JOEL 3 - Hakcipta - Biatah Bidayuh

Tapa re Nggen Bisara di barang Bangsa

¹ TUHAN nang, “Di tika anŭ Aku re bada Judah ngga Jerusalem pari mujur mun dawŭ-i.

² Aku re nguruk sopŭrŭg bangsa ka taban ngara ka Rubān Bisara. Diginŭ Aku re nggen bisara di ngara amai sopŭrŭg kayuh adi ngara mbŭh ndai di daya Ku. Ngara ko mesak bara daya Israel ka rais tami ka bikutung tana Israel, tana adi Aku dapu.

³ Ngara taran dadu ngga natu asi re dapu daya-takap. Ngara jua anak-anya dari ngga dayung da jadi urun ngga bayar dayung sundar bait wain.

⁴ “Ani anŭ suba ngan ndai di Aku, Tyre, Sidon, ngga ndi tarun tana Philistia? Angān suba an maras dendam kah? Kambŭi anŭ kayuh raan ngan, Aku bisa rikas bayar angān!

⁵ Angān mbŭh sirapas pirak ngga mas Ku ka taban ngga bu buat-rata Ku ka darŭm bari-sambah ngan.

⁶ Angān mbŭh taban ngga bu daya Judah ngga daya Jerusalem jo so rais adŭp ngara ka jua ngara ka daya Greek.

⁷ Madin Aku re taban ngara ngga ruah so tarun tarun adi yŭn ngan jua ngara. Aku re ndai di angān kayuh adi angān ko ndai di ngara.

⁸ Aku re bada anak dari ngga anak dayung ngan dog jua ka daya Judah; ngara re jua ngara jeh ka daya Sheba. Aku, adi TUHAN, mbŭh minyu.

⁹ “Piagah kayuh ati di barang bangsa: ‘Sidia yŭn re biperang; bagan bara pimagan ngan; nguruk sopŭrŭg soldadu ngan ka baris meh!

¹⁰ Maba tŭbŭn basi bajak ngan da jadi pedang ka sinda adi ngga ngan mŭpŭd tugu pimuruh da jadi jarok. Ngara adi rumuh dŭh siŭn dŭh gŭh sua di biperang.

¹¹ Rikas ka mandŭg, sopŭrŭg ngan bangsa adi rŭŭ maning tarun ati, ka tikuruk meh di rubān.’ ” Pait bara tibaran soldadu Mai, O TUHAN, da nyerang ngara!

¹² “Barang bangsa dŭh siŭn dŭh sidia ka mandŭg ka Rubān Bisara. Diginŭ Aku, adi TUHAN, re guru nggen bisara di sopŭrŭg bangsa adi rŭŭ maning tarun ati.

¹³ Ngara anŭ raru ginaka; kapŭg ngara keya ka gandom di tika ngatŭm; digang ngara keya ka anggor dog digang di darŭm tarun yŭn mŭ buwa anggor adi mbŭh puno ndŭg ka wain-i babas.”

¹⁴ Biribu ribu daya agi di Rubān Bisara. Diginŭ inŭh andu TUHAN re rikas mandŭg.

¹⁵ Batŭh andu ngga buran mbŭh karŭm, ka dudu bitang mbŭh dŭh tia nyekar.

Tapa Re Nyiberkat Daya-I

¹⁶ TUHAN ngŭr so Sandah Zion; sirŭŭn-I sak dudū so Jerusalem; ong ngga rangit bigagar. Pak Ayŭh re grindung daya-I.

¹⁷ “Komŭnŭ, Israel, angān re puan Aku ati TUHAN adi Tapa ngan. Aku rŭŭ di Zion, sandah kudus Ku. Jerusalem re jadi kupo kudus; daya tami dŭh re tia nyerang-i.

¹⁸ “Di tika anŭ darŭd re puno da teya anggor, ka dudu sapi re agi di barang sandah; diginŭ re bagŭ piin yŭn sopŭrŭg daya di Judah. Anak sungi re aman so Ramin TUHAN, ka-i re misa Rubān Acacia.

¹⁹ “Egypt re jadi tarun tana-pajam, ka Edom re jadi tibawang, sabab ngara nyerang tarun tana Judah ka siŭ daya adi dŭh sarah.

^20-21 Aku re maras dendam yŭn ngara adi dog siŭ; Aku dŭh re tandah ngara adi sarah. Pak Judah ngga Jerusalem re adu adu agi daya dieh, ka Aku, adi TUHAN, re rŭŭ di Sandah Zion.”