JOHN 18 - Hakcipta - Biatah Bidayuh

Jesus Dog Nakap

¹ Ripas Jesus ko nang dua anŭ, Ayŭh bu ngga bara murid-I mutas sungi Kidron. Agi teya di tarun anŭ, ka Jesus ngga bara murid-I mūn kamanŭ.

² Judas, adi jua Ayŭh, puan tarun anŭ, sabab mbŭh siraru Jesus ngga bara murid-I tikuruk diginŭ.

³ Jadi Judas di ka teya anŭ, taban ndi tibaran soldadu daya Rome, samŭn kada ngara adi tukang jaga Ramin Tuhan adi dog pait bara pingubak imam ka bara daya Pharisee; ngara mandŭg taban prita-siru' buang nakin pedang.

⁴ Jesus puan sopŭrŭg kayuh adi re jadi di adŭp-I, Ayŭh tudu ngara ka siken, “Asi jiroh ngan?”

⁵ “Jesus so Nazareth,” ngara nam. “Aku ati inŭh Ayŭh,” Ayŭh nang. Judas, adi jua Ayŭh, agi mijog diginŭ ayō ngara.

⁶ Kan Jesus nang di ngara, “Aku ati inŭh Ayŭh,” ngara ngundur ka tumbang ka tana.

⁷ Jesus pari siken ngara, “Asi jiroh ngan?” “Jesus so Nazareth,” ngara nang.

⁸ “Ko Aku nang, Aku ati inŭh Ayŭh,” Jesus nang. “Jadi kambŭi angān jiroh Aku, tandah ngara ati bu.” (

⁹ Ayŭh nang sakanŭ isa kayuh adi-I ko nang jadi bitŭtŭk: “Sama, ndi so ngara adi Kaam mbŭh nggen di Aku mating gŭh manyap.”)

¹⁰ Simon Peter, adi biyŭn pedang, nyitak-i ka japa urun Imam Bās, nyaper kajit tauh-i. Dŭn urun anŭ inŭh Malchus.

¹¹ Jesus nang di Peter, “Kasŭk pedang mu pari ka sibong-i! Aku dŭh siŭn dŭh nok so makuk jera-birasa adi Sama Ku mbŭh nggen di Aku.”

Jesus Dog Taban ka Yŭn Annas

¹² Jadi bara soldadu daya Rome ngga pingubak ngara samŭn bara adi tukang jaga Ramin Tuhan nakap Jesus, muak Ayŭh,

¹³ ka taban Ayŭh diŭ ka Annas. Ayŭh anŭ damŭh Caiaphas, adi Imam Bās di sawa anŭ.

¹⁴ Adŭp Caiaphas inŭh adi pitayan bara Pinguasa Jahudi nang kana dŭ ndi naan kabŭs yŭn sopŭrŭg daya.

Peter Miman Jesus

¹⁵ Simon Peter samŭn ndi naan murid adi bŭkŭn tunda Jesus. Murid anŭ ndi kanyet Imam Bās, ngapŭi ayŭh mŭrŭt sua ngga Jesus ka darŭm badag ramin Imam Bās.

¹⁶ Peter babŭ di sapa sindŭk tiban buwang ramin. Komŭnŭ murid anŭ ndi ruah ka sapa, minyu ngga dayung di tiban buwang ramin, ka taban Peter ngga mŭrŭt.

¹⁷ Dayung anŭ adi nguan tiban buwang ramin nang di Peter, “Dŭh kah kuu ndi so bara murid daya anŭ gŭh?” “Dŭh, dŭh-i aku,” Peter nam.

¹⁸ Nganŭ gŭh mbŭh raru madud, jadi bara daya-gaji samŭn bara adi tukang jaga ndai apui arang, ka mijog maning-i nyinduh. Jadi Peter mandŭg ka mijog ngga ngara, sua nyinduh.

Imam Bās Siken Jesus

¹⁹ Imam Bās siken Jesus pasar bara murid-I ka pasar ajar-I.

²⁰ Jesus nam, “Aku agi siraru minyu di sirung jawin daya bagŭ; Aku agi ngajar di ramin ramin simayang-Jahudi ka di Ramin Tuhan, di yŭn bagŭ daya mandŭg tikuruk. Bŭn Aku nang ani ani darŭm bisukan.

²¹ Mani meh, garang, kuu siken Aku? Siken di ngara adi ko dingah Aku ngajar. Siken di ngara kayuh adi Aku ko kidaan di ngara. Ngara puan kayuh adi ko Ku nang.”

²² Darŭm Jesus minyu sakanŭ, ndi so ngara adi tukang jaga diginŭ napar Ayŭh, nang-i, “Pagan Kuu minyu sakanŭ di Imam Bās!”

²³ Jesus nam ayŭh, “Kambŭi Aku agi nang kayuh adi sarah, kidaan di bara adi agi digiti ani anŭ adi sarah nang Ku. Pak kambŭi Aku batur di piminyu Ku, mani kuu napar Aku?”

²⁴ Komŭnŭ Annas pait Ayŭh, babŭ dog muak, ka yŭn Caiaphas adi Imam Bās.

Peter Miman Jesus Dinge

²⁵ Peter babŭ mijog diginŭ nyinduh. Ka bara adi bŭkŭn nang di ayŭh, “Dŭh kah kuu ati ndi so bara murid daya anŭ?” Pak Peter miman. “Dŭh, dŭh aku,” ayŭh nang.

²⁶ Ndi so bara urun Imam Bās, madis sianŭ adi Peter ko nyaper kajit-i, minyu. “Dŭh kah aku agi kiris kuu ngga Ayŭh di teya?” ayŭh siken.

²⁷ Babŭ gŭh Peter nang, “Dŭh.” Ka jam anŭ gŭh babang kukok.

Jesus Dog Taban Ka yŭn Pilate

²⁸ Awar isan isan Jesus dog taban so ramin Caiaphas di ka istana gabenor. Bara Pinguasa Jahudi dŭh mŭrŭt istana, amai an jaga adŭp-i bisig nanyam ka adat, siŭn dapŭd man gawai Paska.

²⁹ Jadi Pilate ruah ka sapa ka yŭn ngara ka siken, “Ani sarah daya Ati?”

³⁰ Pinyinam ngara inŭh, “Re ngga mani kieh taban Ayŭh ka Kaam kambŭi Ayŭh dŭh biyŭn sarah.”

³¹ Pilate nang di ngara, “Tambit Ayŭh ka ngukum Ayŭh nanyam ka ukum-adat adŭp ngan.” Ngara nam, “Kieh dŭh siŭn nggen ukum kabŭs di daya.” (

³² Kayuh ati jadi siŭn pinganang Jesus jadi bitŭtŭk, di andu Ayŭh kidaan munki pinyikabŭs-I re.)

³³ Pilate pari ka darŭm istana ka bagan Jesus. “Kuu raja daya Jahudi kah?” ayŭh siken Jesus.

³⁴ Jesus nam, “Agi kah pinyiken ati mandŭg so adŭp mu; agi kah daya kidaan di kuu pasar Aku?”

³⁵ Pilate nam, “Kuu pikir aku ati daya Jahudi kah? Bangsa adŭp Mu ngga bara pingubak imam inŭh adi nyerah Kuu ka aku. Ani anŭ, mbŭh Mu ndai?”

³⁶ Jesus nam, “Pinyipritah Ku dŭh tung ong ati; kambŭi pinyipritah Ku tung ong ati, bara pinunda Ku bisa makat birawan siŭn Aku dŭh dog nyerah ka darŭm tangan bara Pinguasa Jahudi. Dŭh, pinyipritah Ku dŭh di ong ati!”

³⁷ Ka Pilate nang di Ayŭh, “Jadi Kuu ati raja, meh?” Jesus nam, “Adŭp mu mbŭh nang Aku raja. Aku dog biranak di ong yŭn ndi pinŭtŭn, an minyu pasar kayuh adi sawŭ. Asi asi adi trima kayuh adi sawŭ, dingah Ku.”

³⁸ “Kayuh ani adi sawŭ anŭ?” Pilate siken. Jadi Pilate pari ruah ka sapa ka nang di bara daya, “Aku dŭh tungang dapŭd sarah daya ati adi yŭn-I patut dog ukum.

Jesus Dog Nggen Ukum Kabŭs

³⁹ Pak nanyam ka adat ngan, aku siraru pirupas ndi naan daya adi dog jer yŭn ngan di tipuh Gawai Paska. An kah angān bada aku pirupas yŭn ngan raja daya Jahudi?”

⁴⁰ Ngara nam ngga sirŭŭn bana, “Dŭh, dŭh Ayŭh! Kieh an Barabbas!” (Barabbas inŭh pinyamun.)