JOEL 1 - Hakcipta - Biatah Bidayuh

¹ Ati inŭh pinganang TUHAN ka Joel anak Pethuel.

Bara daya Israel Susah amai Buwa Pimuruh Rusak

² Nakit dingah, angān adi mbŭh minyamba; sopŭrŭg adi di Judah, dingah. Agi kah kayuh adi mun ati jadi dawŭ-i di jaman adŭp ngan bait di jaman tayung-babuk ngan?

³ Kidaan di bara anak ngan pasar kayuh ati; ngara re kidaan di bara anak ngara, adi re kidaan di turap adi ripas adŭp ngara.

⁴ Dudu kadis adi dŭh tungang dog mirang mbap di pimuruh ngga di buwa-i; anŭ adi tadŭh kadis adi diŭ, kadis adi sundis man.

⁵ Burah meh ka muās, angān adi pimabuk; sien, angān adi gagā nok wain; buwa anggor adi ngga ndai wain bauh mbŭh dog pirusak.

⁶ Dudu kadis mbŭh nyerang tarun tana ta; ngara raru bake ka mbŭh raru bagŭ, dŭh tungang dog mirang; jipŭh ngara reja mun jipŭh singah.

⁷ Ngara mbŭh pirusak tŭngŭn anggor ta ka ngunyai tŭngŭn tŭngŭn ara. Ngara mbŭh nyiratak kurit tŭngŭn-i, ndŭg ka daan daan-i buda.

⁸ Sien, angān, mun dayung bujang ngurid dari adi an-i ndu banŭh.

⁹ Mbŭh mating gandom puan kah wain re dog jugan di Ramin TUHAN; bara imam muās amai ngara dŭh biyŭn pinganggen yŭn TUHAN.

¹⁰ Tana mbŭh mating pimuruh dieh; tana muās sabab gandom mbŭh dog pirusak, buwa anggor mbŭh pisŭk, ka tŭngŭn kanā mbŭh rayu.

¹¹ Susah, angān adi biteya; sien, angān adi jaga teya anggor, sabab gandom, jari, sawŭ, sopŭrŭg pimuruh mbŭh dog pirusak.

¹² Tŭngŭn anggor ngga tŭngŭn ara mbŭh rayu; sopŭrŭg tŭngŭn pimuruh mbŭh rayu ka kabŭs. Pinyigaŭn daya mbŭh mating.

¹³ Nēn banang guni ka muās, angān bara imam adi nyiraja di mija-sambah! Di mŭrŭt Ramin TUHAN ka muās ndi ngarŭm ngarŭm! Mating gandom puan kah wain re ngan jugan ka Tapa ngan.

¹⁴ Nggen ukum isa daya bipusa; bagan daya bagŭ bada tikuruk! Bagan bara pinguru samŭn sopŭrŭg daya Judah ka darŭm Ramin TUHAN adi Tapa ngan, ka bagan mite turung so Ayŭh!

¹⁵ Andu TUHAN mbŭh sindŭk, andu adi ngga Ayŭh adi Bisa-pŭrŭg taban pinyirusag. Munki masam sipŭ-i re andu anŭ!

¹⁶ Di sirung jawin ami buwa pimuruh ami dog pirusak. Mating pinyigaŭn di Ramin TUHAN Tapa ami.

¹⁷ Ruwang bine kabŭs di tana badŭh. Mating tia gandom re dog nyikŭn, panggau adi dŭh brisi rubuh.

¹⁸ Sapi sapi pira-muu adŭp-i sikirau sabab mating kupai re-i man; kaban biri mbŭh jera gŭh.

¹⁹ Aku bagan mite turung so TUHAN, sabab kupai ngga tŭngŭn tŭngŭn kayuh mbŭh rayu, mun adi ko dog man apui.

²⁰ Ndŭg ka dāng tarun bagan mite turung so Kaam sabab anak anak sungi mbŭh badŭh.