JOHN 11 - Hakcipta - Biatah Bidayuh

Pinyikabŭs Lazarus

¹ Ndi naan daya dŭn Lazarus adi rŭŭ di Bethany, birandam. Bethany inŭh kupo adi yŭn Mary ngga Martha rŭŭ. (

² Mary ati inŭh sianŭ adi ko susen inyo wangi di kaja Jesus ka nyibadŭh-i ngga ubok-i; jurud-i, Lazarus, inŭh adi birandam.)

³ Dayung adi duwŭh madis ati pait pinganang ka Jesus: “Tuhan, dingan Mai Lazarus, birandam.”

⁴ Kan Jesus dingah sakanŭ, Ayŭh nang, “Pinŭbŭn andam ati dŭh-i pinyikabŭs, pak mbŭh aran ngga Tapa ngga Anak-I re kambat bragah.”

⁵ Jesus rindu Martha ngga Mary, samŭn Lazarus.

⁶ Pak kan Ayŭh dingah agah pasar Lazarus birandam, Ayŭh babŭ di yŭn adŭp-I anŭ sitian duwŭh andu dinge.

⁷ Ripas anŭ Ayŭh nang di bara murid-I, “Ja ata pari ka Judea.”

⁸ “Gurū,” bara murid-I nam, “Gibayuh tui daya diginŭ ko re an manjan Kaam ngga batuh, ka Kaam re kamanŭ dinge?”

⁹ Jesus nang, “Dŭh kah agi simŭng-duwŭh jam darŭm ndi andu? Jadi daya adi panu darŭm jawa sandu dŭh re sikak, amai ngara kiris jawa ong ati.

¹⁰ Pak daya adi panu singarŭm re sikak, amai ngara dŭh biyŭn jawa.”

¹¹ Ripas-I nang sakanŭ Jesus nang, “Dingan ta Lazarus mbŭh bŭŭs, ka Aku re di kies ayŭh.”

¹² Bara murid nam, “Tuhan, kambŭi ayŭh bŭŭs, ayŭh re bua.”

¹³ Jesus, sibandar-i, nang pasar pinyikabŭs Lazarus, pak ngara pikir ayŭh nang Lazarus batur bŭŭs.

¹⁴ Jadi Jesus nakit kidaan di ngara, “Lazarus taŭn mbŭh kabŭs.

¹⁵ Pak yŭn kana ngan inŭh Aku mating diginŭ ngga ayŭh, isa angān bisa sabah. Ja ata di tudu ayŭh.”

¹⁶ Thomas (dog kadŭn anak-apid) nang di bara murid adi bŭkŭn, “Ja ata samah di ngga Gurū, isa ata bisa samah kabŭs ngga Ayŭh!”

Adi Pakat daya kabŭs ka adi Nggen Udip

¹⁷ Kan Jesus mbŭh ndŭg, Ayŭh dingah Lazarus mbŭh pat andu dog kubur.

¹⁸ Bethany dŭh tungang taruh kilomita jo so Jerusalem,

¹⁹ ka bagŭ daya Judea mbŭh mandŭg tudu Martha ngga Mary, di nyaduh ngara di pinyikabŭs Lazarus.

²⁰ Kan Martha dingah Jesus agi mandŭg, ayŭh ruah di bidapŭd ngga Ayŭh, pak Mary rŭŭ di arŭn.

²¹ Martha nang di Jesus, “Kambŭi Kaam agi digiti prajah, Tuhan, dŭh jurud ku kabŭs!

²² Pak sunggu mŭnŭ aku puan, madin ati gŭh Tapa re nggen di Kaam ani ani adi Kaam mite.”

²³ “Jurud mu re udip dinge,” Jesus nang di ayŭh.

²⁴ “Aku puan,” Martha nam, “nang ayŭh re makat di andu sikasŭn.”

²⁵ Jesus nang di ayŭh, “Aku ati inŭh adi pakat daya so kabŭs ka adi nggen udip. Asi asi adi sabah di Aku, sunggu-i kabŭs, ayŭh re udip;

²⁶ ka asi asi adi udip buang sabah di Aku, dŭh-i re kabŭs. Sabah mu kah kayuh ati?”

²⁷ “Aku sabah, Tuhan,” ayŭh nam, “Aku sabah Kaam ati Kristus, Anak Tapa, adi dog janji re mandŭg ka ong ati.”

Jesus Sien

²⁸ Ripas Martha ko nang sakanŭ, ayŭh di bagan jurud-i Mary. “Gurū mbŭh agi digiti; Ayŭh bagan kuu,” ayŭh nang di Mary.

²⁹ Kan Mary dingah, ayŭh makat ka rasu ruah di tudu Jesus. (

³⁰ Jesus gibayuh ndŭg kupo, pak babŭ di tarun yŭn Martha ko bidapŭd ngga Ayŭh.)

³¹ Bara adi agi ngga Mary di ramin, adi nyaduh ayŭh, tunda ayŭh kan ngara kiris ayŭh bigaut ruah. Ngara pikir ayŭh ruah re muās di kubur.

³² Mary ndŭg yŭn Jesus, ka kan-i kiris Jesus, ayŭh sidikang di kaja-I. “Tuhan,” ayŭh nang, “Kambŭi Kaam agi digiti prajah, jurud ku dŭh kabŭs!”

³³ Jesus kiris ayŭh sien ka kiris gŭh bara adi tunda ayŭh samah sien; Ayŭh susah buang masi.

³⁴ “Diki angān kubur ayŭh?” Ayŭh siken ngara. “Ja di tingga, Tuhan,” ngara nam.

³⁵ Jesus sien.

³⁶ “Tingga no, munki masam Ayŭh rindu Lazarus!” ngara nang dupan adŭp-i.

³⁷ Pak agi kada ngara nang, “Ayŭh bada daya karak dapŭd kiris; Dŭh kah Ayŭh bisa gŭh bitan pinyikabŭs Lazarus?”

Lazarus dog Pakat so Kabŭs

³⁸ Gibabŭ susah, Jesus di ka kubur. Kubur anŭ tang, ka tibande batuh agi dieh ngga nabat rubang-i.

³⁹ Jesus nang, “Kadi batuh anŭ!” Martha, jurud sianŭ adi kabŭs, nam, “Tuhan, mbŭh pat andu ayŭh darŭm kubur, tatu-i mbŭh buuh madin!”

⁴⁰ Jesus nang di ayŭh, “Dŭh kah Aku ko kidaan di kuu, kuu bisa kiris bragah Tapa kambŭi kuu sabah?”

⁴¹ Ngara kadi batuh anŭ. Jesus nyigura ka rangit ka nang, “Sama, Aku nggen trima kaseh di Kaam sabab Kaam dingah pimite Ku.

⁴² Aku puan Kaam ari dingah Aku. Ka Aku nang sakanŭ yŭn kana ngara adi agi digiti, isa ngara bisa sabah Kaam sawŭ pait Aku.”

⁴³ Ripas-I ko minyu sakanŭ, Ayŭh bagan ngga sirŭŭn bana, “Lazarus, ruah kamati!”

⁴⁴ Ayŭh ruah, kaja tangan-i dog marut ngga banang-tadang, ka jawin-i dog marut ngga banang. “Kuka,” Jesus nang di ngara, “isa ayŭh sanang panu.”

Daya Bipekat Rawan Jesus

⁴⁵ Bagŭ ngara adi mandŭg tudu Mary mbŭh kiris kayuh adi Jesus ndai, ka mbŭh sabah di Ayŭh.

⁴⁶ Pak agi kada ngara di ka yŭn bara daya Pharisee ka kidaan di ngara kayuh adi Jesus ko ndai.

⁴⁷ Jadi bara daya Pharisee ngga bara pingubak imam ngudung ngga Kunsil. Ngara nang, “Ani re ta ndai? Tingga no, sopŭrŭg pingandai nginga-I.

⁴⁸ Kambŭi ata tandah Ayŭh mun anŭ, sopŭrŭg daya re sabah di Ayŭh, ka bara daya Rome adi bikuasa re makat ka nyirubuh Ramin Tuhan samŭn bangsa ta!”

⁴⁹ Ndi so ngara, dŭn Caiaphas, adi Imam Bās di sawa anŭ, nang, “Angān bawa!

⁵⁰ Dŭh kah angān rada, mbŭh kana dŭ inŭh ndi naan kabŭs yŭn sopŭrŭg daya, so ndi bangsa ta abo dog nyirubuh?”

⁵¹ Ayŭh minyu sakanŭ dŭh so ka pinyiraan adŭp-i, pak darŭm adŭp-i jadi Imam Bās di sawa anŭ, ayŭh minyu-binabi nang Jesus re kabŭs yŭn bangsa anŭ.

⁵² Dŭh yŭn bangsa anŭ adŭ, pak ngga bada sopŭrŭg daya adi Tapa mbŭh mien adi papar sasah dog nguruk da jadi ndi.

⁵³ So andu anŭ bara Pinguasa Jahudi bipekat jiroh aran an siŭ Jesus.

⁵⁴ Sabab anŭ, Jesus ari bisukan panu di Judea. Ayŭh di ka kupo dŭn Ephraim, dŭh jo so tarun tana-pajam, di yŭn-I rŭŭ ngga bara murid-I.

⁵⁵ Jadi Gawai Paska mbŭh sindŭk, ka bagŭ daya mbŭh mandŭg so sapa tarun tana rais di ka Jerusalem di ndai adat pibisig diŭ so gawai.

⁵⁶ Ngara jiroh Jesus, ka darŭm ngara mbŭh tikuruk di Ramin Tuhan, ngara siken dupan adŭp-i, “Ani pikir-kira ngan, re mandŭg kah dŭh Ayŭh ka gawai?”

⁵⁷ Bara pingubak imam ngga daya Pharisee muko nggen ukum nang kambŭi agi daya puan tarun yŭn-I, daya anŭ dŭh siŭn dŭh an kidaan, isa ngara bisa di nakap Ayŭh.