JOHN 12 - Hakcipta - Biatah Bidayuh

Jesus dog Nginyo di Bethany

¹ Nŭm andu diŭ so Gawai Paska, Jesus di ka Bethany, kupo adi yŭn Lazarus rŭŭ, sianŭ adi-I ko pakat so kabŭs.

² Diginŭ ngara pisadang Ayŭh. Martha tukang ngidang, ka Lazarus mbŭh ndi so ngara adi sua guru man ngga Jesus.

³ Mary mbit sitangah lita inyo wangi adi mbar rega-i adi dog ndai so ndi masam kayuh adi buuh ramak dagŭn-i, ka susen-i di kaja Jesus. Ayŭh ngutos kaja Jesus ngga ubok-i. Ka ramin mbŭh puno ngga dagŭn wangi anŭ.

⁴ Ndi naan so murid Jesus, dŭn Judas Iscariot, adi re jua Ayŭh, nang,

⁵ “Mani dŭh jua adŭ wangi anŭ ngga rega taruh ratus kiping duit pirak ka duit anŭ nŭŭh nggen di daya sirata?”

⁶ Ayŭh nang sakanŭ, dŭh sabab-i sawŭ masi di daya sirata, pak sabab-i daya pinaku. Ayŭh daya adi tukang digŭng kandi duit ka mbŭh agi tambit so dieh.

⁷ Pak Jesus nang, “Dŭhnyah mito ayŭh! Tandah ayŭh ndai simŭnŭ yŭn andu pinyikubur Ku.

⁸ Angān re siraru biyŭn daya sirata ngga angān, pak angān dŭh re siraru agi ngga Aku.”

Bipekat an Siŭ Lazarus

⁹ Kan bara daya dingah Jesus agi di Bethany, ngara di kamanŭ; dŭh sabab Jesus adŭ pak sabab an tingga Lazarus, adi Jesus ko pakat so kabŭs.

¹⁰ Jadi pingubak pingubak imam jiroh aran an siŭ Lazarus gŭh,

¹¹ amai sitagar ayŭh, daya Jahudi mbŭh bagŭ bu so ngara ka mbŭh sabah di Jesus.

Jesus Mŭrŭt ka Jerusalem

¹² Andu anŭ ndi, bara daya adi mbŭh mandŭg ka Gawai Paska, dingah Jesus re mandŭg ka Jerusalem.

¹³ Ngara ndu daan daan kurma ka ruah di ngadā Jesus, buang nyirais nang, “Puji ka Tapa! Tapa nyiberkat Ayŭh adi mandŭg ngga adŭn Tuhan! Tapa nyiberkat Raja Israel!”

¹⁴ Jesus dapŭd ndi kaldi ka nunggang-i, nimun adi dog nuris darŭm Surat-kudus, adi nang,

¹⁵ “Dŭhnyah taru, Kupo Zion! Raja mu mbŭh mandŭg, nunggang kaldi.”

¹⁶ Di tika anŭ bara murid-I dŭh mirati kayuh anŭ; pak kan Jesus mbŭh dog pakat ka darŭm bragah, ngara ingat sopŭrŭg kayuh adi daya ndai di Ayŭh agi dog nuris di Surat-kudus.

¹⁷ Bara adi agi ngga Jesus darŭm-I bagan Lazarus da makat ka ruah so kubur agi kidaan sopŭrŭg kayuh adi mbŭh jadi.

¹⁸ Anŭ inŭh sabab bara daya bagŭ di dapŭd Ayŭh, sabab ngara dingah Ayŭh mbŭh ndai pingandai-nginga anŭ.

¹⁹ Bara daya Pharisee nang dupan adŭp ngara, “Tingga nŭh, dŭh ata tungang ndai ani ani! Ndi ong ong mbŭh tunda Ayŭh!”

Kada Daya Bangsa Greek mandŭg di Jiroh Jesus

²⁰ Agi kada daya bangsa Greek di ka Jerusalem samah bara daya di simayang di tika gawai anŭ.

²¹ Ngara tudu Philip (ayŭh adi so Bethsaida di Galilee) ka nang, “Tuan, kieh an bidapŭd ngga Jesus.”

²² Philip di kidaan di Andrew, ka ngara duwŭh di kidaan di Jesus.

²³ Jesus nam ngara, “Jam adi ngga Anak Manusia kambat bragah bās mbŭh mandŭg madin.

²⁴ Aku kidaan di angān kayuh adi sawŭ: ndi sirah ruwang gandom babŭ ruwang gandom kambŭi-i dŭh rabu ka tana ka kabŭs. Pak kambŭi-i kabŭs, ayŭh buān bagŭ buwa.

²⁵ Daya adi siŭt asŭng-i re kinanyap-i, ka daya adi kinanyap asŭng-i di ong ati re nyikŭn-i yŭn udip adi sawŭ adi tan adu adu.

²⁶ Asi asi adi an bituan di Aku dŭh siŭn dŭh an tunda Aku, isa daya-gaji Ku siraru agi ngga Aku di tadŭ yŭn Ku. Ka Sama Ku re kibās barang naan daya adi bituan di Aku.

Jesus Minyu Pasar Pinyikabŭs-I

²⁷ “Madin asŭng Ku mbŭh raru susah; Ani meh re Ku nang? Bisa kah Aku nang, ‘Sama, dŭhnyah bada tika jera-birasa ati dog Aku’? Pak sabab ati inŭh Aku mbŭh mandŭg ka darŭm ong, isa Aku kinyam jera-birasa ati.

²⁸ Sama, nyibragah meh adŭn Mai!” Ka sirŭŭn minyu, nang so rangit, “Aku mbŭh nyibragah-i, ka re nyibragah-i dinge.”

²⁹ Bara adi mijog diginŭ agi dingah, ka agi kada nang anŭ dudū, adi bŭkŭn nang, “Malaikat minyu ngga Ayŭh!”

³⁰ Pak Jesus nang di ngara, “Sirŭŭn anŭ dŭh-i mandŭg yŭn Ku, pak yŭn ngan.

³¹ Madin inŭh tipuh adi ngga ong ati dog bisara; madin pinguasa ong re dog taran.

³² Kan Aku mbŭh dog katuh di tunduh ong, Aku re tambit sopŭrŭg daya yŭn adŭp Ku.” (

³³ Darŭm-I minyu sakanŭ, Ayŭh sibandar-i kidaan munki Ayŭh re kabŭs.)

³⁴ Bara daya nam, “Ukum-adat ami kidaan nang Kristus re udip adu adu. Simuki Kuu bisa nang Anak Manusia dŭh siŭn dŭh dog katuh? Asi Anak Manusia anŭ?”

³⁵ Jesus nam, “Dŭm nyitiro adŭ jawa agi ngga angān. Panu meh darŭm jawa san angān biyŭn-i, sibia-i angān sidatan karŭm, amai daya adi panu darŭm karŭm dŭh puan kamaki-i panu.

³⁶ Sabah di jawa anŭ, meh, sitadŭn angān biyŭn-i, isa angān bisa jadi bara anak jawa.” Ripas Jesus ko nang sakanŭ, Ayŭh bu ka sukan adŭp-I so ngara.

Daya Judea Dŭh Sabah

³⁷ Sunggu Ayŭh ko ndai bagŭ masam pingandai-nginga di ruang ngara, ngara dŭh sabah di Ayŭh.

³⁸ Kayuh mun anŭ isa pinganang nabi Isaiah bisa jadi bitŭtŭk: “Tuhan, asi sabah agah adi kieh taban? Di asi Tuhan mbŭh kiren kuasa-I?”

³⁹ Ka sawŭ ngara dŭh tungang sabah amai Isaiah agi gŭh nang,

⁴⁰ “Tapa mbŭh kinarŭm batŭh ngara, ka mbŭh bada atŭk ngara madŭd; isa batŭh ngara dŭh kiris, ka atŭk ngara dŭh mirati, ka ngara dŭh tudu Aku, mite Aku pibua ngara, Tuhan nang”

⁴¹ Isaiah nang sakanŭ sabab ayŭh ko kiris bragah Jesus ka minyu pasar Ayŭh.

⁴² Sunggu kayuh agi mun anŭ, bagŭ Pinguasa Jahudi sabah di Jesus; pak sabab ngara taru bara daya Pharisee ngara dŭh an nang ani ani di sapa tarun, amai dŭh an dog taran so ramin simayang-Jahudi.

⁴³ Ngara rindu dŭ dapŭd puji so manusia so dapŭd puji so Tapa.

Pinganang Jesus re Nyarah daya

⁴⁴ Jesus nang ngga sirŭŭn bana, “Daya adi sabah di Aku, dŭh-i sabah di Aku adŭ, pak di Ayŭh adi bada Aku mandŭg ani.

⁴⁵ Daya adi kiris Aku kiris gŭh Ayŭh adi bada Aku mandŭg.

⁴⁶ Aku inŭh jawa adi mbŭh mandŭg ka ong, isa daya adi sabah di Aku dŭh rŭŭ darŭm karŭm.

⁴⁷ Kambŭi daya dingah ajar Ku ka dŭh sita-i, Aku dŭh ngukum ngara. Aku mandŭg dŭh di ngukum ong, di nyiramat-i kidŭ-i.

⁴⁸ Daya adi tirawan Aku ka dŭh an kambat agah Ku mbŭh biyŭn anŭ adi re nyarah ayŭh. Pinganang adi Aku ko piruah re nyarah ayŭh di andu sikasŭn!

⁴⁹ Kayuh ati sawŭ, sabab Aku minyu dŭh so kuasa adŭp Ku, pak Sama adi pait Aku ko pesan di Aku kayuh adi dŭh siŭn dŭh Aku minyu ka nang.

⁵⁰ Ka Aku puan nang pinyipesan-I agi taban udip adi sawŭ adi tan adu adu. Anŭ adi Aku nang inŭh kayuh adi Tapa bada Aku nang.”