JOHN 15 - Hakcipta - Biatah Bidayuh

Jesus Tŭngŭn Anggor adi Sawŭ

¹ “Aku inŭh tŭngŭn anggor adi sawŭ, ka Sama Ku inŭh tukang-teya anggor.

² Barang daan adi darŭm Aku adi dŭh buān Ayŭh japa, ka barang daan adi buān buwa Ayŭh pibisig isa-i buān rabis bagŭ buwa.

³ Angān mbŭh bisig sabab ajar adi Aku ko nggen di angān.

⁴ Rŭŭ darŭm Aku, ka Aku rŭŭ darŭm angān. Daan anggor dŭh bisa buān sadi adŭp-i, kambŭi-i dŭh bikanjak so tŭngŭn-i. Simŭnŭ gŭh angān dŭh bisa buān, kambŭi angān dŭh rŭŭ darŭm Aku.

⁵ “Aku inŭh tŭngŭn anggor, ka angān inŭh bara daan-i. Kambŭi daya rŭŭ darŭm Aku, ka Aku darŭm ngara, ngara re buān bagŭ buwa; amai angān dŭh bisa ndai ani ani kambŭi dŭh so Aku.

⁶ Ngara adi dŭh rŭŭ darŭm Aku dog taran keya ka daan kayuh; daan anŭ rayu ka dog nguruk ka dog taran ka darŭm apui da sau.

⁷ Kambŭi angān rŭŭ darŭm Aku ka pinganang Ku rŭŭ darŭm angān, angān bisa mite tadŭ tadŭ kayuh adi angān raan, ka angān re dapŭd-i.

⁸ Bragah Sama Ku tatŭng kan angān buān bagŭ buwa; ka simŭnŭ inŭh angān bisa jadi murid Ku.

⁹ Aku rindu angān nimun Sama rindu Aku; rŭŭ meh darŭm pinyirindu Ku.

¹⁰ Kambŭi angān sita pinyipesan Ku, angān re bijijŭ darŭm pinyirindu Ku, nimun Aku mbŭh sita pinyipesan Sama Ku ka bijijŭ darŭm pinyirindu-I.

¹¹ “Aku kidaan di angān kayuh ati isa pinyigaŭn Ku bisa agi ngga angān, ka isa pinyigaŭn ngan bisa jadi gŭgŭp.

¹² Pinyipesan Ku inŭh sakati: rindu dingan ngan, nimun Aku rindu angān.

¹³ Pinyirindu adi bās dŭ adi daya biyŭn yŭn bara dingan-i inŭh taran asŭng adŭp-i yŭn bara dingan-i anŭ.

¹⁴ Ka angān inŭh dingan Ku kambŭi angān ndai pinyiraan Ku.

¹⁵ Aku dŭh tia bagan angān daya-gaji, sabab daya-gaji dŭh puan kayuh adi tuan-i ndai. Pak Aku bagan angān dingan, sabab Aku mbŭh kidaan di angān sopŭrŭg kayuh adi Aku mbŭh dingah so Sama Ku.

¹⁶ Angān dŭh mien Aku; Aku mien angān ka tijuan angān da panu ka pijadi bagŭ buwa, buwa adi tan adu adu. Ka Sama meh re nggen di angān tadŭ kayuh adi angān mite ngga adŭn Ku.

¹⁷ Ati inŭh kayuh adi Aku bada angān ndai: Rindu dingan ngan.

Ong Tiru di Angān

¹⁸ “Kambŭi ong tiru di angān, angān patut ingat nang ong muko diŭ tiru di Aku.

¹⁹ Kambŭi angān tung ong, ong taŭn-i rindu angān adi mbŭh tung adŭp-i. Pak Aku mbŭh mien angān so ong ati, ka angān mbŭh dŭh tung ong; anŭ inŭh sabab-i tiru di angān.

²⁰ Ingat kayuh adi Aku ko kidaan di angān: ‘Daya urun dŭh-i bās dŭ so tuan-i.’ Kambŭi daya kisiis Aku, daya re kisiis gŭh angān; kambŭi daya tunda ajar Ku, daya re tunda gŭh tung jangān.

²¹ Pak ngara re ndai di angān anŭ adi ngara ko ndai di Aku, sabab angān mbŭh tung jaku. Ngara re ndai simŭnŭ sabab ngara dŭh puan sianŭ adi bada Aku mandŭg.

²² Ngara dŭh rada adŭp-i bidosa kambŭi Aku dŭh mandŭg ka kidaan di ngara. Ka madin meh, mating aran ngara re nang adŭp-i dŭh bidosa.

²³ Asi asi adi tiru di Aku, tiru di Sama Ku.

²⁴ Ngara dŭh rada adŭp-i bidosa kambŭi Aku dŭh ndai di ruang ngara kayuh adi daya bŭkŭn bŭn ndai; pak ngara mbŭh kiris kayuh adi Aku mbŭh ndai, ka mbŭh tiru di Aku samŭn di Sama Ku.

²⁵ Kayuh anŭ simŭnŭ isa kayuh adi mbŭh dog nuris di Ukum-adat bisa jadi bitŭtŭk: ‘Ngara tiru di Aku ngga dŭh biyŭn sabab.’

²⁶ “Pinurung, anŭ inŭh Roh Kudus, re mandŭg so Sama; Ayŭh kidaan kayuh adi sawŭ pasar Tapa. Aku re pait Ayŭh so Sama ka yŭn ngan, ka Ayŭh re minyu di angān pasar Aku.

²⁷ Ka angān gŭh, re minyu pasar Aku, sabab angān mbŭh agi ngga Aku so sibungas-i.