JOEL 2 - Hakcipta - Biatah Bidayuh

Kadis Jadi Pinyibakan yŭn Pimandŭg Andu TUHAN

¹ Mambak trompet; nguga bara daya di Zion, adi sandah kudus Tapa. Kimŭtŭr meh, bara daya Judah! Andu TUHAN mbŭh rikas re mandŭg.

² Andu anŭ re karŭm buang pajam andu anŭ singŭt ka kruman Bara tibaran kadis masang mun karŭm nutu darŭd. Gi-mating kayuh mun anŭ, ka re mating mun anŭ dinge.

³ Mun apui ngara man anak anak kayuh-udip. Di jawin ngara tarun tana agi keya ka Teya Eden, pak di punok ngara mbŭh keya ka tana-matung. Mating kayuh dŭm bada ngara.

⁴ Ngara mun dudu kuda; ngara bikaduh mun kuda perang.

⁵ Darŭm ngara mirupat di tunduh darŭd, jawŭn ngara agi sak jawŭn krita kuda; jawŭn ngara agi sak kupai dog man apui. Ngara bidindar mun bara soldadu sidia re biperang.

⁶ Darŭm ngara mandŭg, sopŭrŭg daya mbŭh tikaran; raŭn barang naan daya mbŭh pusat.

⁷ Ngara nyerang mun pimagan; ngara jakŭh sindung mun bara soldadu. Sopŭrŭg ngara baris nyurong ka jawin ka dŭh biruit ka tarun bŭkŭn

⁸ bait matŭn aran dingan-i. Ngara mŭrŭt tambus buwang, ka mating kayuh tungang bitan ngara.

⁹ Ngara nyarab kupo; ngara bikaduh di sambu sindung kupo; ngara jakŭh ramin ka mŭrŭt so pinjan mun pinaku.

¹⁰ Ong bigugoh darŭm ngara masang; rangit bigagar. Batŭh andu ngga buran jadi karŭm, ka dudu bitang mbŭh dŭh tia nyekar.

¹¹ TUHAN nyirais nggen ukum di bara soldadu-I. Tibaran soldadu adi tunda pinganang-I inŭh bagŭ buang bake. Munki masam sipŭ-i andu TUHAN! Mating daya re tan.

Pinyibagan Yŭn Marik Pimudip Pari ka Tapa

¹² “Pak dŭh-i rambat,” nang TUHAN, “yŭn ngan marik pimudip ngan pari ka Aku ngga siabo asŭng ngan ngga bipusa, sien ka muās.

¹³ Bada atin ngan anŭ adi keya ka asur kiren susah ngan; nyiratak piraka ngan dŭh-i sadang.” Pari ka TUHAN adi Tapa ngan. Ayŭh inŭh mandis ka raru masi; Ayŭh tŭtŭd ka ingat janji-I; Ayŭh ari sidia an apun ka dŭh-I an ngukum.

¹⁴ Kadŭ TUHAN adi Tapa ngan re nukar pikir-I ka nyiberkat angān ngga raru bagŭ buwa pimuruh. Ka angān meh dapŭd jugan gandom ngga wain ka Ayŭh.

¹⁵ Mambak trompet di Sandah Zion; nggen ukum bada daya bipusa ka bagan daya bagŭ bada mandŭg tikuruk!

¹⁶ Bada tikuruk sopŭrŭg daya; sidia ngara yŭn udung adi kudus; taban bara adi minyamba; nguruk bara anak-anya samŭn anak anak pira. Simŭnŭ gŭh ngara adi bauh ko sawan dŭh siŭn dŭh tingge birit ngara ka mandŭg.

¹⁷ Bara imam, adi bituan di TUHAN di asah mija-sambah ngga tiban Ramin TUHAN, dŭh siŭn dŭh muās ka bidua: “Masi di daya Mai, TUHAN. Dŭhnyah bada bangsa bŭkŭn ngamun kieh ka tawŭh kieh buang ngara nang, ‘Diki Tapa ngan?’ ”

Tapa bada Tana pari Damŭn

¹⁸ Komŭnŭ TUHAN kiren adŭp-I mbit bat di tana-I; Ayŭh masi di daya-I.

¹⁹ Ayŭh nam ngara: “Madin Aku re nggen di angān gandom ngga wain samŭn inyo kanā, ka angān re bisoh. Bangsa bangsa bŭkŭn re dŭh tia ngamun angān.

²⁰ Aku re kadi bara tibaran kadis adi mandŭg so utara ka re kasig kada-i ka tarun tana-pajam. Bara-i adi tura ka jawin re dog kasig ka Rawŭt Pide, bara adi tura ka punok ka rawŭt Mediterranean. Tadang ngara re buuh madam. Aku re pirabur ngara sabab sopŭrŭg kayuh adi ngara mbŭh ndai di tunduh ngan.

²¹ “Ŭmŭh, dŭhnyah taru, pak pawŭn ka gaŭn amai sopŭrŭg kayuh adi TUHAN mbŭh ndai yŭn ngan.

²² Dāng, dŭhnyah taru. Kupai agi barŭm; tŭngŭn kayuh buān buwa-i, ka mbŭh bagŭ buwa ara ngga buwa anggor.

²³ “Gaŭn angān, daya Zion, gaŭn meh angān amai kayuh adi TUHAN adi Tapa ngan mbŭh ndai yŭn ngan. Ayŭh mbŭh nggen di angān sukup ujen di tipuh jaya; Ayŭh mbŭh ren ujen tipuh madud ka ujen tipuh bunga mun dawŭ-i yŭn ngan.

²⁴ Tarun yŭn ngiik re puno ngga gandom; parit adi sindŭk yŭn mŭ buwa anggor re puno ngga wain ka inyo kanā ndŭg ka babas.

²⁵ Aku re nggen pari kayuh ngan adi mbŭh manyap darŭm sawa adi ngga bara tibaran kadis man buwa pimuruh ngan. Aku inŭh adi pait dudu tibaran kadis anŭ bada nyusah angān.

²⁶ Madin angān re biyŭn bagŭ kayuh man, ndŭg ka bisoh. Angān re muji TUHAN adi Tapa ngan, adi mbŭh ndai pingandai saruh yŭn ngan. Daya Ku dŭh re tia dog ngamun.

²⁷ Ngga simŭnŭ, angān daya Israel, re puan nang Aku agi di ruang ngan, ka Aku, adi TUHAN, inŭh Tapa ngan, ka mating adi bŭkŭn. Daya Ku re dŭh tia dog ngamun.

Andu TUHAN

²⁸ “Muko anŭ, Aku re ren Roh Ku di barang naan daya: anak anak dari ngan ngga anak anak dayung ngan re piagah Agah Ku; bara nyamba ngan re nyipŭmŭh, ka bara pimara ngan re kiris kayuh keya ka darŭm pŭmŭh.

²⁹ Di tika anŭ Aku re ren Roh Ku di tunduh bara urun ani, dari bait dayung.

³⁰ “Aku re nggen pinyibakan yŭn andu anŭ di rangit ngga di ong; re agi bisaad, apui, ka jambung asuh.

³¹ Batŭh andu re karŭm, ka buran re marui bireh mun deya diŭ so andu TUHAN adi bisā ka adi sipŭ anŭ mandŭg.

³² Pak sopŭrŭg daya adi mite turung so TUHAN re siramat. Nimun adi ko TUHAN nang, ‘Kada di Jerusalem re pirupas adŭp ngara; ngara adi Aku mien re siramat.’ ”