JOHN 5 - Hakcipta - Biatah Bidayuh

Pibua Daya bajang di Pagong Bethesda

¹ Ripas anŭ, Jesus di ka Jerusalem di tudu gawai adat Jahudi.

² Dŭh jo so tiban kupo adi dog kadŭn Tiban Biri di Jerusalem agi ndi pagong adi biyŭn rimŭh awah; darŭm piminyu Hebrew ayŭh dog kadŭn Bethzatha.

³ Mbŭh agi bara daya adi birandam guring di awah awah anŭ, adi karak, adi bajang, ka adi naman andam ruku. Ngara mbŭh kajŭn piin biguyut, [

⁴ sabab malaikat Tuhan agi andu-i mūn ka pagong anŭ ka kiruyok piin anŭ. Adi diŭ bisor adŭp-i ka darŭm pagong kan piin dog kiruyok dapŭd bua so barang masam andam-i.]

⁵ Agi diginŭ ndi naan daya adi mbŭh birandam sitŭkŭd taruh puru-mai sawa.

⁶ Jesus kiris ayŭh guring diginŭ, buang-I mbŭh puan ayŭh taŭn mbŭh tui birandam; Ayŭh siken, “An kah kuu bua?”

⁷ Daya anŭ nam, “Tuan, aku dŭh biyŭn daya re turung bisor aku ka darŭm piin ati kan-i dog kiruyok malaikat; darŭm aku suba re mŭrŭt, daya bŭkŭn mbŭh diŭ mŭrŭt.”

⁸ Jesus nang di ayŭh, “Makat, mbit ambok mu, ka panu.”

⁹ Daya anŭ rasu bua so andam-i; ayŭh mbit ambok-i ka rasu panu. Kayuh ati jadi di andu Sabbath,

¹⁰ jadi bara Pinguasa Jahudi nang di daya anŭ adi dog pibua, “Ati mbŭh andu Sabbath, ka-i mbŭh miranggar Ukum-adat inŭh kuu gŭrŭng ambok mu di andu ati.”

¹¹ Ayŭh nam, “Ayŭh adi pibua aku inŭh adi bada aku tunduk ambok ku ka panu.”

¹² Ngara siken ayŭh, “Asi daya anŭ adi bada kuu ndai simŭnŭ?”

¹³ Pak daya anŭ adi dog pibua dŭh puan asi Jesus, buang-i daya mbŭh raru bagŭ diginŭ, ka adŭp Jesus mbŭh bu so uruk daya.

¹⁴ Ripas anŭ, Jesus dapŭd ayŭh di Ramin Tuhan, ka nang di ayŭh, “Ingat nŭh, kuu mbŭh bua madin; dŭh tia bidosa te kayuh adi rabis arap jadi di kuu rai-i.”

¹⁵ Daya anŭ bu ka kidaan di bara Pinguasa Jahudi nang Jesus inŭh sianŭ adi pibua adŭp-i.

¹⁶ Jadi ngara meh piguru kisiis Jesus, sabab Ayŭh mbŭh pibua daya di andu Sabbath.

¹⁷ Jesus nam ngara, “Sama Ku dŭh masah nyiraja, ka Aku gŭh dŭh siŭn dŭh nyiraja.”

¹⁸ Pinganang-I ati bada bara Pinguasa Jahudi tanŭ ka an siŭ Ayŭh; dŭh sabab Ayŭh miranggar ukum-adat Sabbath adŭ, pak sabab Ayŭh mbŭh nang Tapa Sama-I; ngga pinganang-I anŭ Ayŭh mbŭh bada adŭp-I brimun ngga Tapa.

Kuasa Anak

¹⁹ Jadi Jesus nang di ngara, “Aku kidaan di angān kayuh adi sawŭ: Anak dŭh bisa ndai kayuh sadi adŭp-I; Ayŭh ndai anŭ adi-I kiris Sama-I ndai. Anŭ adi Sama ndai, Anak ndai gŭh.

²⁰ Sabab Sama rindu Anak Ayŭh mbŭh kiren sopŭrŭg adi-I ndai di Anak. Ayŭh re kiren di Ayŭh kayuh adi rabis bās so ati; sopŭrŭg ngan re inga inga da-I.

²¹ Nimun Sama pakat daya adi kabŭs ka nggen di ngara udip, simŭnŭ gŭh Anak nggen udip anŭ di ngara adi-I raan.

²² Sama dŭh nyarah daya. Ayŭh muko nggen di Anak kuasa ngga sipuno-i ngga tingga arap kana daya,

²³ isa sopŭrŭg bisa kibās Anak nimun ngara kibās Sama. Asi asi adi dŭh kibās Anak, dŭh kibās Sama adi pait Ayŭh.

²⁴ “Aku kidaan di angān kayuh adi sawŭ: daya adi dingah pinganang Ku ka sabah di Ayŭh adi pait Aku biyŭn udip adi sawŭ adi tan adu adu. Ngara dŭh re dog ukum, pak mbŭh ruah so pinyikabŭs nuju udip anŭ.

²⁵ Aku kidaan di angān kayuh adi sawŭ: tika-i mbŭh mandŭg, adi ngga daya adi mbŭh kabŭs dingah sirŭŭn Anak Tapa, ka ngara adi dingah re udip.

²⁶ Nimun Sama mbŭh adŭp-I atak udip, simŭnŭ gŭh Ayŭh mbŭh bada Anak-I jadi atak udip.

²⁷ Ka Ayŭh mbŭh nggen di Anak kuasa ngga tingga arap kana daya, sabab Ayŭh inŭh Anak Manusia.

²⁸ Dŭhnyah gŭgŭh dingah ati; andu-i re mandŭg kan bara adi kabŭs re dingah sirŭŭn-I

²⁹ ka ruah so kubur: ngara adi ko ndai kana re makat ka dapŭd udip anŭ, ka ngara adi mbŭh ndai arap re makat ka dog nunggu.

Bisaksi Yŭn Jesus

³⁰ “Aku dŭh bisa ndai ani ani ngga kuasa adŭp Ku sadi; Aku tingga arap kana daya so pinyibada Tapa adŭ, ngapŭi anŭ adi Aku nang agi batur, sabab-i dŭh so pinyiraan adŭp Ku, pak so pinyiraan-I adi pait Aku.

³¹ “Kambŭi Aku bisaksi yŭn adŭp Ku, anŭ adi Aku nang dŭh bisa dog pakai.

³² Sama inŭh adi bisaksi yŭn Ku, ka Aku puan kayuh adi-I nang pasar Aku agi sawŭ.

³³ Angān ko pait pinyisung ngan ka John, ka ayŭh muko nggen taksi adi sawŭ pasar Aku.

³⁴ Dŭh sirati-i Aku dŭh siŭn dŭh biyŭn taksi so adŭp manusia; Aku nang sakanŭ isa angān dapŭd dog nyiramat.

³⁵ John mbŭh keya ka prita, sakŭt buang nyekar, ka angān ko ndi sidah sua angan jawa-i.

³⁶ Pak Aku biyŭn taksi yŭn adŭp Ku adi rabis bās so taksi adi John nggen: Kayuh adi Aku ndai so pinyibada Tapa, mbŭh minyu yŭn Ku ka kiren Aku taŭn dog pait Sama.

³⁷ Ka Sama adi pait Aku mbŭh gŭh bisaksi ngarun Aku. Angān gi-bŭn dingah sirŭŭn-I puan kah kiris jawin-I,

³⁸ ka angān dŭh sabah di pinganang-I, amai angān dŭh sabah di sianŭ adi-I Pait.

³⁹ Angān birajar Surat-kudus, sabab angān pikir darŭm-i angān bisa dapŭd udip adi sawŭ adi tan adu adu. Ka Surat-kudus ati inŭh adi mbŭh minyu pasar Aku!

⁴⁰ Pak angān dŭh an mandŭg ka Aku yŭn dapŭd udip adi sawŭ.

⁴¹ “Dŭh Aku jiroh puji so manusia.

⁴² Pak Aku puan asi angān sibandar-i; angān dŭh biyŭn pinyirindu di Tapa darŭm atin ngan.

⁴³ Aku mbŭh mandŭg ngga kuasa Sama Ku, pak angān dŭh trima Aku; pak daya bŭkŭn adi mandŭg ngga kuasa adŭp-i angān re trima.

⁴⁴ Angān suka kambat puji so dingan ngan, pak angān bŭn suba jiroh puji so sianŭ adi sadi-I Tapa; simuki meh garang angān re tungang sabah Aku?

⁴⁵ Pak dŭhnyah pikir Aku ati mbŭh sianŭ adi re nyarah angān di Sama Ku. Moses, adi yŭn ngan na puno pingarap ngan, mbŭh sianŭ adi re nyarah angān.

⁴⁶ Kambŭi angān sawŭ sabah Moses, angān sabah gŭh Aku, sabab ayŭh ko nuris pasar Aku.

⁴⁷ Pak amai angān dŭh sabah kayuh adi-i ko nuris, simuki meh garang angān re sabah kayuh adi Aku nang.”