung anŭ adŭ diginŭ.

¹⁰ Jesus mijog ka nang di ayŭh, “Diki ngara? Mating kah daya re ngukum kuu?”

¹¹ “Mating, Tuan,” ayŭh nam. “Kambŭi mun anŭ,” Jesus nang, “Aku dŭh gŭh re ngukum kuu. Panu, dŭh tia ndai dosa.”]

Jesus Jawa Ong

¹² Jesus minyu di bara daya Pharisee dinge. “Aku ati inŭh jawa ong,” Ayŭh nang. “Daya adi tunda Aku re biyŭn jawa adi nggen udip ka dŭh re panu darŭm karŭm.”

¹³ Bara daya Pharisee nang di Ayŭh, “Kuu bisaksi pasar adŭp Mu, pak kayuh adi nang Mu inŭh au-tarun, dŭh re bada daya sabah di Kuu!”

¹⁴ “Dŭh,” Jesus nam, “sunggu Aku bisaksi yŭn adŭp Ku, kayuh adi Aku nang agi sawŭ, sabab Aku puan so ki Aku mandŭg ka kamaki Aku re di. Angān dŭh puan so ki Aku mandŭg puan kah kamaki Aku re di.

¹⁵ Angān nyarah daya pakai pinganang manusia; Aku dŭh nyarah daya.

¹⁶ Pak kambŭi Aku nyarah, pinganang Ku agi sawŭ, sabab Aku dŭh sadi; Sama Ku adi bada Aku mandŭg agi ngga Aku.

¹⁷ Mbŭh agi dog nuris darŭm Ukum-adat ngan: taksi so duwŭh naan daya agi batur.

¹⁸ Aku bisaksi yŭn adŭp Ku, ka Sama adi bada Aku mandŭg bisaksi gŭh yŭn Ku.”

¹⁹ “Diki Sama Mu?” ngara siken Ayŭh. “Angān dŭh puan Aku ka dŭh gŭh puan Sama Ku,” Jesus nam. “Kambŭi angān puan Aku, angān puan gŭh Sama Ku.”

²⁰ Jesus nang sopŭrŭg kayuh ati darŭm-I ngajar di Ramin Tuhan, darŭm birit di yŭn dudu pati duit dog na. Pak mating daya nakap Ayŭh, sabab tipuh-I gibayuh mandŭg.

Angān Dŭh Bisa Di Ka Tarun Yŭn adi re Ku Ka

²¹ Jesus nang dinge di ngara, “Aku re bu; angān re jiroh Aku, pak angān re kabŭs darŭm dosa ngan. Angān dŭh bisa di ka tarun yŭn adi re Ku ka.”

²² Bara Pinguasa Jahudi nang, “Ayŭh nang ata dŭh bisa di ka tarun yŭn adi re-I ka. Manyah Ayŭh re siŭ adŭp-I?”

²³ Jesus nam, “Angān daya ong ati di ribo, Aku mandŭg so sambu. Angān so ong ati, Aku dŭh so ong ati.

²⁴ Ngapŭi Aku nang angān re kabŭs darŭm dosa ngan. Sawŭ inŭh angān re kabŭs kambŭi angān dŭh sabah ‘Aku ati inŭh Ayŭh’.”

²⁵ “Asi Kuu?” ngara siken Ayŭh. Jesus nam, “Kayuh adi Aku kidaan di angān so sibungas-i.

²⁶ Bagŭ kayuh an Ku nang pasar angān, ngga nunggu angān. Ayŭh adi bada Aku mandŭg, bisa dog sabah, ka Aku kidaan di ong kayuh adi Aku ko dingah so Ayŭh.”

²⁷ Ngara dŭh mirati Jesus minyu di ngara pasar Sama.

²⁸ Jadi Ayŭh nang di ngara, “Kan angān katuh Anak Manusia, angān re puan ‘Aku ati inŭh Ayŭh’; komŭnŭ angān re puan Aku dŭh ndai kayuh so ka pinyiraan adŭp Ku, pak nimun Sama mbŭh ngajar Aku, sakanŭ inŭh Aku minyu.

²⁹ Ka Ayŭh adi bada Aku mandŭg agi ngga Aku; Ayŭh dŭh tingge Aku sadi, sabab Aku siraru ndai anŭ adi pimunos asŭng-I.”

³⁰ Bagŭ ngara adi dingah Jesus minyu sakanŭ mbŭh sabah di Ayŭh.

Pinyawŭ Re Pirupas Angān

³¹ Jadi Jesus nang di ngara adi sabah di Ayŭh, “Kambŭi angān tunda ajar Ku, angān sawŭ bara murid Ku.

³² Angān re puan pinyawŭ, ka pinyawŭ anŭ re pirupas angān.”

³³ “Kieh sesang Abraham,” ngara nam, “bŭn kieh jadi urun daya. Ani meh anŭ nang Mai kan Kaam nang, ‘Angān re dog pirupas’?”

³⁴ Jesus nang di ngara, “Aku kidaan di angān kayuh adi sawŭ: barang naan daya adi bidosa mbŭh jadi urun dosa.

³⁵ Urun dŭh-i rŭŭ adu adu ngga rawang, anak inŭh adi rŭŭ adu adu ngga rawang.

³⁶ Kambŭi Anak pirupas angān, angān tŭk sawŭ mbŭh dog pirupas.

³⁷ Aku puan angān mbŭh bara sesang Abraham. Pak angān an siŭ Aku, sabab angān dŭh an trima ajar Ku.

³⁸ Aku minyu pasar kayuh adi Sama Ku mbŭh kiren di Aku, pak angān ndai anŭ adi sama ngan bada angān ndai.”

³⁹ Ngara nam Ayŭh, “Sama ami inŭh Abraham.” “Kambŭi angān sawŭ bara anak Abraham,” Jesus nam, “angān patut ndai anŭ adi-i ndai.

⁴⁰ Anŭ adi Aku ndai inŭh kidaan di angān pinganang adi sawŭ adi Tapa ko kidaan di Aku, pak angān an siŭ Aku. Abraham dŭh ndai kayuh mun anŭ!

⁴¹ Angān ndai anŭ adi sama ngan ndai.” “Kaŭs-i Adŭp Tapa sadi adŭ adi Sama ami,” ngara nam, “ka kieh ati mbŭh sawŭ bara anak-I.”

⁴² Jesus nang di ngara, “Kambŭi Tapa sawŭ Sama ngan, angān rindu Aku, sabab Aku mandŭg so Tapa ka madin mbŭh agi digiti. Aku dŭh mandŭg ngga pinyiraan adŭp Ku, pak Ayŭh inŭh adi pait Aku.

⁴³ Mani angān dŭh mirati kayuh adi nang Ku? Angān mun anŭ sabab angān dŭh tan dingah ajar Ku.

⁴⁴ Angān inŭh bara anak sama ngan, Siarap; angān raan tunda pinyiraan-i. So sibungas-i ayŭh taŭn mbŭh pinyiŭ ka bŭn adŭ tura ka pinyawŭ, sabab mating pinyawŭ darŭm ayŭh. Kan ayŭh kadong, anŭ mbŭh taŭn tibiat adŭp-i, sabab ayŭh pingadong ka raja pingadong.

⁴⁵ Pak Aku, Aku nang kayuh adi sawŭ, ka sitagar anŭ angān dŭh sabah Aku.

⁴⁶ Asi so angān tungang kidaan nang Aku ati agi ndai dosa? Kambŭi Aku kidaan kayuh adi sawŭ, mani meh garang angān dŭh sabah Aku?

⁴⁷ Ayŭh adi mandŭg so Tapa dingah pinganang Tapa. Pak angān dŭh so Tapa, ka anŭ inŭh sabab angān dŭh an dingah pinganang Tapa.”

Jesus ngga Abraham

⁴⁸ Ngara siken Jesus, “Dŭh kah kieh batur kan kieh nang Kuu daya Samaria ka mbŭh dog mŭrŭt umot?”

⁴⁹ “Dŭh Aku dog mŭrŭt umot,” Jesus nam. “Aku stabi di Sama Ku, pak angān dŭh stabi di Aku.

⁵⁰ Aku dŭh jiroh daya stabi di adŭp Ku. Pak agi ndi naan adi raan Aku dog stabi, ka Ayŭh inŭh arang adi tŭnggŭn.

⁵¹ Aku kidaan di angān kayuh adi sawŭ: daya adi dingah ajar Ku dŭh-i re kabŭs.”

⁵² Ngara nang di Ayŭh, “Madin kieh puan Kuu sawŭ pirumot! Abraham mbŭh kabŭs, simŭnŭ gŭh bara nabi, pak Kuu nang daya adi dingah ajar Mu dŭh re kabŭs.

⁵³ Kuu bās dŭ so sama ami Abraham kah? Ayŭh mbŭh kabŭs, simŭnŭ gŭh bara nabi. Kuu bada adŭp Mu jadi asi?”

⁵⁴ Jesus nam, “Kambŭi Aku nyibragah adŭp Ku, pinyibragah Ku anŭ au-tarun. Ayŭh adi nyibragah Aku inŭh Sama Ku, adi angān nang Tapa ngan.

⁵⁵ Angān dŭh puan Ayŭh, pak Aku puan Ayŭh. Kambŭi Aku nang adŭp Ku dŭh puan Ayŭh, Aku pingadong mun angān. Aku sawŭ puan Ayŭh, ka Aku dingah pinganang-I.

⁵⁶ Sama ngan Abraham ko raru gaŭn kan-i re kiris andu Ku; ayŭh mbŭh kiris-i ka mbŭh sanang asŭng-i.”

⁵⁷ Ngara nang di Ayŭh, “Umbur Mu gibayuh tungang rimŭh-puru sawa, ka Kuu mbŭh kiris Abraham kah?”

⁵⁸ “Aku kidaan di angān kayuh adi sawŭ,” Jesus nam. “Sibayuh Abraham dog biranak Aku mbŭh agi.”

⁵⁹ Jadi ngara rasu mbit batuh re manjan Ayŭh, pak Jesus sukan adŭp-I ka ruah so Ramin Tuhan.